Read Makhuwa-Shirima 1 Mamwene 8 Bible Online

1 Mamwene 8 - Makhuwa-Shirima bible

1 Mamwene 8

¹Vano mwene Salomoni aawiitthana oYerusaleemu asitokweene ootheene a aYixrayeli; asitokweene ootheene a ipuumba sa oYixrayeli ni mapwattapwattha ootheene a oYixrayeli weera yaakuxe oSiyoni, esidade ya Davide, Arka* a Wiiraana a Yave.

²Mmweerini wanaathannamiili oniitthaniwa Etanimi, mweehuhuni ya efesta, asilopwana ootheene a aYixrayeli yaathukumana wa mwene Salomoni.

³Ephiyakaru asitokweene ootheene a aYixrayeli, asaserdoti* yaahaakuxa Arka* a Yave,

⁴enaaruuha vamoha ni Eheema ya Muthukumano* ni ikaruma sootteela saari mwemmo. Asaserdoti* ni aLeevi ti yaaruuhale sootheene iye.

⁵Mwene Salomoni ni muloko wootheene wa aYixrayeli aathukumannaaweno ohoolo wa Arka* yaaveleela ikhondoolo ni imombe sohaalikeleya.

⁶Vahoolowaya asaserdoti* yaahaakuxasa Arka* a Wiiraana a Yave yaaroihaka vanipuroniwaya mukwartuni wa mpuwaxa, eyo tiiyo Nipuro Nootteelaxa*, enawiikaathi owaathi maphupa a akerubini*.

⁷Mapupha ookungeyeene a akerubini* yaakuttelela Arka*, ni Arka* ni ikopo yaakuxeriwaayano.

⁸Ikopo iye saari soorakama omakoteloniwaya waamooneya weemenleene hata ohoolo wa Nipuro Nootteelaxa*, mene khawooneyaru mpatta wa omokoni wa Empa ya Yave. Vano iye sookhala mpaka olelo.

⁹Kheeyamomo etthu mwarkani* sihikhanle itthaabwa piili sa maluku Moisesi iikaathiyaawemo oHorebi, mwa weiwo Yave aapankaawe wiiraana ni aYixrayeli vahoolo wa okhumawaya wExipitu.

¹⁰Asaserdoti* evenyaka Nipuro Nootteelaxa*, nihutte naasareya Mpaani mwa Yave

¹¹moota wooweera asaserdoti* khayaawenre okwanihera mitekosaya niwoko na nihutte weenre ovuwa wa Yave wasareya Mpaanimwawe.

¹²Vanonto Salomoni aaheera: “Yave eenre weera onookhala munihutteni nooriipaxa.

¹³Vekhaikhai kohootekelani Empa etokotoko weera mmakemo, nipuro muneeraanyu mukhaleke mahuku ootheene.”

¹⁴aYixrayeli ootheene ethukumanneene yeemelelo, mwene aarukunuwa, anaareeliha,

¹⁵eeraka: “Atthapeliwe Yave, Muluku a oYixrayeli. Owo aakwanihera ni matataawe yeeyo aaroromelinghaawe atithaka Davide ni eyaanowaawe eenraawe:

¹⁶‘Okhuma nihuku nne kaakhuminghaaka mulokwaaka aYixrayeli wExipitu, nkithanlaleru naari esidade emoha variyari wa ipuumba sa oYixrayeli weera kitekelemo empa Nsinanaka, mene koomuthanla Davide weera alamule mulokwaaka.’

¹⁷Atithaka Davide yannatthunaxa oteka Empa ettittimiherelaka Nsina na Yave, Muluku a aYixrayeli.

¹⁸Wa soothesene, Yave aaweerela atithaka Davide: ‘Moopaka nnene wookhalano muupuwelo vamurimani okitekela empa muttittimiherelaka Nsinanaka.

¹⁹Vaheera khamuhiyono nyuwo muneera muteke, mene mwaninyu mulopwana xaxaxa — ti yoowo aneera atekele Empa Nsinanaka.’

²⁰Yave ookwanihera yoororomelihaawe — miyo ti namarandela a Davide ni vano kookilaathela ehice ya emwene wa aYixrayeli, ntoko Yave aaroromelinghaawe, ni kootekela Empa Nsina na Yave, Muluku a aYixrayeli.

²¹Koohiyamo nipuro noowiikaathi Arka* mwa mwemmo siraayamo itthaabwa sa Wiiraana wa Yave, wiiraanawene weiwe aapakenlaawe makholowaahu aakhumingheene wExipitu.”

²²Vano Salomoni aaheemela ohoolo wa altaari* a Yave vamaithoni wa muthukumano wootheene, anatheteela matataawe wiirimu,

²³anavekela: “Ii! Yave, Muluku a aYixrayeli, khoowowo muluku mukina onlikana ni Nyuwo wiirmu hata elapo ya vathi. Nyuwo mookwanihera wiiraanawanyu wa osivela ni arumeiyaanyu, mwa yaawo anoorumeelani ni murima wootheene.

²⁴Mookwanihera yoororomelihaanyu wa murumeiyaanyu Davide, atithaka. Mwaaroromeliha ni eyanowaanyu ni mookwanihera ni matataanyu — ntoko onooneyaaya olelo.

²⁵Vano, Yave, Muluku a aYixrayeli, mukwanihere yoororomelihaanyu wa murumeiyaanyu Davide, atithaka mweenraanyu: ‘Anamwaniinyu yiipasoopa nnenesene weera yeette mphironimwaka ntoko mweenttaanyu, munookhalano namarandela anaalamule aYixrayeli vamaithoniwaka wa mahuku ootheene.’

²⁶Vano Muluku a aYixrayeli, yeeyo mwaamuroromelinghaanyu murumeiyaanyu Davide, atithaka, ekwaniheriweke.

²⁷Woohihovela Yave khamaka elapo ya vathi ela. Muluku ti Mutokweene woopwahaxa wiirimu ni mapuro a musulusulu. Wootepaxa Empa ela kitenkaaka!

²⁸Hata hiiho, Yave, Mulukwaaka, mwiiwe nivekelo na murumeiyaanyu ni yoovekaawe ya ikharari. Mwiiwe okhuwela ni nivekelo murumeiyaanyu ompakaawe vamaithoniwanyu olelo.

²⁹Ngwehe Empa ela ohiyu ni othana, niwoko nri nipuro nyuwo mweenraanyu: ‘Nsinanaka nnookhalamo.’ Mahuku ootheene mwiiweke mavekelowaaka ankhuma mu.

³⁰Mwiiwe mavekelo a murumeiyaanyu ni a mulokwaanyu aYixrayeli, awo yaavekelaka mu. Wiirimu iwo mwiiwe munkhalaanyuwo ni mwiiwaka, mulevelele.

³¹Mulopwana amutthekela mukhwaawe, anamunyesereriha olipela, anaphiya ohoolo wa altaaraanyu* Mpaanimwanyumu,

³²vano mwiiwe wiirimu ni mwaakhuleke. Muthanleke variyari wa arumeiyaanyu, munthorihaka yoowo orino nthowa munttaruxelaka yoonanara opankaawe. Mumpakele ekhaikhai yoowo oohinthowa, mooniheraka hiiho weera khanono mulattu.

³³Mulokwaanyu aYixrayeli waawiniwaka ni amwiittanaaya niwoko na wootthekelani Nyuwo, owo wahokoleela wa Nyuwo wiitthanaka Nsinananyu, ovekelaka ni odyoonttelelaka Mpaanimwanyumu,

³⁴vano mwiiwe wiirimu ni mulevelele soottheka sa mulokwaanyu aYixrayeli ni muhokoloxere elapo mwaavanghaanyu makholowaaya.

³⁵yaahiyaka orupa epula, enathowa maahi niwoko na wootthekelani mulokwaanyu, ni owo warwa wa nipuro nna wiitthanaka Nsinananyu ohiyaka sootthekasaya niwoko na ottaruxawanyu,

³⁶vano mwiiwe wiirimu ni mulevelele soottheka sa arumeiyaanyu aYixrayeli, mulokwaanyu. Muxuttihe ephiro ya ekhaikhai, murumihele epula elapwaanyu ela mvanghaanyu mulokwaanyu ntoko yoohiyeriwa.

³⁷Yaavolaka etala hoye hoye nihooxo mweelaponi, hata soowaaliwa suuma niwoko na oviha, naari aaphiyaka nasope hoye hoye axiitthu akina hoye hoye mwiittana mukina awanano musidadenimwaya emoha — nakhalaru nihooxo hoye hoye iretta —

³⁸ni mukina a mulokwaanyu aYixrayeli avekela hoye hoye adyoonttelela ni murima woosareya othananaxa, anatheteya matataawe Mpaanimwanyumu,

³⁹vano mwiiwe wiirimu munkhalaanyuwo ni mulevelele. Mumvahe khula mutthu yeeyo omphwanelaawe, niwoko Nyuwo munsuwela mirima sa atthu ootheene. Aani ti Nyuwo paahi munsuwela murima wa khula mutthu.

⁴⁰Hiiho awosa anoowoovani mahuku ootheene eneeraaya ekhale mweelaponi mwaavanghaanyu makholowaahu.

⁴¹Anamarwa mwa yaawo ahikhanle mpatta wa mulokwaanyu aYixrayeli yarwa elapo ya ottaiwene niwoko na Nsinananyu,

⁴²ni niwoko noowiiwa sa Nsinananyu ntokotoko, soopakasanyu ni owerawanyu, yarwa ovekela Mpaanimwanyumu,

⁴³vano mwiiwe wiirimu munkhalaanyuwo ni mukwanihere yeeyo namarwa aneeraawe oovekeleni weera miloko sootheene sa elapo ya vathi sisuwele Nsinananyu ni siwooveeni, ntoko mulokwaanyu aYixrayeli, ni weera sisuwele weera Empaanyu ela kootekenlaakani yookhalano Nsinananyu.

⁴⁴Mulokwaanyu warowa waawanano amwiittanaaya yakhalaru mapuro muntthunaanyu weera orowe ni woovekelani Nyuwo ohokoleela esidade ela muthanlalaanyu ni wa Empa ya Yave kitekenlaaka Nsinananyu,

⁴⁵vano mwiiwe wiirimu nivekelonaya ni odyoonttelelawaya, mwaakihaka mulattwaaya.

⁴⁶Onoowereya aYixrayeli wootthekelani, niwoko khaawo ohinttheka. Yootthekelani, Nyuwo munimwaanyoonyeriwa ngwinnyereraka mmatatani mwa amwiittana weera yaavare ootthukiweene yaaronghaka elapwaaya — ekhalaka ya ottai hoye hoye ya vakhiviru.

⁴⁷Vano mweelaponi ya otthukiwawaya awosa yawuupuwelelani erukunxaka murima yoodyoonttelelakaniwo: ‘Noottheka, noopaka yoonanara neettaka ntoko anamatakhala.’

⁴⁸Awosa yoohokoleelani Nyuwo ni mirimasaya ni okumaaya wootheene mweelaponi ya amwiittanaaya, mwa yaawo yaakunxe ootthukiweene, ni yoovekelani Nyuwo ohokoleela elapo ela mwaavanghaanyu makholowaaya ni wa esidade muthanlalaanyu ni Empa ya Yave kitekenlaaka Nsinananyu,

⁴⁹vano mwiiwe wiirimu munkhalaanyuwo nivekelonaya ni odyoonttelelawaya, mwaakihaka mulattwaaya.

⁵⁰Mulevelele mulokwaanyu wootthekenleni; mulevelele soonanara sootheene woopakenlaayani ni muceendye mirima sa amwiittanaaya weera emorele ikharari.

⁵¹Muupuwelele weeratho ti mulokwaanyu ni yoohiyeraanyu mwa yoowo mukhumihalalaanyu wExipitu, mmavihoni.

⁵²Maithwaanyu ewehawehe mavekelo a murumeiyaanyu ni a mulokwaanyu aYixrayeli ni Ngwiiweke yaawo yoodyoonttelelakani.

⁵³Vano ti Nyuwo Yave Muluku muthanlale variyari wa miloko sootheene sa elapo ya vathi weera okhale yoohiyeraanyu, ntoko mweenraanyu mwa murumeiyaanyu Moisesi, mwaakhumihaleene makholowaahu wExipitu.”

⁵⁴Salomoni amalihakaru soovekela ni soodyoonttelela sootheene iye wa Yave, aaheemela ohoolo wa altaari* a Yave, mwa weiwo aakokhonraawe atheteelaka matataawe wiirimu.

⁵⁵Aaheemela, anareeliha muthukumano wootheene, akhuwelaka:

⁵⁶“Yave atthapeliwe, mwa Yoowo ovanghe mulokwaawe aYixrayeli wiitthuuwa, ntoko aaroromelinghaawe. Ookwanihera soororomeliha sooreera sootheene aavanghaawe mwa murumeiyaawe Moisesi.

⁵⁷Yave Mulukwaahu akhaleke ni hiyo ntoko aaraawe ni makholowaahu; Owo ahinihiye naari ahinithaame.

⁵⁸Owo aceendye mirimasahu weera neette ntoko ontthunaawe ni niiwelele malamulowaawe, ikanosawe ni soolamulasawe aavanghaawe makholowaahu.

⁵⁹Masu ala kivekenlaaka vamaithoni wa Yave ekhaleke vakhiviru wa Yave Mulukwaahu ohiyu ni othana weera alipihere mulattu wa murumeiyaawe ni mulokwaawe aYixrayeli ntoko sootthuneya sa khula nihuku.

⁶⁰Hiiho miloko sootheene sa elapo ya vathi sinoosuwela weera Yave ti Muluku ni khoowowo muluku mukina.

⁶¹Ontthuneya weera mirimasanyu sikhaleke sa Yave Mulukwaahu. Mwiiwelele ikanosawe ni malamulowaawe mahuku ootheene ntoko mumpakaanyu olelo.”

⁶²Vahoolowaya mwene ni aYixrayeli ootheene yaapaka sooveleela vamaithoni wa Yave.

⁶³Salomoni aampakela sooveleelela murettele Yave — imombe 22 000 ni ikhondoolo ni ipuri 120 000. Hiiho mwene ni aYixrayeli ootheene yaari vaavaale yaatteeliha Empa ya Yave.

⁶⁴Nihuku nenenenne mwene aatteeliha mpatta wa nipuwa ohoolo wa Empa ya Yave anapakawo sooveleela soohisa, sa etrigu ni sooneneva sa sooveleelela murettele, niwoko altaari* a ebronze* ohoolo wa Yave yaayevaxa, ohikwanaka opakelawo sooveleela soohisa, sa etrigu ni sooneneva sa sooveleelela murettele sootheene.

⁶⁵Mweehuhuni yeele Salomoni ni aYixrayeli ootheene aapaka efesta. Waakhala muthukumano mutokotoko; atthu yaarwa okhuma oLebo-Hamati mpaka nxaapwa na wExipitu. Yaapaka efesta vamaithoni wa Yave Mulukwaahu wa mahuku muloko ni maxexe.

⁶⁶Oxaawaya Salomoni aalamulela muloko ohokoleela mmawannyaaya. Muloko waamureeliha mwene, onarowa woohakalaleene mmirimanimwaya niwoko na itthu sooreera sootheene Yave aampakenlaawe murumeiyaawe Davide ni wa mulokwaawe aYixrayeli.