Read Makhuwa-Shirima 2 Mamwene 17 Bible Online

2 Mamwene 17 - Makhuwa-Shirima bible

2 Mamwene 17

¹Hoxeya, mwaana mulopwana a Ela, aavariwa omwene wa oYixrayeli vayaakhani yanaamuloko ni piili ya olamula wa Ahazi, mwene a oYuda. Hoxeya aalamula oSamariya iyaakha ithanniixexe.

²Aapaka yoonanara vamaithoni wa Yave, mene khawaalikana ni mamwene a oYixrayeli yaalamula owo ahinaaye.

³Xalemaneseri, mwene a wAsiriya, aarowa omuwanano Hoxeya aari mpatta wa omwenaawe ni aamuliva musoko.

⁴Vaheera mwene a wAsiriya aahoonelela weera Hoxeya aari namavariha, niwoko aamurumihela So, mwene a wExipitu, anamitthenga ni aahiya omulivela musoko, ntoko aakhovelenlaawe oliva khula eyaakha. Tivawo Xalemaneseri aamutthukihalaawe, anamvonyera okaliposo.

⁵Mwene a wAsiriya aavolowa elapo yootheene, anarowa oSamariya, anarica wa iyaakha tthaaru.

⁶Mwene a wAsiriya aakuxa oSamariya vayaakhani yanaathannaaxexe ya olamula wa Hoxeya, anaavarela aYixrayeli wAsiriya. Aahaatekiha oHala, elapo ya oGozani, mukerekhere mooloko Habori ni mmittettheni sa oMedesi.

⁷Sootheene seiye seereiye niwoko aYixrayeli yaamutthekela Yave Mulukwaaya, mwa Yoowo aakhumihale wExipitu yaalamuliwaayamo ni ikuru sa Farawu*, mwene a wExipitu. aYixrayeli yaalapa miluku sikina,

⁸ettharihaka mweettelo wa miloko sikina, mwa seiye Yave oomonlaawe ohoolowaya nitho ikhovelelo mamwene a oYixrayeli yaapakelenlaaya.

⁹Muxiirini aYixrayeli yaampakela Yave Mulukwaaya itthu soonanara. Yaateka mapuro a olapa miluku sikina mmasidadenimwaya sootheene — okhuma itoore* yeemelaayawo anamalipelela mpaka isidade soolipihiwaxa.

¹⁰Aahiikaathi maluku ootteeliheriwa ni amarimbu a muluku muthiyana Axera mmattumuxani ootheene ni vathi wa nyiri soohiyanahiyana.

¹¹Yaahisa erubani* mmattumuxani ootteeliheriwa miluku sikina, ntoko saapakaaya miloko oomonlaawe Yave ohoolowaya. Yaapaka itthu soonanara mwa seiye saatannyale isara sa Yave.

¹²Yaalapa miluku sikina Yave aarooweerelaru: “Muhipake yeeyo!”

¹³Yave aahooperera oYixrayeli ni oYuda mwa maprofeetaawe ni anamooniheraawe* ootheene: “Muhiye iphirosanyu soonanara. Mwiiwelele ikanosaka ni malamulowaaka, muttharaka Nlamulo nootheene kaalamulenlaaka makholowaanyu wiiwelela ni koovanghaakani mwa arumeiyaaka maprofeeti.”

¹⁴Wa soothesene, khayaatthunne owiiwa ni yaari oottiyamaaru ntoko makholowaaya, mwa yaale yahaamuroromenle Yave Mulukwaaya.

¹⁵Yaakhootta ikanosawe ni wiiraana aapankaawe ni makholowaaya nitho soowoopererasawe. Yaatthara miluku soohimuteko ethatuwaka asineenaaya oohimuteko. Yaatakiha miloko saarukureenre, Yave aarooweerelaru: “Muhitakihe.”

¹⁶Aahiya malamulo ootheene a Yave Mulukwaaya, eniipakela miluku miili ni ekhalelo ya mwaamombe a eseeta, nitho nrimbu nimoha nootteeliheriwa Axera. Aakokhorela oohoolo wa ithenyeeri sa wiirimu, enamulapa Bahali*.

¹⁷Yaahaahisa ntoko yooveleela asinamwanaaya asilopwana ni asithiyana. Yaaheettelasa ihako ni sa okhwiri, yiithumihaka weera epake soonanara vamaithoni wa Yave, enatannya isarasawe.

¹⁸Tivawo isara sa Yave saapattenlaaya aYixrayeli, anawoomola vamaithoniwawe. Yaahanle epuumba ya Yuda paahi,

¹⁹mene hata yeeyo khayiiwelenle malamulo a Yave Mulukwaaya. Yaatthara ikhovelelo soonanara aYixrayeli yaapakelenlaaya.

²⁰Tivawo Yave aahingyaawe aYixrayeli ootheene; aahaahooxa, awinnyereraka mmatatani mwa anamahuhula mpaka owoomola vamaithoniwawe.

²¹Vahoolo woomwalamwaliha oYixrayeli ni omwene wa Davide, atthu a oYixrayeli yaamvara omwene Yerobowami, mwaana mulopwana a Nebati. Yerobowami aahaahuluxa aYixrayeli omutthara Yave aapakihaka yoottheka etokotoko.

²²aYixrayeli yannapwaherera mootthekani moothemwene mwa Yerobowami. Khayaahulungweru

²³mpaka Yave aawoomonlaawe vamaithoniwawe, ntoko aawooperenraawe mwa arumeiyaawe maprofeeti ootheene. Hiiho atthu a oYixrayeli yaavenxiwa mweelaponimwaya enaronghiwa elapo ya wAsiriya, mwa weiwo ankhalaayawo mpaka olelo.

²⁴Mwene a wAsiriya aahaaruuha atthu a oBabiloniya, oKuta, wa Awa, oHamati ni oSefarevayimi, anaatekiha mmittettheni sa oSamariya yaarandelaka aYixrayeli. Awosa yaahaakamela oSamariya enamaka mmittetthenimwaya.

²⁵Epaceraka omakawo khayaamulapa Yave, tivawo Owo aaruminghaawe amwatto variyariwaya ni ale yaawiiva akina-akina a amaki ale.

²⁶Mwene a wAsiriya aaleeliwa: “Atthu nyuwo mwaaruuhalaanyu ni mwaatekinghaanyu mmittettheni sa oSamariya khaasuwenle yeeyo Muluku a elapo eyo onnyesererihaawe. Owo ohaarumiha amwatto variyarwaya ni alesa anniwiiva, niwoko atthu a weiwo khaasuwenle yeeyo Muluku a elapo eyo onnyesererihaawe.”

²⁷Vano mwene a wAsiriya aalamula ha: “Munghokoloxere mmoha a asaserdoti* mwaavanraanyu oSamariya weera akhalewo ni weera aaxuttihe atthu yeeyo Muluku a elapo eyo onnyesererihaawe.”

²⁸Hiiho mmoha a asaserdoti* yaavariwe oSamariya aahokoleela, anakhala oBeteli, anaaxuttiha atthu moota woomulapa Yave.

²⁹Waarookhalaru hiiho, khula muloko waahiipakela milukusaya mmittettheni yiitekinghaaya, oniikaathi mmattumuxani ootteeliheriwa miluku sikina aYixrayeli yaapankaaya yaaraaya oSamariya.

³⁰aBabiloniya yaapaka oSukoti-Benoti; aKuta yaapaka oNeregali ni aHamati yaapaka wAxima;

³¹awAwa yaapaka oNibehazi ni oTaretaki ni aSefarevayimi yaapakela milukusaya Adrameleki ni Anameleki sooveleela soohisa yaahisaka anamwanaaya.

³²Awo yaamulapa Yave, vaheera akhalaru mutthu yaamunkhaliha musaserdoti* weera arumeele mmattumuxani ootteeliheriwa milukusaya.

³³Yaamulapa Yave, mene yaalapatho milukusaya ettharaka ikhovelelo sa miloko yaaruuhiwaayamo.

³⁴Mpaka olelo annapwaherera ni olapawaya wa khalayi. Khaanimulapa Yave, hata khaaniiwelela ikano, sootthuna, malamulo, hata sooruma mwa seiye Yave aavanghaawe ekhapira ya Yakobe, mwa yoowo Yave aamuttenghaawe Yixrayeli.

³⁵Yave akhalihaka wiiraana ni aYixrayeli, aahaalamulela: “Muhilaperu miluku sikina naari muhikokhorele ohoolowaya, muhirumeele, hata muhipakele sooveleela.

³⁶Vaheera munlape paahi Yave, mwa Yoowo ookhumihaleni wExipitu ni ikuruxa ni moono wooweraxa. Munkokhorele Yooworu ni mumpakele sooveleela.

³⁷Mwiiwelele nnenesene ikano, sootthuna, malamulo ni sooruma Owo oolepenlaaweni. Muhilape miluku sikina.

³⁸Muhittiwale wiiraana kipankaaka ni nyuwo. Muhilape miluku sikina.

³⁹Ohiyanawaya, munlape Yave Mulukwaanyu. Ti Yoowo ongwoopolani mmatatani mwa amwiittanaanyu ootheene.”

⁴⁰Wa soothesene, awo khayaamwiiwelenle, mene yannapwaherera ni mitekosaya sa khalayi.

⁴¹Naari miloko iye saamulapeene Yave, sannalapatho milukusaya. Mpaka olelo anamwanaaya ni ikhapirasaya annapwaherera opaka ntoko yaapankaaya makholowaaya.