Read Makhuwa-Shirima 1 Mamwene 6 Bible Online

1 Mamwene 6 - Makhuwa-Shirima bible

1 Mamwene 6

¹Vayaakhani ya macira maxexe ni miloko mithannamiraru vahoolo wookhuma aYixrayeli wExipitu, eyaakha yanaaxexe ya olamula wa Salomoni oYixrayeli, mmweerini wanaaveeli wa eyaakha oniitthaniwa Zivi, Salomoni aapacera oteka Empa ya Yave.

²Vano miringo aatekenlaawe Salomoni Empa ya Yave saari iya: mweerakameloni imeetru* miloko miili niithannapiili, mweekhuveeloni imeetru* ithanniixexe, ni orakamawaya okhuma vathi wookela osulu imeetru* muloko ni tthaaru ni eriyari ya emeetru*.

³Mweekhuveeloni wa nipithela* naavoleeliwa ekwaartu etokotoko ya Empa ya Yave waari imeetru* ithanniixexe — olikanaka mweekhuveeloni wa Empa ya Yave ni naapwahereratho imeetru* ixexe ni eriyari ya emeetru* ohoolo wa Empa ya Yave.

⁴Salomoni aapakela ixanela ni isereemu sooreerelaxa Empa ya Yave.

⁵Vaxirini sa vaate wa ekwartu etokweene ni Nipuro Nootteelaxa* aatekelela ikwartu sikina saarukureenre.

⁶Ekhuveelo ya mpatta wa vathi yaari imeetru* piili ni vakhaani; ya mpatta wa eriyari imeetru* piili ni wookwanaka imeetru* tthaaru, ni ya mpatta wa osulu meetru* tthaaru ni vakhaani. Aatekelela itthaabwa vaxirini vaate wa Empa ya Yave, moota wooweera khawaatthuneya ovolonghera vaxirini wa Empa ya Yave.

⁷Mootekiwani wa Empa ya Yave, yaavareliwe muteko maluku oorehereriweene mmanttumuxani. Hiiho khawaanyakuleleyaru ni enyutto, hata ni ephalo hoye hoye wakhalaru moota wa ikaruma mootekiwani wa Empa ya Yave.

⁸Mulako wa mpatta wa vathi waari mpatta wa ohitto wa Empa ya Yave. Weera eweliwe mpatta wa eriyari ni wa osulu waaweliwa okottoombiwaka.

⁹Hiiho aateka Empa ya Yave, anamaliha, atekaka nipathonaya ni esedari* ni nyiri sikina.

¹⁰Aatekatho ikwartu sa mukhwipi Empeeneeyo. Orakamawaya wa khula ekwartu okhuma vathi wookela osulu waari imeetru* piili ni vakhaani. Iye saakumanyihiweno ixiri sa Empa ya Yave ni itthaabwa sa esedari*.

¹¹Yave aahuuluma ni Salomoni amweerelaka:

¹²“Mwaha wa Empa ya Yave ela muntekaanyu, — mwatthara ikanosaka ni soolamulasaka ni mwiiwelela malamulowaaka, kinimookwaniherelani yeeyo kaaroromelinghaaka atithinyu, Davide.

¹³Miyo kinookhala variyari wa aYixrayeli kihihiyaka mulokwaaka.”

¹⁴Vano Salomoni aamaliha oteka Empa ya Yave.

¹⁵Ixiri sa mpuwa*, okhuma vathi mpaka munkhalaxirini mpakatho mpuwa moothemwene mwaahuruweliwa ni nyiri sa esedari*. Vathivawo saaheliwa itthaabwa sa mwiri wa goferi*.

¹⁶Aathikilanya meetru* ithanniixexe exiri ya opithela wa Empa ya Yave ni itthaabwa sa esedari*, okhuma vathi mpaka waapatho weera Mpaani mwa Yave nikhalemo Nipuro Nootteelaxa*.

¹⁷Mweerakameloni wa ekwartu etokweene ohoolo wa Nipuro Nootteelaxa* waari meetru* muloko niithannatthaaru.

¹⁸Mpuwa wa Empa ya Yave waahuruweliwa ni esedari* sipattheliweenemo icaambulo sa soowiima ni ithutu soothapuruwa sootheene iye saari sa esedari* nihooneyakaru nluku.

¹⁹Salomoni aarehereratho Nipuro Nootteelaxa* mpuwa mwa Empa ya Yave weera yiikaathiwekemo Arka* a wiiraana a Yave.

²⁰Miringo sa Nipuro Nootteelaxa* na mpuwa saari: Mweerakameloni imeetru* ithanniixexe, mweekhuveeloni imeetru* ithanniixexe, ni orakamawaya okhuma vathi wookela osulu imeetru* ithanniixexe. Aahuruwelamo ni eyuuma yoorikaxa yooreera. Aahaahuruwelatho ni eyuuma yoorikaxa altaari* a mwiri wa esidari*.

²¹Salomoni aahuruwela mpuwa wa Empa ya Yave ni eyuuma yoorikaxa yooreera, anatthukelela onyooro wa eyuuma yoorikaxa vamulako wa Nipuro Nootteelaxa* mwa nenno aahuruwenlaawetho ni eyuuma yoorikaxa.

²²Hiiho aahuruwela mpatta wa mpuwa wootheene ni eyuuma yoorikaxa, nitho altaari* yaari vaNipuroni Nootteelaxa*.

²³Munipuroni Nootteelaxa* aahaapatthela akerubini* eeli a mwiri wa sooliveira*, khula kerubini* aarino imeetru* ixexe ni eriyari ya emeetru* a orakamawaya.

²⁴Okungeya wa mapupha a akerubini* waari: imeetru* piili ni vakhaani; imeetru* ixexe ni eriyari ya emeetru* okhuma nipupha nikina mpaka nikhwaaya.

²⁵Ooweeli yaamulikana ekhalelo emoha.

²⁶Orakama wa khula kerubini* waari imeetru* ixexe ni eriyari ya emeetru*.

²⁷Aawiikaathi akerubini* vaNipuroni Nootteelaxa* na Empa ya Yave ookungeyeene mapupha. Nipupha na kerubini* mmoha naaphiteera exiri ni na mukina exiri ekina. Mapupha makinaawo yaarookumanyihana eriyari ya Nipuro Nootteela*.

²⁸Aahaahuruwela akerubini* ni eyuuma yoorikaxa.

²⁹Vaxirini sootheene sa omokoni ni sa mpuwa mwa Empa ya Yave aahaapatthelamo akerubini*, mavare ni ithutu soothapuruwa.

³⁰Aahuruwelatho ni eyuuma yoorikaxa vathi okhuma exiri ya mpuwa mpaka ya omokoni wa Empa ya Yave.

³¹Vamulako wa Nipuro Nootteelaxa* aapakela masele a sooliveira* ni isereemu sa mattuumba mathanu.

³²Mmaseleni meeli a sooliveira* aahaapatthelamo akerubini*, mavare ni ithutu soothapuruwa, anaahuruwela akerubini* ni mavare ni eyuuma yoorikaxa yoohaniwa.

³³Mooteene yoowo aahaapakela amarimbu a sooliveira* a mattuumba maxexe wa mulako wa Empa ya Yave.

³⁴Aapakatho masele meeli a mwiri wa goferi*, khula nsele ni mipatta miili saarukureeriha.

³⁵Mmaseleni meeli ale aahaapatthelamo akerubini*, mavare ni ithutu soothapuruwa, anahuruwelano eyuuma yoorikaxa yoohaniwa.

³⁶Aateka exiri ya nipuwa na mpuwa ni misera miraru sa maluku ooreheriwa ni mmoha wa itthaabwa sa esedari*.

³⁷Mathipelo a Empa ya Yave yaapaceriwe vayaakhani yanaaxexe, mmweerini wiitthaniwa Zivi.

³⁸Empa ya Yave yootheene vamoha ni sootheene saatthuneya ni saalakeliwe yaamalihiwe vayaakhani muloko niimoha, mmweerini wa naathannamiraru wiitthaniwa Buli. Salomoni aavirihale iyaakha ithannapiili atekaka.