Read Makhuwa-Shirima 2 Mamwene 11 Bible Online

2 Mamwene 11 - Makhuwa-Shirima bible

2 Mamwene 11

¹Ataliya, amayawe Ahaziya oonakaru weera owo aahookhwa, aapacera ophwata emusi yootheene ya mwene.

²Vaheera Yehoxeba, mwaana muthiyana a mwene Yeworami ni murokoriye Ahaziya, aamukuxa Yowaxi, mwaana mulopwana a Ahaziya, mmoha a anamwane a mwene yeera yiiviwe. Aamwiikaathi mukwaartuni vamoha ni namakosoopaawe weera ahimoone Ataliya, ni hiiho khiiviwe.

³Saavinre iyaakha ithannamosa namakosoopaawe amwiipithihaka Mpaani mwa Yave, Ataliya alamulaka oYuda.

⁴Vayaakhani yanaathannapiili musaserdoti* Yoiyada aawiitthana asitokweene a anakupa a anakhotto ncira (yiitthaniwa aKarite), ni anamalipelela weera yamukumaneno Mpaani mwa Yave. Owo aawiiraanano aanyesererihaka ni nlipelo. Vahoolowaya aawoonihera mwaana mulopwana a mwene.

⁵Aahaalamulela: “Ontthuneya weera mpake ha: mwaavolowaka muteko nihuku na eSaabadu, mukuttula mmoha olipeleleke empa ya emwene.

⁶Mukuttula wanaaveeli walipeleleke vamulako wa Suri ni wanaararu vamulako ori wiithela wa mikuttula sikina. Iyo sarandelaneke olipelela Empa ya Yave.

⁷Vano mikuttula miili sikina iyo sihimvara muteko eSaabadu, silipeleleke Mpaani mwa Yave weera yaakhapelele amwene.

⁸Mweemeleke munrukureenreene mwene, khula mutthu ankunxeene kapwitthaawe. Yoowo aneera aattamele mmiseranimwanyu, iiviweke. Mwaahooleke amwene ankelaayawo.”

⁹Asitokweene a anakupa a anakhotto ncira yaapaka ntoko musaserdoti* Yoiyada, aalamulenlaawe. Khula mutokweene aahaakuxa asilopwanaawe aaronghaka wa musaserdoti* Yoiyada, okhuma yaale yaavolowa mpaka yaakhuma muteko eSaabadu.

¹⁰Vano aahaavaha asitokweene mavaka ni ixikudu* sa mwene Davide saari Mpaani mwa Yave.

¹¹Anamalipelela, ootheene ekunxeene ikapwitthi, yaaheemela emurukureenreene mwene mukerekhere altaari* Mpaani mwa Yave, okhuma mpatta wa ohitto mpaka wa ottuttuwani wa Empa ya Yave.

¹²Yoiyada aamukhumihera vaate Yowaxi, mwaana mulopwana a mwene, anamutthuka ecireemba, anamvaha elivuru ya wiiraana ni Muluku. Yaamvara omwene ni muloko omwiipelaka makuphi, okhuwelaka: “Mwene Woye!”

¹³Ataliya iiwakaru onyakula wa anamalipelela ni muloko, aarowa wa yaale, Empa ya Yave.

¹⁴Aamoonawo mwene eemenleene vanrimbuni, ntoko yaakhovelenlaaya. Asitokweene a anakhotto ni anamwiipa mapalapatta yaari mukerekhere mwene ni muloko wootheene waahakalalaxa wiiwaka oruma wa mapalapatta. Vano Ataliya aahaahula soowarasawe, anakhuwela: “Koovarihiwa! Koovarihiwa!”

¹⁵Yoiyada aahaalamulela asitokweene a anakhotto: “Munkhumihere vaate mumvirihaka mmiserani sa anakhotto ni mmwiive ni ekatana! Yoowo aneera amutthare iiviweketho!” Vanonto musaserdoti* aaheera: “Owo ahiiveliwe Mpaani mwa Yave!”

¹⁶Awo yaamvara enamurongha vanipuroni ikavalu* simvolowaaya mwa empa ya mwene enamwiivelamo.

¹⁷Vahoolowaya Yoiyada aapaka wiiraana variyari wa Yave, mwene ni muloko weera awosa ekhale muloko wa Yave. Aapakatho wiiraana variyari wa mwene ni muloko.

¹⁸Vahoolowaya atthu ootheene yaarowa mpaani mwa Bahali*, enakurumula. Yaahaapwexakasa altaari* ni icaambulo sa miluku, enamwiiva Matani, musaserdoti* a Bahali* ohoolo wa altaari*. Vahoolowaya Yoiyada aawiikaathi anamalipelela a Empa ya Yave.

¹⁹Aahaakuxa ni yoowo asitokweene a nakupa a ncira, aKariti, anamalipelela, ni atthu ootheene a elapo, anamweettiha mwene okhuma Empa ya Yave mpaka empa ya emwene eviraka vamulako wa anamalipelela. Vano mwene aakilaathi vahiceni ya emwene.

²⁰Muloko wootheene waahakalala ni esidade yaamaaleleya niwoko na okhwela wa Ataliya empa ya emwene.

²¹Yowaxi aapaceraawe olamula, aarino iyaakha ithannapiili sa oyariwawawe.