Read Makhuwa-Shirima 2 Mamwene 2 Bible Online

2 Mamwene 2 - Makhuwa-Shirima bible

2 Mamwene 2

¹Yave aatthunnaawe omuweliha Eliya wiirimu mpheyoni, Eliya ni Elixa yeera evenyaka oGiligali.

²Eliya aamweerela Elixa: “Muhaleke wenno — Yave ookirumiha oBeteli.” Wa soothesene, Elixa aamwaakhula: “Kinlipela mwa Nsina na Yave ni okumaanyu: nkoohiyani.” Vano yaarowa oBeteli.

³Nakupa a maprofeeti a oBeteli aamwaattamela Elixa, anamukoha: “Moosuwela weera Yave onoongweliha pwiiyaanyu olelo wiirimu oomwalamwalihakani ni nyuwo?” Elixa aamwaakhula: “Koosuwela, mene muhuulume yeeyo.”

⁴Vano Eliya aamweerela Elixa: “Muhaleke wenno; Yave ookirumiha oYeriko.” Wa soothesene, Elixa aamwaakhula: “Kinlipela mwa Nsina na Yave ni okumaanyu: nkoohiyani.” Vano yaarowa oYerkiko.

⁵Nakupa a maprofeeti oYeriko aamwaattamela Elixa, anamukoha: Moosuwela weera Yave onoongweliha pwiiyaanyu olelo wiirimu ammwalamwalihaka ni nyuwo?” Elixa aamwaakhula: “Koosuwela, mene muhuulume yeeyo.”

⁶Vano Eliya aamweerela Elixa: “Muhaleke wenno; Yave ookirumiha oYordanu.” Wa soothesene, Elixa aamwaakhula: “Kinlipela mwa Nsina na Yave ni okumaanyu: nkoohiyani.” Vano yaarowa vamoha.

⁷Nakupa a maprofeeti miloko mithanu aarowa, aneemela ottai ottai wa nipuro Eliya ni Elixa yeemenlaaya muxerexere Yordanu.

⁸Eliya aarula mukaandyowaawe, anapinda, anamanelano maahi. Maahi yaakawanyeya ni ooweeli ale yaalapuwasa vathi wuumaleene.

⁹Elapuwakaru, Eliya aamukoha Elixa: “Mukileele, koopakeleni eheeni kihinaaye okuxiwa kirakamelihiwaka ni nyuwo?” Elixa aamwaakhula: “Mukikhaliheke namahiyeriwa mutokweene a munepaanyu wa okhala mprofeeti.”

¹⁰Eliya aamweerela: “Moovekela etthu yoorikaxa. Wa soothesene, mwakoona miyo kaamwalamwalihiwaka ni nyuwo, munoophwanya mvenkaanyu. Mwaahikoona, khamuphanya.”

¹¹Yeettaka ni elokololaka hiihaale, wootutuxereya yaakhumelela ekaaro ya mooro yeettihiwaka ni ikavalu* sa mooro, sinaamwalamwaliha eeli ale ni Eliya aawelihiwa wiirimu muyuupuruni.

¹²Elixa oonakaru yeeyo, aakhuwela: “Atithaka! Atithaka! Mwaari ntoko ekaaro ya ekhotto ni anamweettiha a ikavalu* sa oYixrayeli!” Vano Elixa ahaaweraawe omoonatho, aakuxa soowarasawe, anaahula eriyariru.

¹³Aakuxa mukaandyo wa Eliya waamonre, anahokolowa, aneemela mukerekhere Yordanu.

¹⁴Vano aakuxa mukaandyo waamonre wa Eliya, anamanelano maahi, eeraka: “Ori woowi Yave, Muluku a Eliya?” Amanakaru maahi, awo yaakawanyeya, analapuwa.

¹⁵Nakupa a maprofeeti aarweela oYeriko oonakaru yeeyo, aaheera: “Munepa wa okhala mprofeeti wa Eliya woomukhuruwela Elixa.” Aarowa omukumanano, anuuramela ohoolowawe.

¹⁶Awosa yaamweerela: “Moone, hiyo arumeiyaanyu nookhalano asilopwana miloko mithanu oolipa. Awosa eroweke yamwaasaaseke pwiiyaanyu. Apaale Munepa wa Yave woomukuxa, onamuhiya vamwaako hoye hoye vareyareyani nikina.” Elixa aawaakhula: “Hoye. Muhaarumihe.”

¹⁷Wa soothesene, yannamunyeserera mpaka waakhulela, anaweerela: “Mwaarumiheke atthu awo.” Vano yaahaarumiha asilopwana miloko mithanu, enamwaasaasa Eliya mahuku mararu, mene khayaamphwannye.

¹⁸Awosa ehokoleelakaru wa Elixa aahanle oYeriko, aaweerela: “Kaaweerelani weera muhirowe.”

¹⁹Asilopwana a esidade yaamweerela Elixa: “Pwiiyaahu, ntoko munoonaanyu, esidade ela yootekeya mweelaponi yooreera, mene maahi ari oonanara ni etthaya yohuumelela.”

²⁰Aaweerela: “Muhele maakha mmwaapuni munyowani, ni mukiruuheleke.” Vano yaamuruuhela.

²¹Elixa aarowa wa ophattuweloni, anavonyerawo maakha eeraka: “Yave oneera ha: ‘Kootteeliha maahi ala. Khayiivatho hata etthaya khayuumelelatho.’”

²²Vano mpaka olelo maahi ampwaherera ootteeleene, ntoko Elixa eenraawe.

²³Okhuma vaavaale, Elixa aarowa oBeteli. Eettaka hiihaale mphironi, amiravo akina yaarweela osidade yaamwaattamela, enapacera omutheya emweerelaka: “Owele nantari! Owele!”

²⁴Aarukunuwa, anaaweha, anaalapha mwa Nsina na Yave. Vano ursu* eeli yaakhumasa mutuphini, enaanyaanya amiravo miloko mixexe neeli.

²⁵Aapwaherera arowaka mwaako Karimeli, ni okhuma vaavaale aahokoleela oSamariya.