Read Makhuwa-Shirima 2 Mamwene 15 Bible Online

2 Mamwene 15 - Makhuwa-Shirima bible

2 Mamwene 15

¹Azariya, mwaana mulopwana a Amaziya, mwene a oYuda aapacenre olamulawawe vayaakhani yanaamiloko miili niithannapiili ya olamula wa Yerobowami, mwene a oYixrayeli.

²Azariya, apaceraka olamula aarino iyaakha muloko niithannamosa, analamula oYerusaleemu iyaakha miloko mithanu ni piili. Nsina na amayawe naari Yekoliya a oYerusaleemu.

³Aapaka yeeyo yaari yooreera vamaithoni wa Yave, ntoko yaapankaaya atithawe Amaziya.

⁴Wa soothesene, khaaphwante mattumuxa ootteeliheriwa miluku sikina ni atthu yannapwaherera opakawo sooveleela ni ohisawo erubani*.

⁵Yave annamuhooxa mwene ni makokho mpaka nihuku na okhwawawe ni ehuhu yootheene aakhala empaawe meekhaawe. Yotami, mwaana mulopwana a mwene, ti aawehaweha empa ya mwene, alamulaka muloko.

⁶Vano, mwaha wa sookhumelela sikina sa olamula wa Azariya — sootheene aapankaawe — oolempwale mulivuruni ya nyaha sa mamwene a oYuda.

⁷Azariya aahookhwa, anavithiwa ni makholowaawe musidadeni ya Davide. Mwanawe mulopwana, Yotami, ti aamurandenle.

⁸Zakariya, mwaana mulopwana a Yerobowami, aavariwa omwene wa oYixrayeli musidadeni ya oSamariya vayaakhani yanaamiloko miraru niithannatthaaru ya olamula wa Azariya, mwene a oYuda. Zakariya aalamunle nyeeri mithannamosa.

⁹Aapaka yoonanara vamaithoni wa Yave, ntoko atithawe yaapankaaya. Khaahingye soottheka sa Yerobowami, mwa yoowo aatthekinghe aYixrayeli.

¹⁰Xalumi, mwaana mulopwana a Yabexi, aamvaanelela Zakariya. Aamuwanano vamaithoni wa muloko, anamwiiva, anamurandela.

¹¹Vano, mwaha wa sookhumelela sikina sa olamula wa Zakariya oolempwale mulivuruni ya nyaha sa mamwene a oYixrayeli.

¹²Hiiho yaakwaniheriwa masu Yave aamuleenlaawe Yehu: “Ekhapiraanyu enoolamula oYixrayeli mpaka ekhapira yanaaxexe.”

¹³Xalumi, mwaana mulopwana a Yabexi, aavariwa omwene wa oYixrayeli vayaakhani yanaamiloko miraru niithanniixexe ya olamula wa Uziya, mwene a oYuda, ni aalamula oSamariya mweeri mmoha.

¹⁴Vano Menahemi, mwaana mulopwana a Gadi, aattimula oTireza arowaka oSamariya. Aamuwanano Xalumi, mwaana mulopwana a Yabexi oSamariya, anamwiiva, anamurandela.

¹⁵Vano, mwaha wa sookhumelela sikina sa olamula wa Xalumi nitho ovaanelelawawe oolempwale mulivuruni ya nyaha sa mamwene a oYixrayeli.

¹⁶Ehuhuweene yeele Menahemi apaceraka oTireza, aawanano oTipexa ni amaki ootheene yaari musidadeni ni a mukhwipimwaya niwoko na okhootta ohula milakosaya. Aahuhula oTipexa ni mpaka aahaaphula asithiyana oorupala.

¹⁷Menahemi, mwaana mulopwana a Yabexi aavariwa omwene wa oYixrayeli vayaakhani yanaamiloko miraru niithanniixexe ya olamula wa Azariya, mwene a oYuda. Menahemi aalamunle oSamariya iyaakha muloko.

¹⁸Aapaka yoonanara vamaithoni wa Yave. Mweehuhuni yootheene ya olamulawawe Khaahingye soottheka sa Yerobowami, mwaana mulopwana a Nebati, mwa yoowo aatthekinghe aYixrayeli.

¹⁹Vano Puli, mwene a wAsiriya, aavolowa mweelaponi ni Menahemi aamvaha italentu* macira muloko sa eparatha* weera amukhavihere ni weera aamutthunihere opwaherera olamula oYixrayeli.

²⁰Menahemi aahaanyesereriha aYixrayeli oliva musoko ole. Khula namapuha waatthuneya omuliva mwene a wAsiriya italentu* sa eparatha* miloko mithanu. Vano mwene a wAsiriya aahokoleela elapwaawe, ahiyaka waakamela elapo ya oYixrayeli.

²¹Vano, mwaha wa sookhumelela sikina sa olamula wa Menahemi — sootheene aapankaawe — oolempwale mulivuruni ya nyaha sa mamwene a oYixrayeli.

²²Menahemi aahookhwa ni mwanawe mulopwana, Pekahiya, ti aamurandenle.

²³Pekahiya, mwaana mulopwana a Menahemi, aavariwa omwene wa oYixrayeli vayaakhani yanaamiloko mithanu ya olamula wa Azariya, mwene a oYuda. Pekahiya aalamunle oSamariya iyaakha piili.

²⁴Aapaka yoonanara vamaithoni wa Yave. Khaahingye soottheka sa Yerobowami, mwaana mulopwana a Nebati, mwa yoowo aatthekinghe aYixrayeli.

²⁵Mmoha a asitokweenaawe, Peka, mwaana mulopwana a Remaliya, aamvaanelela yoowo. Aahaarowano oGiliyade asilopwana miloko mithanu, anamwiiva Pekahiya nitho Aregobi ni Ariye vanipuroni noolipiheriwa mpaani mwa mwene oSamariya. Hiiho Peka aamwiiva Pekahiya, anamurandela.

²⁶Vano, mwaha wa sookhumelela sikina sa olamula wa Pekahiya — sootheene aapankaawe — oolempwale mulivuruni ya nyaha sa mamwene a oYixrayeli.

²⁷Peka, mwaana mulopwana a Remaliya, aavariwa omwene wa oYixrayeli vayaakhani yanaamiloko mithanu ni piili ya olamula wa Azariya, mwene a oYuda. Peka aalamunle oSamariya iyaakha miloko miili.

²⁸Aapaka yoonanara vamaithoni wa Yave. Khaahingye soottheka sa Yerobowami, mwaana mulopwana a Nebati, mwa yoowo aatthekinghe aYixrayeli.

²⁹Mweehuhuni ya olamula wa Peka, mwene a oYixrayeli, Tigelati-Pileseri, mwene a wAsiriya, aavolowa, anakuxa wIyoni, wAbeli-Beti-Mahaka, oYanowa, oKedexi ni oHazori. Aakuxatho oGiliyadi ni oGalileya vamoha ni elapo yootheene ya oNafitali, anaavara atthu aaronghaka wAsiriya.

³⁰Vano Hoxeya, mwaana mulopwana a Ela, aamvaanelela Peka, mwaana mulopwana a Remaliya. Aangwanano, anamwiiva, anamurandela vayaakhani yanaamiloko miili ya olamula wa Yotami, mwaana mulopwana a Uziya.

³¹Vano, mwaha wa sookhumelela sikina sa olamula wa Peka — sootheene aapankaawe — olempwale mulivuruni ya nyaha sa mamwene a oYixrayeli.

³²Yotami, mwaana mulopwana a Uziya, aavariwa omwene wa oYuda vayaakhani yanaaveeli ya olamula wa Peka, mwaana mulopwana a Remaliya, mwene a oYixrayeli.

³³Azariya, apaceraka olamula aarino iyaakha miloko miili niithanu, analamula oYerusaleemu iyaakha muloko niithannamosa. Nsina na amayawe naari Yeruxa, mwaana muthiyana a Zadoki.

³⁴Aapaka yeeyo yaari yooreera vamaithoni wa Yave, ntoko yaapankaaya atithawe Uziya.

³⁵Wa soothesene, khaaphwante mattumuxa ootteeliheriwa miluku sikina ni atthu yannapwaherera opakawo sooveleela ni ohisawo erubani*. Yotami aarasela mulako mutokweene wa Empa ya Yave.

³⁶Vano, mwaha wa sookhumelela sikina sa olamula wa Yotami — sootheene aapankaawe — oolempwale mulivuruni ya nyaha sa mamwene a oYuda.

³⁷Ehuhuweene yeele Yave aapacera omutannya Resini, mwene a awArami ni Peka, mwaana mulopwana a Remaliya weera ewaneno oYuda.

³⁸Yotami aahookhwa, anavithiwa ni makholowaawe musidadeni ya atithawe Davide. Mwanawe mulopwana Ahazi, ti aamurandenle.