Read Makhuwa-Shirima 2 Mamwene 25 Bible Online

2 Mamwene 25 - Makhuwa-Shirima bible

2 Mamwene 25

¹Vayaakhani yanaathannaaxexe ya olamula wa Zedekiya, vanihukuni nanaamuloko na mweeri wanaamuloko, Nebukadenezari, mwene a oBabiloniya, aarowa oYerusaleemu ni anakhottwaawe ootheene. Aakonenle ohoolo wa esidade anapaka soowelelano exiri.

²Esidade yaariciwa mpaka eyaakha yanaamuloko niimoha ya olamula wa mwene Zedekiya.

³Vanihukuni nanaathannaaxexe na mweeri wanaaxexe etala yaatepaxa ovola moota wooweera khayaariworu yooca muloko.

⁴Vano exiri ya esidade yaapwexiwa ni anakhotto ootheene a oYuda yaatthawa ni ohiyu eviraka vamulako eriyari ya ixiri piili vakhiviru wa nttimbe na mwene, yaarooricaru aBabiloniya esidade. Awosa yaatthawela mpatta wa wAraba,

⁵mene anakhotto a oBabiloniya yaamuttharelela mwene, enamuphwanya vanreyareyani na oYeriko. Anakhottwaawe ootheene yaamutthawa mwene

⁶ni owo aavariwa. Aaroihiwa wa mwene a oBabiloniya aari oRibela, mwa weiwo aathoriheliwaawewo.

⁷Yaawiiva anamwane asilopwana a Zedekiya vamaithoniwawe, enazoola maithwaawe, enamutthuka ni onyooro wa ebronze*, enamurowano oBabiloniya.

⁸Vanihukuni nanaathannameeli na mweeri wanaathanu, vayaakhani yanaamuloko niithanniixexe ya olamula wa Nebukadenezari, mwene a oBabiloniya, Nebuzaradani, mutokweene a anakhotto ooweraxa a mwene ni namalaka a mwene a oBabiloniya aavolowa oYerusaleemu.

⁹Aahisa Empa ya Yave, empa ya emwene, ni impa sootheene sa oYerusaleemu. Aahisatho soopakiwa sootheene sootthuneyaxa.

¹⁰Anakhotto ootheene yaamuhoola Nebuzaradani, yaapwexa ixiri sa oYerusaleemu.

¹¹Nebuzaradani, mutokweene a anakhotto ooweraxa a mwene, aahaarongha wootthukiwani amaki yaahanle musidade; yaale yiixinnyerenre wa mwene a oBabiloniya ni yaale yaahanle a muloko.

¹²Vaheera Nebuzaradani aahaahiya akina a oohaawaxa a mulaponi weera evareke muteko mmatta sa iwuuva* ni imatta sikina.

¹³aBabiloniya yaahaaphwata amarimbu a ebronze*, ikaaro sa ebronze* ni Ephareiya ya ebronze* yaari Mpaani mwa Yave, enarongha ebronze* oBabiloniya.

¹⁴Yaakuxatho mookhupelamu ettuura, apoxoro, soorehererano mutthambo, isasaani ni ikaruma sa ebronze* sootheene saavareliwa muteko Mpaani mwa Yave.

¹⁵Mutokweene a anakhotto ooweraxa a mwene aakuxa yootholelano makhala ni ibasiya soovuuvihera — sootheene soopakiwa ni eyuuma yoorikaxa yooreeraxa hoye hoye eparatha* yooreeraxa.

¹⁶Vano atthu khayaawenre oringa olemelawaya ebronze* ya amarimbu eeli, Ephareiya ni ikaaro sa ebronze* mwa seiye Salomoni aapakenlaawe Empa ya Yave.

¹⁷Orakama wa khula nrimbu waari imeetru* ithanniixexe. Orakama wa oratteliwa wa osulu wa khula nrimbu waari emeetru* emoha ni ohala ni waacaambuleliwano irooma* sirukureerihiweene mukhwipimwaya.

¹⁸Nebuzaradani aamurongha wootthukiwani Seraya, mutokweene a asaserdoti*, Zefaniya, musaserdoti* anaaveeli ni anamalipelela araru a mulako wa Empa ya Yave.

¹⁹Variyari wa yaale yaahanle musidadeni, owo aamukuxa mutokweene a anakhotto ni anamalaka athanu a mwene. Aamukuxatho namalepa aari mutokweene aathukumanyinghe atthu a elapo weera ewane vamoha ni miloko mithannamosa a atthwaawe yaaphwanyiwe musidadeni.

²⁰Nebuzaradni, mutokweene a anakhotto ooweraxa a mwene, aahaakuxa oottheene yaale, anaarongha wa mwene a oBabiloniya oRibela.

²¹oRibela iwo, mweelaponi ya oHamati, mwene aalamulela weera yiiviwe. Hiiho aYuda yaaroihiwa wootthukiwani ottai wa elapwaaya.

²²Nebukadenezari aamukhaliha Gedaliya, mwaana mulopwana a Ahikami, mwaana mulopwana a Xafani weera akhale mutokweene a muloko waahiiwe oYuda.

²³Asitokweene a anakhotto ootheene ni atthwaaya yiiwakaru weera Nebukadenezari aamukhaliha Gedaliya ntoko guvernadori, yaamwaattamela Gedaliya oMizepa — aari Iximayeli, mwaana mulopwana a Netaniya; Yohanani, mwaana mulopwana a Kareya; Seraya, mwaana mulopwana a Tanumeti, muNetofati; Yahazaniya, mwaana mulopwana a mMahaakati, ni asilopwanaaya.

²⁴Gedaliya aahaaroromeliha ahooleli ale ni asilopwanaaya, aweerelaka: "Muhiwoove asitokweene a oBabiloniya. Mwiitekiheke elapweene yeela, munrumeele mwene a oBabiloniya ni sootheene sinooweettelani nnenesene.

²⁵Vaheera mweeri wanaathannamiili Iximayeli, mwaana mulopwana a Netaniya, mwaana mulopwana a Elixama, aari neethi aahaarowano asilopwana muloko, anamwiiva Gedaliya vamoha ni asilopwana a oYuda ni aBabiloniya yaari ni yoowo oMizepa.

²⁶Vano atthu ootheene okhuma asikhaani mpaka asitokweene yaatthawela wExipitu vamoha ni asitokweene a anakhotto niwoko na owoova aBabiloniya.

²⁷Vayaakhani yanaamiloko miraru niithannapiili ya oronghiwawawe Yehoyakini, mwene a oYuda, vanihukuni nanaamiloko miili ni mathannameeli na mweeri wanaamuloko ni miili, eyo tiiyo vayaakhani yoopacera ya olamulawawe mwene Evili-Merodaki a oBabiloniya, aamutaphula Yehoyakini mukaliposo.

²⁸Mwene owo aamupwattha nnenesene, anamvaha nipuro noottittimiheya opwaha mapuro a mamwene makina aaraaweno oBabiloniya.

²⁹Vano Yehoyakini aatthuniheriwa oceendya soowara sa mukaliposo, annaca vameesa a emwene mpaka ommaleloni wa okumaawe.

³⁰Khula nihuku na okumaawe wootheene mwene Evili-Merodaki annamvaha Yehoyakini sootheene saatthuneya.