Read Makhuwa-Shirima 2 Mamwene 12 Bible Online

2 Mamwene 12 - Makhuwa-Shirima bible

2 Mamwene 12

¹Yowaxi aathatuwa mwene vayaakhani yanaathannapiili moolamulani mwa Yehu, analamula oYerusaleemu iyaakha miloko mixexe. Nsina na amayawe naari Zibiya yaari oBerxeba.

²Yowaxi aapaka yeeyo yaari yooreera vamaithoni wa Yave iyaakha sootheene musaserdoti* Yoiyada, aamuxuttihaawe.

³Wa soothesene, khayaaphwatiwe mapuro ootteela a miluku sikina ni atthu yannapwaherera opakelawo sooveleela ni ohiserawo erubani*.

⁴Yowaxi aahaalamulela asaserdoti*: “Muthukumanyihe Mpaani mwa Yave eparatha* yootheene eruuhiwe ntoko sooveleela sootteeliheriwa Mpaani mwa Yave — eparatha* ekuxingwe onamalepelani, eparatha* yaakhelingwe mwa yoororomeliha ya atthu ni yeeyo eruuhiwe ni otthuna wa atthu.

⁵Asaserdoti* yaakheleleke eparatha* yootheene eyo evareliweke muteko woorehererela Empa ya Muluku mwemmo eneeraaya ephwanyaneyeke enananreene.”

⁶Vaheera vayaakhani yanaamiloko miili ni tthaaru moolamulani mwa mwene Yowaxi, asaserdoti* nlelo yeera ehinaaye oreherera Empa ya Yave.

⁷Tivawo mwene Yowaxi aamwiitthannaawe Yoiyada ni asaserdoti* akina, anaakoha: “Muhinrehererela heeni Empa ya Yave? Okhuma vaanaanova mpaka muhoolo muhikuxetho eparatha* ya omuhakhuni, mene evareliweke muteko wa orehererela Empa ya Yave paahi.”

⁸Asaserdoti* yaahaakhulela weera khayaarwa ekuxatho eparatha* ni weera awosa khayaarehereratho Empa ya Yave.

⁹Yoiyada aakuxa ekaaxa, anattuula ekhato vayookhuneelela. Aahiikaathi mukerekhere wa altaari*, moono mulopwana wa mulako wa Empa ya Yave. Asaserdoti* yaalipelela mulako wa Empa ya Yave yaahiikaathimo eparatha* yootheene yaaruuhiwa Empa ya Yave.

¹⁰Khula emaara yoonaaya weera yohaatta eparatha* mukaaxani, anamalepa a mwene ni mutokweene a asaserdoti* yannarwa, enaphima eparatha* yaaruuhiwa Mpaani mwa Yave, ehelaka mmasaakhoni.

¹¹Eparatha* ephimiweene, yinnyereriwa anamawehaweha a muteko woorasela Empa ya Yave. Awosa yannaaliva anamiteko yaavara muteko Mpaani mwa Yave: makalipinteiro, anamateka,

¹²mapatarero ni anamapwexa a maluku. Yannathumatho itthaabwa ni maluku ookheriwa sooraselano Empa ya Yave ethumakatho itthu sootheene sikina saatthuneya.

¹³Eparatha* yaaruuhiwa Mpaani mwa Muluku khayaavareliwa muteko woopakela ibasiya sa eparatha*, soorehererano mutthambo, ibasiya soovuuvihera, mapalapatta hoye hoye sakhalaru ikaruma sa eparatha* hoye hoye eyuuma yoorikaxa wa Empa ya Yave.

¹⁴Eparatha* ele yaavareliwa muteko woowaaliva anamiteko, mwa yaawosa yaavara muteko wa orasela Empa ya Yave.

¹⁵Khayaanyesereriwa waalikela eparatha* wa yaawo yaaliva anamiteko, niwoko yaari oororomeleya.

¹⁶Wa soothesene, eparatha* yaakheliwa ntoko sooveleelela nthowa ni soottheka khayaaroihiwa Mpaani mwa Yave; yaari ya asaserdoti*.

¹⁷Ehuhuweene yeele Hazayeli, mwene a awArami aarowa, anawanano oGati, anakuxa. Vahoolowaya aalakela owanano oYerusaleemu.

¹⁸Vaheera Yowaxi mwene a oYuda, aakuxa itthu sootheene sootteeliheriwa ni makholowaawe Yehoxafati, Yehorami ni Ahaziya, mamwene a oYuda, vamoha ni seiye owo muneenaawe aatteelihalaawe nitho eyuuma yoorikaxa yaaphwanyiwe omuhakhuni wa Empa ya Yave ni ya emwene. Aamurumihela sootheene iye Hazayeli, mwene a awArami. Vano owo aahiya owanano oYerusaleemu.

¹⁹Vano, mwaha wa sookhumelela sikina sa olamula wa Yowaxi — sootheene aapankaawe — silempwale mulivuruni ya nyaha sa mamwene a oYuda.

²⁰Asitokweenaawe yaamvaanelela, enamwiivela oBeti-Milo, mmuseweni onkela oSila.

²¹Asitokweene yamwiivale yaari Yozabadi, mwaana mulopwana a Ximeyati ni Yehozabadi, mwaana mulopwana a Xomeri. Aahookhwa, anavithiwa ni makholowaawe musidadeni mwa Davide. Mwanawe mulopwana, Amaziya ti aamurandenle.