Read Makhuwa-Shirima 2 Mamwene 19 Bible Online

2 Mamwene 19 - Makhuwa-Shirima bible

2 Mamwene 19

¹Mwene Hizekiya iiwakaru yeeyo, aahaahula ikuwosawe, anawara sowiinanelano, anavolowa Mpaani mwa Yave.

²Aamurumiha Eliyakimi, namareherera empa ya emwene; Xebena, namalepa, ni asitokweene a asaserdoti* — ootheene ewanreene isaakho — wa Yesaya, mwaana mulopwana a Amozi.

³Awosa yaamweerela: “Hizekiya oneera ha: Olelo ti nihuku na othanana, ohiihiwa ni oyevihiwa. Nri ntoko muthiyana ohanle vakhaani oyara ahikhanleno ikuru sooyarano.

⁴Enoowereya weera Yave Mulukwaanyu ohiiwa masu ootheene a mutokweene a anamalaka, mwa yoowo pwiiyaawe, mwene a wAsiriya, aamurumihalaawe omutheya Muluku Mukumi. Yave Mulukwaanyu amuttaruxe niwoko na masu ale. Tivawo, munidyoonttelelele Muluku hiyo nihanle ni okumi.”

⁵Asitokweene a mwene Hizekiya ephiyakaru wa Yesaya,

⁶owo aaweerela: “Mwamuleele pwiiyaanyu: ‘Yave oneera ha: Muhoove yeeyo mwiiwalaanyu — masweene yaale murumeiyi a mwene a wAsiriya okiveihalaaweno.

⁷Mwiiwe, kinoomwiiwiha mwene a wAsiriya mutthenga oneera omutthikihere elapwaawe. Aaphiyakawo, kinoopakiha weera iiviwe.’”

⁸Mutokweene a anamalaka a mwene iiwakaru weera mwene a wAsiriya aattimula oLakixi, owo aahokolowatho, anamphwanya mwene awananakano oLibena.

⁹Vano Senakeribi aahaakhela mutthenga weera Tirehaka, muKuxi, mwene a wExipitu, eera arwaaka weera angwaneno yoowo. Tivawo aamurumihenlaawetho Hizekiya anamitthenga emweerelaka:

¹⁰“Mwamweerele Hizekiya, mwene a oYuda: Muhimuhiye Muluku, mwa Yoowo munimuroromelaanyu, oolokotthakani, Owo aweerelakani: ‘oYerusaleemu khoowiniwa ni mwene a wAsiriya.’

¹¹Vekhaikhai, mohiiwa seiye mamwene a wAsiriya yaapakenlaaya ilapo sikina, ephwataka woomalela. Munuupuwela weera munimoopoliwa?

¹²Miluku sa miloko — miluku sa oGozani, oHarani, oRezefi ni sa atthu a wEdeni yaari oTeli-Asayiri — saaphwatiwa ni makholowaaka sihiweraka otapuxa.

¹³Ori woowi mwene a oHamati; mwene a wArepadi; mwene a esidade ya oSefarevayimi; mwene a oHena hoye hoye a wIwa?”

¹⁴Hizekiya aahaakhela ekaratta wa anamitthenga, anasoma. Vano aavolowa Mpaani mwa Yave, anatapuruxa vamaithoni wa Yave.

¹⁵Hizekiya aamvekela Yave: “Ii! Yave, Muluku a aYixrayeli, mukilaathiye variyari wa akerubini*, ti Nyuwo paahi muri Muluku a mamwene ootheene a elapo ya vathi. Moopattuxa wiirimu ni vathi.

¹⁶Ii! Yave mwiiwe ni moone. Mwiiwe mutthenga Senakerebi orumihalaawe weera amuveihe Muluku Mukumi.

¹⁷Ii! Yave Ettiitthu weera mwene a wAsiriya aaphwata milokosene seiye ni ilaposaya.

¹⁸Aavonyera milukusaya mmooroni, aphwataka, niwoko khasaahiyono miluku, mene nyiri ni maluku paahi ookheriwa ni atthu.

¹⁹Vano Yave Mulukwaahu, munitapuxe mmatatanimwawe weera omwene wootheene wa elapo ya vathi osuwele weera Nyuwo, Yave, ti Muluku.”

²⁰Vanonto Yesaya, mwaana mulopwana a Amozi, aamurumihela Hizekiya mutthenga ola: “Yave, Muluku a aYixrayeli oneera ha: Kohiiwa nivekelonanyu mwaha wa Senakeribi, mwene a wAsiriya.

²¹Masu Yave omuulumenlaawe yoowo ti ala: ‘Mwaamwali oowiikosoopa oSiyoni ohooveihani ni ohootthebwani apukunyaka muru. Mwaana muthiyana a oYerusaleemu ompukunya muru nyuwo mutthawaka.

²²Munruwanne taani? Mumveihale taani? Mwaakhuwelenle taani? Mungwehexexaka ngwiixoonani? Ti Ootteela a oYixrayeli!

²³Aani, moomuruwana Yave mwa anamitthengaanyu. Mweenre: “Koowela mmattumuxani a nyaako ni ikaarosaka sincipale sa ikavalu*; aani mattumuxa oosulusulu a oLibanu. Kohuuha nyirisaya sa esedari* soorakamaxa; sooreerela sa nyirisaya. Koovolowa mweelaponimwanyu moorakamelaxa ni moothakoni wootikanela.

²⁴Koothipa ihime mweelaponi sa anamarwa ni koowurawo maahi. Kohuumiha nyooloko sootheene sa wExipitu ni inaawosaka.”

²⁵Khamusuwenle? Kaalakela yeeyo khalayi. Okhuma khalayi miyo kaavaanela yeeyo kinkhumelelihaaka vano — weera nyuwo munoohiya isidade soolipihiwaxa sireene milepe.

²⁶Amakaaya, ekhulumungweene, yaapororaxa ni wuulihiwa muru. Ari ntoko soomela sa ntuphini ni ntoko munyepu; ntoko malaxi ammela vampani enuuma ehikhomaanle.

²⁷Vaheera Miyo koosuwela muraanyuwo; ehuhu ya orowawanyu ni orwawanyu ni mwaakinyoonyeriwaka.

²⁸Niwoko na okinyoonyeriwawanyu ni wiixoonawanyu, kinimoohomani ni nimeso mphulanimwanyu ni yooweettiheriwa mwaamunama vayanoniwanyu koohokoloxerakani ephiro murweenlaanyu.’

²⁹Wa nyuwo, Hizekiya, kinimoovahani eneneero ela: Mutano munimooca soomorela ni mwaahiyu seiyo sineera siphuwe. Vaheera eyaakha yanaararu, mwaaleke ni muhepheke; mwaale imatta sa iwuuva* ni muce soowiimasaya.

³⁰Yaale ahanle a ekhapira ya Yuda eniiphuwele ntoko nyiri sinrakamelihaaya mikwankhwaarisaya ni iphandisaya siniima wusawusa.

³¹Vekhaikhai okhuma oYerusaleemu ni omwaako Siyoni eniihalahalemo akumi. Nthiti na Yave a ikuru sootheene nnookwanihera yeeyo.

³²Tivawo, Yave ommweerelaawe ha mwene a wAsiriya: ‘Khavolowa esidade ela hata khalathelamoru naari muupa. Khawanano ni exikudu* hata khateka yooricano.

³³Onoohokoleela ephiro orweenlaawe; khavolowa esidade ela, onghima Yave.

³⁴Kinimwaakiha esidade ela ni kinoovuluxa mwa osivelawaka ni wa murumeiyaaka Davide.’”

³⁵Ohiyuweene yoole, ndyelo a Yave aarowa yaakonenlaayawo Asiriya, anawiiva anakhotto 185 000. Oxaawaya evenyakaru akinaawo, yaaphwanya yaakonenlaayawo osareiyeene mittembo.

³⁶Vano Senakeribi, mwene a wAsiriya, aahuukulula iheemasawe, anapwaha. Aahokoleela oNinive, anakhalawo.

³⁷Nihuku nimoha owo alapaka mpaani mwa mulukwaawe Niseroki, anamwanaawe Adrameleki ni Xarezeri yaamwiiva, enatthawela elapo ya wArarati. Mwanawe Esarehadoni ti aamurandenle.