Read Makhuwa-Shirima 2 Mamwene 23 Bible Online

2 Mamwene 23 - Makhuwa-Shirima bible

2 Mamwene 23

¹Vano mwene aawiitthana asitokweene ootheene a oYerusaleemu ni oYuda.

²Mwene aarowa wa Empa ya Yave vamoha ni asilopwana a oYuda, a oYerusaleemu, asaserdoti* ni maprofeeti — atthu ootheene okhuma asikhaani mpaka oottittimiheyaxa. Owo aahaasomela ootheenaawo akhuwelaka masu a mulivuruni ya wiiraana yaaphwanyiwe Mpaani mwa Yave.

³Mwene aaheemela vanrimbuni vamaithoni wa Yave anarehereratho wiiraana, aroromelihaka omutthara Yave ni wiiwelela malamulowaawe, ikanosawe ni soorumasawe ni murima ni okumi wootheene, akwaniheraka hiiho masu a wiiraana alempwale mulivuruni ela. Vano atthu ootheene yaahiiroromelihatho wiiraana.

⁴Mwene aamulamulela Hilikiya, mutokweene a asaserdoti* ni musaserdoti* mukina vamoha ni anamalipelela a mulako weera ekhumihe Mpaani mwa Yave ikaruma sootheene saapakeliwe Bahali*, Axera ni ithenyeeri sa wiirimu. Aahisa iye okerekhere wa oYerusaleemu, vanreyareyani na oKideroni, anarongha ettuura oBeteli.

⁵Aawoomola asaserdoti* a miluku sikina yaathanliwe ni mamwene a oYuda weera ehisereke erubani* mmattumuxani ootteeliheriwa miluku sikina mmasidadeni sa oYuda ni muxerexere oYerusaleemu. Asaserdoti* ale yaamuhisera erubani* Bahali*, nsuwa, mweeri, ithenyeeri sa nsuwa ni ithenyeeri sootheene sa wiirimu.

⁶Aakhumihatho Mpaani mwa Yave nrimbu na Axera anarongha vanreyareyani na oKideroni mukerekhere oYerusaleemu, anahisawo. Naathatuwa ettuura yaamwaraxeliwe omahiyeni a muloko.

⁷Aaphwatatho ikwartu sa mapuuta asilopwana, mwa yaale yaakhala Mpaani mwa Yave, ni mwa mwemmo asithiyana yaatthavelaayamo Axera.

⁸Yosiya aahaaruuha asaserdoti* ootheene a mittetthe sootheene sa oYuda, anaveiha mattumuxa ootheene ootteeliheriwa miluku sikina, mwa weiwo asaserdoti* yaahiseraayamo erubani*, okhuma oGeba mpaka oBerxeba. Aahaaphwata altaari* a miluku sikina yaari mmilakoni vamoha ni altaari* yaari vamulako wa Yoxuwa, guvernadori a esidade, waari mpatta wa moono woothiyana wa mulako wa esidade.

⁹Asaserdoti* yaamuhirumeelaru valtaarini* a Yave oYerusaleemu yannaca ipaawu soohikhalano eferementu vamoha ni asaserdoti* akina.

¹⁰Aananariha oTofeti waari vanreyareyani na oBeni-Hinomi moota wooweera khaawo eera awere omuhiserawo mwanawe mulopwana hoye hoye muthiyana wa muluku iitthaniwa Moleki.

¹¹Aaphwata ikavalu* vamulako wa Empa ya Yave mamwene a oYuda yaatteelihenraaya nsuwa. Saari vanipuwani vakhiviru wa ekwartu ya murumeiyi iitthaniwa Natani-Meleki. Vahoolowaya Yosiya aahisa ikaaro sa ikavalu* saatteeliheriwe nsuwa.

¹²Aahaaphwata altaari* yaatenkaaya mamwene a oYuda vataratoni, vakhiviru wa ekwartu ya osulu ya Ahazi, nitho altaari* aatenkaawe Manaxe mmapuwani meeli a Mpaani mwa Yave. Aahaakhumiha, anaapwexa, anahela itthuxo vanreyareyani na oKideroni.

¹³Mwene aaphwatatho mattumuxa ootteeliheriwa miluku sikina yaari mpatta ninkhuma nsuwa wa oYerusaleemu, mpatta wa ohitto wa Nttumuxa na Ophwata. Yaari altaareene yaale Salomoni, mwene a aYixrayeli, aamutekenlaawe Axeteroti, muluku ookhootteya a aSidoni, Kemoxi, muluku ookhootteya a aMowabe ni Moleki, muluku ookhootteya a awAmoni.

¹⁴Yosiya aapwexa maluku ootteeliheriwa, anaaphwata amarimbu a Axera, anakhuneela mapuro ale ni makhuva a atthu.

¹⁵Aahaaphwata mpaka oBeteli altaari* ni mattumuxa ootteeliheriwa miluku sikina yaapakiwe ni Yerobowami, mwaana mulopwana a Nebati, mwa yoowo aatthekihale aYixrayeli. Aahisa mattumuxa ootteeliheriwa miluku sikina, enathatuwa ntthupi, ahisakatho nrimbu na Axera.

¹⁶Vano Yosiya awehaka mukhwipi, aahoona mahiye yaari vanttumuxani. Aalamulela okhumihiwamo makhuva yaari mmahiyeni weera ehisiwe valtaarini*. Hiiho aananariha attharihaka masu a Yave yaahimmwale khalayi mwa mulopwana a Muluku sihinaaye itthusene seiye.

¹⁷Mwene aakoha: “Nluku heeni nenna nookheriwa kinoonaaka vanihiyeni?” asilopwana a esidade yaamwaakhula: “Ninthoonyera nihiye na mulopwana a Muluku aarwiiye oYuda aalaleiyaka altaari* a oBeteli itthusene seiye mpakenlaanyu olelo.”

¹⁸Mwene aaweerela: “Muhiyeke. Ahikhaleru mukina aneera atave makhuvaawe.” Vano awosa yaahiya makhuvaawe ni makhuva a mprofeeti aarwiiye oSamariya.

¹⁹Mooteene yoowo aapankaawe oBeteli, Yosiya aakhumihatho anananariha mmattumuxani ootheene ootteeliheriwa miluku sikina yaatenkaaya mamwene a oYixrayeli mmasidadeni sa oSamariya, mwa yaawo yaatannyale isara sa Yave.

²⁰Yosiya aawiiva asaserdoti* ootheene a mattumuxa ootteeliheriwa ale, ahisakamo makhuva a atthu. Vahoolowaya aahokoleela oYerusaleemu.

²¹Mwene aahaalamulela atthu ootheene: “Mumpakele Yave Mulukwaanyu efesta ya mPaska*, ntoko elempwalaaya mulivuruni ya wiiraana.”

²²Vano, okhuma mmahukuni a aphuki yaahoolela aYixrayeli mpaka mmahukuni a mamwene a oYixrayeli ni a oYuda kheenapakiwe efesta ya mPaska* ntoko ele.

²³Vaheera vayaakhani yanaamuloko niithannatthaaru ya olamula wa mwene Yosiya, efesta ya mPaska* aapakeliwaawe Yave oYerusaleemu.

²⁴Ohiya toko yeeyo Yosiya aawoomolatho anamadyiini ootheene, yaawo yaakoherera minepa, miluku soowootha sa emusi, miluku sikina ni itthu sootheene sa mwiikho saari oYuda ni oYerusaleemu. Aapaka yeeyo weera akwanihere soonyesererihiwa sa Nlamulo nilempwale mulivuruni musaserdoti* Hilikiya, oonelenlaawe Mpaani mwa Yave.

²⁵Okhuma khalayi mpaka vahoolo wa Yosiya khawowo mwene ntoko owo. Aahokoleela wa Yave ni murimaawe, okumaawe ni ikurusawe sootheene attharihaka Nlamulo nootheene na Moisesi.

²⁶Wa soothesene, Yave khaahingye isarasawe soowoopiha saaluttuwenle oYuda niwoko na sootheene Manaxe aapankaawe, atannyaka isara sa Yave.

²⁷Vano Yave aaheera: "Kinoovenxa oYuda vamaithoniwaka ntoko kivenxalaaka oYixrayeli ni kinoohiya oYerusaleemu, esidade kaathanlalaaka nitho Empa ya Yave ela mwa yeela kaahimmaaka: 'Nsinanaka nkahelemo.”

²⁸Vano, mwaha wa sookhumelela sikina sa olamula wa Yosiya ni sootheene aapankaawe — oolempwale mulivuruni ya nyaha sa mamwene a oYuda.

²⁹Yosiya areene mwene, Farawu* Neko, mwene a wExipitu, aarowa mpaka mooloko Efratesi weera amukhavihere mwene a wAsiriya. Mwene Yosiya aarowa weera angwaneno, mene Farawu* Neko aangwanano, anamwiiva Yosiya oMegidu.

³⁰Arumeiyi a Yosiya yaakuxa muttembwaawe mukaaroni ya ikavalu* okhuma oMegidu eronghaka oYerusaleemu, enamvitha munihiyenimwawe. Atthu a oYuda yaamuthanla Yehowahazi, mwaana mulopwana a Yosiya weera aarandele atithawe, enamuttikitthela.

³¹Yehowahazi, apaceraka olamula aarino iyaakha miloko miili ni tthaaru, analamula oYerusaleemu nyeeri miraru. Amayawe yiitthaniwa Hamutali, mwaana muthiyana a Yeremiya a oLibena.

³²Aapaka soonanara vamaithoni wa Yave ntoko yaapankaaya makholowaawe.

³³Farawu* Neko aamutthukenle oRibela, mweelaponi ya oHamati, weera ahilamuletho oYerusaleemu. Neko owo aanyesereriha oYuda oliva italentu* ncira sa eparatha* ni etalentu* emoha ya eyuuma yoorikaxa ntoko musoko.

³⁴Farawu* Neko aamukhaliha Eliyakimi, mwaana mulopwana a Yosiya, mwene vanipuroni na atithawe, anaceendya nsina na Eliyakimi amuttehaka Yehoyakini. Vaheera aamukuxa Yehohawazi, anamurowano wExipitu mwa weiwo okhwenlaawewo.

³⁵Yehoyakini aamuliva Farawu* Neko eparatha* ni eyuuma yoorikaxa aanyesereringhaawe. Vano, weera amulive Neko, Yehoyakini aahaanyesereriha atthu a oYuda oliva eparatheene yeele ni eyuumeene yeele yoorikaxa attharihaka okhalano wa khula mutthu.

³⁶Yehoyakini, apaceraka olamula aarino iyaakha miloko miili niithanu, analamula oYerusaleemu iyaakha muloko niimoha. Amayawe yiitthaniwa Zebida, mwaana muthiyana a Pedaya, a oRuma.

³⁷Aapaka soonanara vamaithoni wa Yave ntoko yaapankaaya makholowaawe.