Read Makhuwa-Shirima 2 Mamwene 1 Bible Online

2 Mamwene 1 - Makhuwa-Shirima bible

2 Mamwene 1

¹Ahabi akhwaakaru, aMowabi yaahaavaanya aYixrayeli.

²Vano nihuku nimoha Ahaziya aamora vaxanelani ya ekwartwaawe ya osulu oSamariya, anavulalaxa. Aahaarumiha anamitthenga aweerelaka: “Murowe, mwamukoherere Bahali-Zebubi, muluku a wEkeroni kaariki kilame eretta ela.”

³Vanonto ndyelo a Yave aamweerela Eliya, muTixebi: “Murowe, mwaakumaneno anamitthenga a mwene a oSamariya, mwaakohaka: ‘Apaale Khoowowo muluku oYixrayeli nyuwosa murowaka omukoherera Bahali-Zebubi, muluku a wEkeroni?’

⁴Vano, Yave oneera ha: ‘Nyuwo khamulama. Vekhaikhai, munimookhwa!’” Vahoolowaya Eliya aapwaha.

⁵Anamitthenga ehokoleelaka wa mwene, owo aahaakoha: “Heeni muhokolongwaanyu?”

⁶Awosa yaamwaakhula: “Mulopwana mmoha oonikumanano, ananeerela: ‘Muhokoleele wa mwene oorumingheni ni mwamuleele: “Yave oneera ha: Apaale Khoowowo muluku oYixrayeli nyuwosa murowaka omukoherera Bahali-Zebubi, muluku a wEkeroni? Tivawo nyuwo muneeraanyu muhilame. Vekhaikhai, munimookhwa!” ’ ”

⁷Mwene aahaakoha: “Mulopwana munkumanannaanyu ooleenleni yeeyo ti ooweera hai?”

⁸Awosa yaamwaakhula: “Owo owanre ekuwo ya exapala iiphitelenleene laamba a exapala.” Ahaziya aawaakhula: “Ti Eliya, muTixebi.”

⁹Vano mwene aamurumiha mutokweene a anakhotto miloko mithanu vamoha ni anakhottwaawe omwaasa Eliya. Mutokweene ole aamphwannye Eliya akilaantheene vasulu nttumuxa, anamweerela: “Mulopwana a Muluku mwene onoolamulani: ‘Mukhuruwe!’”

¹⁰Eliya aamwaakhula mutokweene ole: “Miyo kaareene mulopwana a Muluku, okhuruwe mooro wiirimu woohiseeni nyuwo ni anakhottwaanyu miloko mithanu!” Vano mooro waakhuruwa wiirimu, onamuhisa mutokweene ni anakhottwaawe.

¹¹Mwa yeeyo mwene aamurumiha mutokweene mukina a anakhotto miloko mithanu vamoha ni anakhottwaawe omwaasa Eliya. Mutokweene ole aamweerela: “Mulopwana a Muluku mwene onlamulela weera mukhuruwe woowaakuveya!”

¹²Eliya aamwaakhula mutokweene ole: “Miyo kaareene mulopwana a Muluku, okhuruwe mooro wiirimu woohiseeni nyuwo ni anakhottwaanyu miloko mithanu!” Vano mooro waakhuruwatho wiirimu, onamuhisa mutokweene ni anakhottwaawe.

¹³Vanonto mwene aamurumiha mutokweene anaararu a anakhotto miloko mithanu vamoha ni anakhottwaawe omwaasa Eliya. Mutokweene ole aawela vanttumuxani, anamukokhorela Eliya, amudyoonttelelaka: “Dyoontte, mulopwana a Muluku, muureleke okumaaka ni okumi wa asilopwana miloko mithanu ala ari arumeiyaanyu!”

¹⁴Koosuwela weera mooro waahaakhuruwela wiirimu waahisaka asitokweene eeli oopacera ni anakhottwaaya ootheene. Vaheera muureleke okumaaka!”

¹⁵Ndyelo a Yave aamweerela Eliya: “Mukhuruwe ni yoowo. Muhimoove.” Tivawo Eliya aavennyaawe, anarowa ni yoowo wuuluma ni mwene.

¹⁶Aphiyakaru aamweerela mwene: “Apaale khoowowo muluku oYixrayeli nyuwosa murowaka omukoherera Bahali-Zebubi, muluku a wEkeroni? Tivawo muneeraanyu muhilame. Vekhaikhai, munimookhwa!”

¹⁷Vano Ahaziya aahookhwa ntoko Yave aahimalaawe mwa Eliya. Eenre Ahaziya ahikhalano mwaana mulopwana, Yorami aavariwa omwene. Eyo yeereiye vayaakhani yanaaveeli ya moolamulani mwa Yehorami, mwaana mulopwana a Yehoxafati, mwene a oYuda.

¹⁸Vano, mwaha wa sookhumelela sikina sa olamula wa Ahaziya ni sootheene aapankaawe — silempwale mulivuruni ya nyaha sa mamwene a oYixrayeli.