Read Makhuwa-Shirima 2 Mamwene 3 Bible Online

2 Mamwene 3 - Makhuwa-Shirima bible

2 Mamwene 3

¹Vayaakhani yanaamuloko niithannatthaaru moolamulani mwa Yehoxafati, mwene a oYuda, Yorami aathatuwa mwene a oYixrayeli oSamariya ni aalamula iyaakha muloko ni piili.

²Aapaka yoonanara vamaithoni wa Yave, mene kheenlikana ntoko yoonanara atithawe ni amayawe yaapankaaya. Aaphwata nluku nootteeliheriwa Bahali* atithawe yaapankaaya.

³Wa soothesene, aatthara soottheka sa Yerobowami, mwaana mulopwana a Nebati, mwa seiye aatthekinghaaweno aYixrayeli, ahihiyaka soottheka iye.

⁴Vano Mexa, mwene a oMowabe aakhalano ikhondoolo sincipale ni aanyesererihiwa omvaha mwene a oYixrayeli ikhondoolo 100 000 nitho mapururu a anapunci 100 000.

⁵Vaheera akhwaakaru Ahabi, mwene a oMowabe aamvaanelela mwene a oYixrayeli.

⁶Tivawo ehuhuweene yeele mwene Yorami aakhuminghaawe oSamariya aathukumanyihaka anakhotto ootheene a oYixrayeli.

⁷Aamurumihelatho mutthenga ola Yehoxafati, mwene a oYuda: “Mwene a oMowabe ookivaanelela. Munookihoola owanano oMowabe?” Owo aamwaakhula: “Kinimookhaviherani vamoha ni anakhottwaaka ni ikavalusaka*.” Eniikhale anakhotto amohamoharu.

⁸Yehoxafati aamukoha: “Ninrowa waawanano mpatta heeni?” Yorami aamwaakhula: “Nivireke munikareni na wEdomi.”

⁹Vano mwene a oYixrayeli aarowa vamoha ni mamwene a oYuda ni a wEdomi. Yeettiyeene mahuku mathannameeli, anakhatto yaahaamalela maahaaya ni a axinamaaya.

¹⁰Mwene a oYixrayeli aakhuwela: “Eya! Weeraka Yave onithukumanyinghe mamwene ooraaru hiyo weera aninnyerere mmatatani mwa aMowabe?”

¹¹Vaheera Yehoxafati aamukoha: “Weeraka khawowo va mprofeeti a Yave weera nimukoherere Yave mwa yoowo?” Mutokweene mmoha a anakhotto a mwene a oYixrayeli aamwaakhula: “Elixa, mwaana mulopwana a Xafati, ori va. Aari namakhavihera a Eliya.”

¹²Yehoxafati aaheera: “Masu a Yave ari ni yoowo.” Tivawo mwene a oYixrayeli, Yehoxafati ni mwene a awEdomi yaarongwaaya wuuluma ni yoowo.

¹³Elixa aamweerela mwene a oYixrayeli: “Nkinoopwatthelani. Murowe mwaakoherere maprofeeti a atithinyu ni amayinyu.” Mwene a oYixrayeli aamwaakhula: “Hoye, niwoko ti Yave onithukumanyinghe hiyo mamwene mararu weera aninnyerere mmatatani mwa aMowabe.”

¹⁴Elixa aamweerela: “Kinlipela mwa Nsina na Yave a ikuru sootheene, mwa Yoowo kinimurumeelaaka, weera ahaakhanle Yehoxafati, mwene a oYuda, miyo nkoowehani, hata nkoopwatthani.

¹⁵Vano mukiruuhele namakita.” Vanonto namakita amwiipaawe, ikuru sa Yave saamukhuruwela Elixa,

¹⁶aneera: “Yave oneera ha: Muthipe ihime sincipale nreyareya nenenenna,

¹⁷niwoko Yave oneeratho: Nyuwosa khamoona epheyo hata epula, wa soothesene, nreyareya nna nnoosareya maahi ni nyuwosa, mihuwosanyu ni axinamaanyu akina munoowuramo.

¹⁸Mene wa Yave, nlelo eyo ekhaani — Owo onoowinnyereratho aMowabe mmatatanimwanyu.

¹⁹Munookuxa isidade soolipihiwa nitho isidade sootthuneyaxa sootheene. Munimuuha nyiri siniima sootheene, munimuuheela ihime sootheene ni munoosariha maluku imatta sooreera sootheene.”

²⁰Oxaawaya, mweehuhuni ya oveleela, maahi yaaweela mpatta wa wEdomi ni elapo yaasareya maahi.

²¹Vanonto aMowabe ootheene yaahiiwa weera mamwene yaahoorwa waawanano. Asilopwana ootheene yaawera waakuxa akapwitthi yaahiitthaniwa weera ethataane omwiinanoni — ekhalaka amiravo hoye hoye asitokweene.

²²Yaavenyaaya oxeexelo, nsuwa naatutha mmaahini. aMowabe ereene ottai ottai, maahi yoona oxeera, ntoko ephome.

²³Yaaheerelana: “Ti ephome! Nnoona ntoko mamwene awo yaawana yaawori, yiivanaka. Vano aMowabe, naahuhule!”

²⁴Wa soothesene, aMowabe ephiyakaru yaakonenlaayawo aYixrayeli, awosa yaahaawanano enawoomola aMowabe. Yaavolowa mweelaponi ya oMowabe enaaphwatasa.

²⁵Yaaphwata isidade ni khula mulopwana aavonyera maluku mmatta mooruwereya moothemwene. Yaahuuheela iihime sootheene, enuuha nyiri sootheene siima. oKiri-Haseti paahi ti waahalanne maluku mmapuronimwaya, vaheera asilopwana ekunxeene ikwambala yaarica esidade ele, enawanano.

²⁶Mwene a oMowabe oonakaru weera aangwiniwa, aahaathukumanyiha anakhotto ekunxeene ikatana macira mathannameeli weera yiilipihere ovira yamphwanye mwene a awEdomi, mene yaahooceela.

²⁷Vano aamukuxa mwaniye a ntthaara, eyo tiiyo namarandelaawe, anamwiivela ntoko yooveleela vaxirini ya esidade. Eyo yaahaanyoonyihaxa aYixrayeli moota wooweera yaavenyasa, enahokoleela elapwaaya.