Read Makhuwa-Shirima 2 Mamwene 14 Bible Online

2 Mamwene 14 - Makhuwa-Shirima bible

2 Mamwene 14

¹Amaziya, mwaana mulopwana a Yowaxi, mwene a oYuda aapacenre olamula vayaakhani yanaaveeli moolamulani mwa Yehowaxi, mwaana mulopwana a Yehowazi, mwene a oYixrayeli.

²Owo apaceraka olamula aarino iyaakha miloko miili niithanu sa oyariwawawe, analamula oYerusaleemu iyaakha miloko miili niithanniixexe. Nsina na amayawe naari Yehowadini a oYerusaleemu.

³Aapaka yeeyo yaari yooreera vamaithoni wa Yave, mene ohilikanaka ni nikholonawe Davide. Aatthara mweettelo wootheene wa atithawe Yowaxi.

⁴Wa soothesene, khayaaphwatiwe mapuro ootteela a miluku sikina ni muloko wannapwaherera opakelawo sooveleela ni ohiserawo erubani*.

⁵Oonaka weera omwenaawe woolipa, aawiiva asitokweene yaawiivale atithawe yaari mwene.

⁶Vaheera khaawiivale anamwane a anamwiiva, attharaka hiiho yeeyo elempwale mulivuruni ya nlamulo na Moisesi, mwa mwemmo Yave olamulenlaawe: “Ehiwiive asitiithi niwoko na soottheka sa anamwanaaya naari anamwane niwoko na soottheka sa atithaya. Khula mutthu iiviweke niwoko na sootthekasawe.”

⁷Ti yoowo aawinne awEdomi macira macireene muloko vanreyareyani na Maakha ni aakuxale esidade ya oSela mukhottoni. Vahoolowaya aatteha nsina na oYoketeyeli nri nsinanaya mpaka olelo.

⁸Vano Amaziya aamurumihela anamitthenga Yehowaxi, mwaana mulopwana a Yehowazi, mwaana mulopwana a Yehu, mwene a oYixrayeli, amutannyaka: “Ngwe niwane.”

⁹Vaheera Yehowaxi, mwene a oYixrayeli aamwaakhula Amaziya, mwene a oYuda: “Mwiri wa mwiiwa wa oLibanu woorumihela mutthenga wa mwiri wa Esedari* oLibanu: ‘Munthelihe mwaninyu ni mwanaka.’ Vano mwaamunama a ntuphini a oLibanu ohoorwa, ananyikala mwiri wa mwiiwa.

¹⁰Mohaawina awEdomi ni vano munimwiixoona. Muupuwelele owinawanyu, mene mukhaleke owaani! Nyuwo muniitannyera oyevihiwa ni yeeyo enimoohelani nthala nyuwo ni oYuda.

¹¹Wa soothesene, Amaziya, mwene a oYuda khaatthunne omwiiwa ni Yehowaxi, mwene a oYixrayeli aangwanano. Owo ni Amaziya, mwene a oYuda yaawanasa oBeti-Xemexi, elapo ya oYuda.

¹²Anakhotto a oYuda yaawiniwa ni aYixrayeli ni anakhottwaaya yaatthawela mmawannyaya.

¹³oBeti-Xemexi Yehowaxi, mwene a oYixrayeli, aamvara Amaziya, mwene a oYuda, mwaana mulopwana a Yowaxi, mwaana mulopwana a Ahaziya. Vano Yehowaxi aarowa oYerusaleemu, anaphwata exiraaya okhuma mulako wa Efrayimi mpaka mulako wa onloothoni — wookwanaka imeetru* macira meeli.

¹⁴Aakuxa eyuuma yoorikaxa yootheene, eparatha* ni ikaruma sootheene saari Mpaani mwa Muluku ni mihakhu sootheene sa empa ya emwene. Aahaakuxatho anamatthukiwa akina, anahokoleela oSamariya.

¹⁵Vano, mwaha wa sookhumelela sikina sa olamula wa Yowaxi — sootheene aapankaawe ni soowerasawe sootheene nitho ongwananawawe Amaziya, mwene a oYuda — silempwale mulivuruni ya nyaha sa mamwene a oYixrayeli.

¹⁶Yehowaxi, aahookhwa, anavithiwa oSamariya vamoha ni mamwene a oYixrayeli. Mwanawe mulopwana Yerobowami ti aamurandenle.

¹⁷Amaziya, mwaana mulopwana a Yowaxi, mwene a oYuda aakhalatho ni okumi iyaakha muloko niithanu akhwiiyeene Yehowaxi, mwaana mulopwana a Yehowazi, mwene a oYixrayeli.

¹⁸Vano, mwaha wa sookhumelela sikina sa olamula wa Amaziya — silempwale mulivuruni ya nyaha sa mamwene a oYuda.

¹⁹Atthu yaamvaanelela omwiiva oYerusaleemu Amaziya, anatthawela oLakixi. Vaheera amwiittanaawe yaamuttharelela, enamwiivelawo.

²⁰Muttembwaawe waahokoloxeriwa ni ekavalu* oYerusaleemu, enavithasa vamoha ni makholowaawe musidadeni mwa Davide.

²¹Vano muloko wootheene wa oYuda waamvara omwene Azariya vanipuroni na atithawe. Owo aarino iyaakha muloko niithannamosa aarandelaawe atithawe Amaziya.

²²Ti yoowo aawinnetho anarasela esidade ya wElati, elapo ya oYuda ekhwiyeene atithawe Amaziya.

²³Yerobowami, mwaana mulopwana a Yehowaxi, mwene a oYixrayeli, aathatuwa mwene a oSamariya vayaakhani yanaamuloko niithanu moolamulani mwa Amaziya, mwaana mulopwana a Yowaxi, mwene a oYuda. Yerobowami aalamula oYerusaleemu iyaakha miloko mixexe niimoha.

²⁴Aapaka yoonanara vamaithoni wa Yave ahihiyakaru soottheka sa Yerobowami, mwaana mulopwana a Nebati, mwa seiye aatthekihalaaweno aYixrayeli.

²⁵Ti yoowo aahokoloxenre nyiinano sa oYixrayeli okhuma oLebo-Hamati mpaka Ephareiya ya wAraba, akwaniheraka hiiho masu a Yave, Muluku a aYixrayeli yaalaleiwale ni murumeiyaawe Yonasi, mwaana mulopwana a Amitai, mprofeeti a oGati-Heferi.

²⁶Yave aahoona ohaawa ni othanana wa aYixrayeli ootheene — sikhalaka ipottha hoye hoye maneethi; khaariworu oowaakhavihera.

²⁷Eenre Yave aheera weera onoomalamaliha nsina na oYixrayeli mweelaponimu, aawoopola aYixrayeli amvarelaka muteko Yerobowami, mwaana mulopwana a Yehowaxi.

²⁸Vano, mwaha wa sookhumelela sikina sa olamula wa Yerobowami — sootheene aapankaawe ni ikhottosawe sootheene nitho moota aawoopolenlaawe aYixrayeli oDamasku ni oHamati waari wa oYawudi — oolempwale mulivuruni ya nyaha sa mamwene a oYixrayeli.

²⁹Yerobowami aahookhwa anavithiwa ni makholowaawe, mamwene a oYixrayeli. Vano mwanawe mulopwana, Zakariya ti aamurandenle.