Read Makhuwa-Shirima 2 Mamwene 7 Bible Online

2 Mamwene 7 - Makhuwa-Shirima bible

2 Mamwene 7

¹Elixa aamweerela: “Mwiiwe masu a Yave. Yave oneera ha: Ehuhuweene yeela omaalo iliitru* ithannamosa sa ephepa sinoothumihiwa exekeli* emoha, ni iliitru* muloko ni piili sa esevada* sinoothumihiwatho exekeli* emoha vamulako wa oSamariya.”

²Mutokweene a anakhotto aamukhavihera mwene aamweerela mulopwana a Muluku: “Naari Yave ahulaka milako sa wiirimu, eyo kheneereya.” Elixa aamwaakhula: “Munimoona ni maithwaanyu, mene khamucaru etthu!”

³Vano yaakhala asilopwana axexe anamakokho vamulako wa esidade. Yaaheerelana: “Nnikhweleni vaava?

⁴Hiyo navolowa musidadeni, nnimookhwa etala; nakhala vaava, nnimookhwatho. Vano niroweke akonenlaayawo awArami weera niixinnyererewo. Awo yuurela okumaahu, nnookhala, mene yaniiva khamwaha.”

⁵Wiilaka, yaarowa yaakonenlaayawo awArami. Yaaphiyaaya mukerekhere waakonelingwe, yaahona weera khawaakhaliwewo.

⁶Vanonto Yave aawiiwiha awArami yaakonenlaayawo oruma wa ikaaro sa ekhotto, ikavalu* ni anakhotto ancipale moota wooweera yaaheerelana: “Moone, mwene a oYixrayeli oomwiiwananano mwene a aHiti ni mwene a wExipitu weera eniwaneno!”

⁷Vano yaavenya, enatthawa wiilaka, ehiyaka iheemasaya, ikavulusaya ni abuurwaaya. Yaakonenlaayawo yaahiya hiiho, etthawaka weera yuurele okumaaya.

⁸Anamakokho axexe yaaphiyalaaya mukerekhere waakonelingwe, yaavolowasa muheemani emoha, enaca, enawura, enakuxa eparatha*, eyuuma yoorikaxa ni ikuwo, enavitha seiye. Yaavolowa eheema yanaaveeli, enakuxamo itthu sikina, enavithatho.

⁹Vano yaaheerelana: “Khanimpaka nnene. Olelo ti nihuku na mutthenga wooreera ni hiyo nihimaaleke! Naweherera oxa, nnoothoriheliwa. Niroweke woowaakuveya weera nathalihere yeela empa ya emwene.”

¹⁰Vano yaarowa, enawiitthana anamalipelela a mulako wa esidade eweerelaka: “Naavolowa yaakonenlaayawo awArami ni khaniiwale naari khaawo nimoonnaahu. Saariwo paahi ikavalu* ni abuuru ootthukiweene ni iheema soohiiwa.

¹¹Anamalipelela a mulako wa esidade yaalaleiya mutthenga ole ni waalaleiwatho mpaani mwa mwene.

¹²Mwene aavenya ohiyu, anaweerela asitokweenaawe a anakhotto: Kinimooleelani yeeyo awArami aavaanenlaaya. Yeenre esuwela weera ninnahaawa etala tivawo avennyaaya yaakonenlaayawo eniipithasa mutuphini yuupuwelaka: ‘Vekhaikhai awo anoovolowa waakonelingwe yuupwelaka weera khookhaliwe, ni vano nnimwaavara naavoleihaka musidadeni.’”

¹³Mutokweene mmoha a anakhotto aamulaka mwene: “Asilopwana akina ekuxeke ikavalu* ithanu sihanle musidadeni. Naarumihele anamitthenga weera yahottelewo. Vano ommaleloniwaya onuulikane ntoko ommaleloniwahu neenre nikhala oothorihiweene.”

¹⁴Vano aathanla ikaaro piili ni ikavalusaya* ni mwene aahaarumiha owaasaasa anakhotto a awArami. Aahaalamulela anamweettiha a ikaaro iye: “Murowe ni moone yeereiye.”

¹⁵Yaatthara mphito wa awArami mpaka oYordanu, ephwanyaka ikuwo ni ikapwitthi ephiroweeneeyo, mwa seiye yaahiyalaaya awArami etthawaka. Vano anamitthenga yaahokolowa, enamuthalihera mwene.

¹⁶Muloko waavenya, onahuhula yaakonenlaaya awArami, vano, iliitru* ithannamosa sa ephepa saathumihiwa exekeli* emoha ni iliitru* muloko ni piili sa esevada* saathumihiwatho exekeli* emoha, ntoko Yave aahimmaawe.

¹⁷Vanonto mwene aamukhaliha mulopwana ole, mwa yoowo aamukhavihenre mwene vamulako wa Elixa ntoko mutokweene a mulako wa esidade. Wa soothesene, muloko waamukwattula, onangwatta, anakhwa ntoko mulopwana a Muluku aahimmaawe ehuhuweene yeele mwene aarwiiyaawe owannyawe.

¹⁸Yeereiye ntoko mulopwana a Muluku aamweerenlaawe mwene: “Ehuhuweene yeela omaalo iliitru* ithannamosa sa ephepa sinoothumihiwa exekeli* emoha, ni iliitru* muloko ni piili sa esevada* sinoothumihiwatho exekeli* emoha vamulako wa oSamariya.”

¹⁹Ehuhuweene yeele mutokweene a anakhotto aamukhavihera mwene aamweerela mulopwana a Muluku: “Naari Yave ahulaka milako sa wiirimu, eyo kheeneereya.” Elixa aamwaakhula: “Munimoona ni maithwaanyu, mene khamucaru etthu!”

²⁰Yaaheereya hiihoweene, niwoko muloko waamukwattula onangwatta vamulako wa esidade, anakhwa.