Read Makhuwa-Shirima 2 Mamwene 6 Bible Online

2 Mamwene 6 - Makhuwa-Shirima bible

2 Mamwene 6

¹Nakupa a maprofeeti aamweerela Elixa: “Moone, nipuro ninthukumanaahu ni nyuwo nooniiyevelaxa.

²Nrowe omoolokoni Yordanu weera nuuhewo nyiri sootekelano nipuro na mithukumano.” Elixa aamwaakhula: “Muroweke.”

³Mmoha a yaale aamweerela Elixa: “Dyoontte, munihoole.” Owo aamwaakhula: “Paahi, kinoorowa.”

⁴Owo aarowa ni yaale. Awosa yaarowa oYordanu, enapacera wuuha nyiri.

⁵Mmoha a yaale uuhaka mwiri, epaso yaakhuleela muluusi. Owo aakhuwela: “Ii! Pwiiyaaka, kaarimooliha!”

⁶Mulopwana a Muluku aamukoha: “Ekhuleenle vaavi?” Owo aamoonihera nipuro ni Elixa aathikila ephandi, anavonyerawo, ni epaso yaaphamba.

⁷Elixa aamweerela: “Okuxe.” Mulopwana aahookola moono, anakuxa.

⁸Vano mwene a awArami aawanano aYixrayeli. Vahoolo woowuuluma ni asitokweenaawe, mwene a awArami aaheera: “Nakonele nipuro nno.”

⁹Mulopwana a Muluku aamurumihela mwene a oYixrayeli mutthenga ola: “Musembe nipuro nno, niwoko awArami ankela weiwo.”

¹⁰Vano mwene a oYixrayeli aahaarumihela anamahottela nipuro mulopwana a Muluku aathoonyenraawe. Emaara ti emaara Elixa annamooperera mwene moota wooweera annasemba mapuroweene yaale.

¹¹Eyo yaamunyoonyiha mwene a awArami, anaathukumanyiha asitokweenaawe anaanyesereriha aakohaka: “Mukileele, taani a nyuwo ori mpatta wa mwene a oYixrayeli?”

¹²Mmoha a asitokweene aamwaakhula: “Khanihiyono hiyo, pwiiyaaka, mene Elixa, mprofeeti ori a oYixrayeli, onimuthalihera mwene a oYixrayeli masu nyuwo munlokololaanyu mpaka mukwartunimwanyu.”

¹³Mwene aalamula: “Mwaasaase onkhalaawewo weera namvare.” Emuleenleene weera ori oDotani,

¹⁴mwene a awArami aahaarumihelawo anakhotto ancipale vamoha ni ikavalu* ni ikaaro sa ikavalu* sa ekhotto. Awo yaaphiyale ni ohiyu, enarica esidade.

¹⁵Murumeiyi a mulopwana a Muluku aavenyaawe oxaawaya ni akhumakaru mpaani, aawoona anakhotto vamoha ni ikavalu* ni ikaaro sa ikavalu* sa ekhotto erinceene esidade. Murumeiyi aamukoha Elixa: “Ii! Pwiiyaaka, nipakekeni?”

¹⁶Elixa aamwaakhula: “Ohoove. Yaale ari ni hiyo ti yaantte waapwaha yaawo.”

¹⁷Vano Elixa aavekela: “Dyoontte Yave, muhuleke maithwaawe weera oone.” Vanonto Yave aahula maitho a murumeiyi ni aaweha, anoona onttumuxani sisareiyeene ikavalu* ni ikaaro sa ikavalu* sa ekhotto sa mooro simurukureenreene Elixa.

¹⁸awArami awo yaamukhuveelaaya weera emvare, Elixa aamvekela Yave: “Mwaakelihe evaasi atthu ala!” Vano Yave aahaakeliha evaasi, ntoko Elixa aavekenlaawe.

¹⁹Elixa aaweerela: “Ola khoohiyono musewe naari esidade munaasaanyu. Mukitthareke ni kinimooronghani wa mulopwana mummwaasaanyu.” Owo aahaakuxa, anaarongha esidade ya oSamariya.

²⁰Evolowakaru, Elixa aavekela: “Yave, muhuleke maithowaaya weera yoone.” Vano Yave aahula maithowaaya, enoona weera yaari muSamariya!

²¹Mwene a oYixrayeli awoonakaru, aamukoha Elixa: “Tiithi Kiwiivaseke? Kiwiivasake?”

²²Elixa aamwaakhula: “Muhiwiive. Amwene, khamunawiive anamatthukiwa munaavaraanyu ni ekatana ni muupaanyu. Mwaavahe yooca ni maahi weera ece ni ewure ni vahoolowaya ehokoleeleke wa pwiiyaaya.”

²³Vano aahaarehererela efesta etokotoko ni emalihaleene oca ni owura, aahaalaxera, ni awo yaahokoleela wa pwiiyaaya. Hiiho anakupa a anakhotto a awArami yaahiya ohuhula ilapo sa oYixrayeli.

²⁴Eviraleene ehuhu ekina, Beni-Hadadi, mwene a awArami, aahaathukumanyiha anakhottwaawe ootheene, enarowa, enacira oSamariya.

²⁵Yaakhala etala etokotoko musidadeni. Yaavira ehuhu yincipale oriciweene moota wooweera muru wa buuru waathumihiwa ixekeli* miloko mithannamiraru sa eparatha* ni ekoomixi ekhaanene ya maraankhu a ikhunda yaathumihiwa ixekeli* ithanu.

²⁶Mwene a oYixrayeli aaviraawe vaxirini ya esidade, muthiyana mmoha aamukhuwelela: “Dyoontte, pwiiyaaka mwene, mukikhavihere!”

²⁷Mwene aamwaakhula: “Yave aahookhaviherani, nkookhavihereni hai? Apaale yookhala etrigu vanipuroni nimveeriwaayamo hoye hoye iwuuva* sinaameliwaayamo?”

²⁸Wa soothesene, owo aamukoha: “Mulattu heeni murinaanyu?” Muthiyana aamwaakhula: “Muthiyana ola aakeerela: ‘Olelo nimukhuureke mwaninyu ni omaalo awaka.’

²⁹Vano noomwaapeya mwanaka, ninamukhuura. Oxaawaya miyo kaamweerela weera ela ti emaara yoomukhuura mwaninyu, mene ola aamvitha.”

³⁰Mwene iiwakaru masu a muthiyana, aahaahula ikuwosawe. Eenre akhala vaxirini, atthu yaahoona weera owo aawara esaakho.

³¹Owo aaheera: “Muluku akittaruxaxe miyo kaahimuhita olelo Elixa, mwaana mulopwana a Xafati.

³²Vano Elixa aari owannyawe akilaantheene ni asitokweene akina yaakilaathi ni yoowo. Mwene aamuhooliha namutthenga, mene owo ahinaaye ophiyawo, Elixa aaweerela asitokweene: “Moone moota namwiiva owo okirumihenlaawe mutthu weera akihite. Vano namutthenga arwa, ngwale nsele munghiihaka ovolowa, niwoko simmwiiwanyeya mikhitto sa mwene ongwa ottuliwawe.”

³³Owo alokololaka hiihaale, namutthenga aaphiya. Vano ehuhuweene yeele mwene aamweerela: “Nna nttaruxo na Yave. Nkirwa kingwehereratho Yave.”