Read Makhuwa-Shirima 2 Mamwene 5 Bible Online

2 Mamwene 5 - Makhuwa-Shirima bible

2 Mamwene 5

¹Vanonto Nahamani aari mutokweene a anakhotto a mwene a awArami. Aari oottittimiheyaxa vamaithoni wa pwiiyaawe ni oosuwanyeya niwoko mwa yoowo, Yave aangwiniha awArami. Aari nakhotto ooweraxa, mene aahaawa makokho.

²Vano nakupa mmoha a anakhotto a awArami aarowa, anamvara mwaamwali muYixrayeli mmoha ni owo aamurumeela mwaarawe Nahamani.

³Owo aaweerela apwiyaawe: “Eya! Pwiiyaaka Nahamani aarongwe omukumanano mprofeeti ori oSamariya, saano alammeene!”

⁴Nahamani aarowa omuthalihera pwiiyaawe yeeyo mwaamwali muYixrayeli aahimmaawe.

⁵Mwene a awArami aamwaakhula: “Vekhaikhai, murowe. Kinimoovahani ekaratta ya omwinnyerera mwene a oYixrayeli.” Nahamani aattimula akunxeene italentu* muloko sa eparatha*, ixekeli* macira miloko mithannamosa sa eyuuma yoorikaxa ni soowara muloko sootteettheya.

⁶Ekaratta aamuronghenlaawe mwene a oYixrayeli yeera: “Kinoorumihelani ekaratta ela vamoha ni murumeiyaaka Nahamani weera munlamihe makokho.”

⁷Mwene a oYixrayeli asomakaru ekaratta, aahaahula ikuwosawe eeraka: “Apaale miyo Muluku? Weeraka kinoowera ovaha okumi hoye hoye okhwa? Heeni mulopwana owo onkirumihelaawe mutthu weera kimulamihe makokho? Moone, owo ontthuna okiinanano!”

⁸Elixa, mulopwana a Muluku, iiwakaru weera mwene a oYixrayeli aahaahula ikuwosawe, aamurumihela mutthenga ola: “Mwaahulenleni ikuwosanyu? Mulopwana owo arweeke wa miyo ni owo onoosuwela weera ookhala mprofeeti oYixrayeli!”

⁹Vano Nahamani aarowa ni ikavalusawe* ni ikaarosawe, aneemela vamulako wa empa ya Elixa.

¹⁰Elixa aamurumihela namutthenga wa yoowo amweerelaka: “Murowe mwarape imaara ithannapiili mmoolokoni Yordanu ni erutthwaanyu enoolama ecapeyeke.”

¹¹Wa soothesene, Nahamani aapwaha oonyoonyiweene eeraka: “Miyo kuupuwela weera owo aamukhuma weera akaakhelele eemenleene iitthaneke Nsina na Yave Mulukwaawe, attikitthaka makhwattaaka ni ntatanawe, ni hiiho aamukilamiha makokho.

¹²Abana ni Farepari, nyooloko sa oDamasku, ti sooreerela soopwaha nyooloko sa oYixrayeli. Miyo kaamurapamo mpaka olama?” Vano aapwahawo oonyoonyiweene.

¹³Arumeiyi a Nahamani yaamwaattamela, enamweerela: “Tiithi, mprofeeti oovekenleni etthu yoorika, khamwaapaka? Wootepaxa oweerelani paahi: ‘Mwarape ni munoolama.’”

¹⁴Vano aarowa, anavolowa muYordanu, ananeela imaara ithannapiili, ntoko mulopwana a Muluku aamulamulenlaawe, anacapeya erutthwaawe yaatteettheya ntoko ya mwaana.

¹⁵Vahoolowaya Nahamani ni arumeiyaawe ootheene yaahokoleela vaate wa mulopwana a Muluku. Aaheemela ohoolo wa Elixa, anamweerela: “Vano koosuwela weera khoowoworu muluku mukina mweelaponi yootheene ahikhanle Muluku a oYixrayeli. Dyoontte, mwaakhele yoovaha ya murumeiyaanyu.”

¹⁶Mprofeeti aamwaakhula: “Kinlipela mwa Nsina na Yave, mwa Yoowo kinimurumeelaaka, nkirwa kaakhelaru.” Nahamani aamunnyesereriharu, aakhootta.

¹⁷Nahamani aamweerela: “Mweenre mukhootta yoovaha, mukitthunihere okuxa etthaya olemelawaya angweraaya oteexa abuuru eeli, niwoko murumeiyaanyu kharwa apakelatho sooveleela soohisa ni sa enama miluku sikina ahikhanle Yave.

¹⁸Vaheera Yave akilevelele etthu emoha: pwiiyaaka aavolowaka mpaani mwa muluku Rimoni weera amulapemo, ontthuneyatho weera miyo kamukokhorele eenre anakaakanda. Yave akilevelele etthu eyo.”

¹⁹Elixa aamwaakhula: “Murowe mmuretteleni.” Nahamani axuurakamenleene,

²⁰Gehazi, murumeiyi a Elixa, mulopwana a Muluku, aahiixeerela: “Pwiiyaaka oomureerelaxiwa Nahamani ngwArami ahitthunaka soovahasawe. Kinlipela mwa Nsina na Yave weera kinoomutthimakela weera koone kaariki kakuxe mpatta wa itthusawe.”

²¹Vano aamutthimakela Nahamani. Nahamani amoonakaru atthimakaka, aakhuruwa mukaaroni weera amukumaneno. Aamukoha: “Salaama?”

²²Gehazi aamwaakhula: “Salaama. Pwiiyaaka ookiruma wooleelani: ‘Asilopwana eeli a nakupa a maprofeeti aphiyale vaanaanovaava erweelaka mmanyaakoni sa elapo ya wEfrayimi. Dyoontte, mwaavahe etalentu* ya eparatha* ni ikuwo piili sootteettheya.’”

²³Nahamani aamwaakhula: “Wooreera. Okuxe italentu* piili.” Aamunyesereriha Gehazi waakhela iye ni aahela mmirupani miili ni soowara piili sootheene iye. Aawinnyerera arumeiyaawe eeli ni awosa yaakuxa mirupa iye emuhoolaka Gehazi.

²⁴Gehazi aphiyakaru vanttumuxani aakhalaawe, aakuxa mirupa yaakuxalaaya arumeiyi eeli ale, anathokorora mpaanimwawe. Aahaalaxera arumeiyi ni awosa yaapwaha.

²⁵Vano aavolowa, aniixoonihera wa pwiiyaawe Elixa. Elixa aamukoha: “Gehazi, waari woowi?” Gehazi aamwaakhula: “Murumeiyaanyu kheentteru.”

²⁶Vaheera Elixa aamweerela: “Osuweleke weera kaari ni weyo mmunepani Nahamani aakhuruwaawe mukaaroni weera ookumaneno. Ehuhuweene yeela kheehiyono yoowaakhela musurukhu ni ikuwo, naari yoohaawela imatta sa sooliveira* ni sa iwuuva*, ikhondoolo, imombe, ipottha ilopwana naari ithiyana.

²⁷Makokho a Nahamani animookela weyo ni ekhapiraawo wa mahuku ootheene.” Vano Gehazi aavenya mpaani mwa Elixa oosareyeene makokho, exapalaawe etteenleene ntoko etthabwe.