Read Makhuwa-Shirima 2 Mamwene 22 Bible Online

2 Mamwene 22 - Makhuwa-Shirima bible

2 Mamwene 22

¹Yosiya apaceraka olamula aarino iyaakha ithannatthaaru, analamula oYerusaleemu iyaakha miloko miraru niimoha. Amayawe yiitthaniwa Yedida, mwaana muthiyana a Adaya oBozekati.

²Aapaka yeeyo eri yooreera vamaithoni wa Yave attharaka mweettelo wootheene wa atithawe Davide, ahihapuwakaru.

³Vayaakhani yanaamuloko niithannatthaaru ya olamulawawe, mwene Yosiya aamurumiha namalepa Xafani, mwaana mulopwana a Azaliya, mwaana mulopwana a Mexulami, wa Empa ya Yave. Aamweerela:

⁴“Murowe wa mutokweene a asaserdoti*, Hilikiya, mwamuleele weera areherereke musurukhu waaruuhiwe Mpaani mwa Yave, mwa yoowo anamalipelela a milako yaakhenlaaya munlokoni.

⁵Awosa ewinnyerereke musurukhu asilopwana athanliwe owehaweha muteko wa orasela Empa ya Yave. Ni anamawehaweha awo yaaliveke anamateka anrasela Empa ya Yave —

⁶makalipinteiru, anamateka ni mapatarero. Mwaalamule weera yathume itthaabwa ni maluku ookheriwa weera eraseliwekeno Empa ya Yave.

⁷Awosa animweetta moota woororomeleya; khoontthuneya weera ekileele moota amvarelaaya muteko musurukhu.”

⁸Mutokweene a asaserdoti*, Hilikiya, aamweerela Xafani, namalepa: “Koophwanya elivuru ya Nlamulo Mpaani mwa Yave.” Aamvaha Xafani elivuru ni owo aasoma.

⁹Vano namalepa, Xafani, aarowa wa mwene, anamuthalihera: “Arumeiyaanyu aaliva musurukhu waari Mpaani mwa Yave yaavahaka anamateka ni anamawehaweha a Empa ya Yave.”

¹⁰Vano namalepa, Xafani, aamweerela mwene: “Mutokweene a asaserdoti*, Hilikiya, ookivaha elivuru.” Xafani aahaasomela amwene elivuru ele.

¹¹Mwene iiwakaru masu ale a elivuru ya Nlamulo, aahaahula ikuwosawe.

¹²Aamulamulela mutokweene a asaserdoti*, Hilikiya, Ahikami, mwaana mulopwana a Xafani, Akhebori, mwaana mulopwana a Mikaya, namalepa Xafani, ni namakhavihera a mwene, Asaya:

¹³“Murowe ni mwakikohakoherele Yave ni mwa muloko ni aYuda ootheene mwaha wa sa seiyo silempwale mulivuruni ela ephwanyingwe. Isara sa Yave wa hiyo ti sitokotoko niwoko makholowaahu khayiiwelenle masu a elivuru ela; khayaapanke sootheene elivuru enilamulenlaaya opaka.”

¹⁴Musaserdoti* Hilikiya, Ahikami, Akhebori, Xafani ni Asaya yaarowa wuuluma ni mprofeeti muthiyana Huleda, aari mwaariye Xalumi, mwaana mulopwana a Tikeva, mwaana mulopwana a Harehasi, mutokweene a anamathokorora a ikuwo. Huleda aakhala muttetthe munyowani wa oYerusaleemu.

¹⁵Owo aaweerela: “Yave, Muluku a aYixrayeli ooneera ha: ‘Mwamuleele mulopwana oorumihaleni wa Miyo,

¹⁶‘Yave oneera ha: Kinooruuhela nihooxo nipuro nna ni atthwaaya, ntoko elempwalaaya mulivuruni mwene a oYuda osommaawe.

¹⁷Isarasaka nsipattele nipuro nna ni malumi a isarasaka kheerwa ecipihiwa niwoko awo yaakihiya ehiseraka erubani* miluku sikina ni yaatannya isarasaka niwoko na icaambulo sincipale sa miluku sikina yaapankaaya.’

¹⁸Mwamuleele mwene a oYuda oorumihaleni weera munkoherere Yave: ‘Yave, Muluku a aYixrayeli oneera ha mwaha wa masu mwiiwalaanyu:

¹⁹Mweenre mwaahula ikuwosanyu ni mwiinla vamaithoniwaka Miyo koowiiwani, onghima Yave, niwoko murimaanyu wookaakhulela mwiiyevihaka vamaithoni wa Yave mwiiwalaanyu yeeyo kaahimmaaka mwaha wa nipuro nna ni atthwaaya — weera nnoophwatiwa ni nnoolamphwa.

²⁰Vanonto Miyo kinimoohiyani mukhwaaka ni ovithiwa mmuretteleni. Khamurwa moona mahooxo ootheene kineeraaka kiruuhele nipuro nna.’” Vano awosa yaarongha yoowaakhula wa mwene.