Read Makhuwa-Shirima 1 Nyaha 10 Bible Online

1 Nyaha 10 - Makhuwa-Shirima bible

1 Nyaha 10

¹Vano, waaheereya weera yaawananaka aFilisti, aYixrayeli yaahoomoliwa, ni ancipale yaakhwela mmwaakoni Gilebowa.

²aFilisti yaamuttharelela Sawuli ni anamwanaawe, enamwiiva Yonatani, Abinadabe ni Malkixuwa, anamwane asilopwana a Sawuli.

³Awosa emurinceene Sawuli, ekhotto yaavihaxa, mpaka yaamuphwanya, enamulatha ananyuupa, anavulalaxa.

⁴Vano Sawuli aamulamulela yoowo aamukuxera ikapwitthisawe: “Otholole ekatanaawo ni okiive weera kihihaawe wuulihiheya muru woomorela mmatatani mwa oohiineliwa ala.” Vaheera yoowo aamukuxera ikapwitthisawe, aatondolowa ni khaatthunne opaka yeeyo. Hiiho Sawuli aakuxa ekatanaawe, aneemexa, aniivonyerawo.

⁵Vahoolowaya, yoowo aamukuxera ikapwitthisawe oonakaru weera Sawuli ohookhwa, aahiivonyeratho vakatananivawe, anakhwa.

⁶Hiiho, Sawuli aahookhwa vamoha ni anamwanaawe araru, mpakatho ekhapiraawe yootheene.

⁷aYixrayeli yaamanke mureyareyani yoonakaru weera anakhotto yaatthawa, ni Sawuli aahookhwa vamoha ni anamwanaawe, yaatthawa ehiyaka isidadesaya. Vahoolowaya, aFilisti yaarowa waakamela.

⁸Waaxiiye, aFilisti yaarongwaaya ohuhula mittembo, yaamphwannye Sawuli akhwenleene vamoha ni anamwanaawe mmwaako Gilebowa.

⁹Yaamuhita Sawuli, enakuxa ikapwitthisawe, enaarumihela anamitthenga mulaponi moothemwene mwa aFilisti, elaleiyaka ihaali eriyari ya milukusaya ni mulokwaaya.

¹⁰Yaahiikaathi ikapwitthisawe mpaani mwa milukusaya, enatthukelela muruwaawe mpaani mwa mulukwaaya Dagoni.

¹¹Amaki ootheene a oYabexi-Gileyade esuwelaka yeeyo aFilisti yaampankaaya Sawuli,

¹²oolipaxa murima a eriyaraaya yaarowasa, enakuxa muttembo wa Sawuli ni sa anamwanaawe, enarongha oYabexi. Wu yaavithelawo makhuvaayasa vamwirini mutokweene, enatthukasa mmahukuni mathannameeli.

¹³Sawuli okhwenle hiiho niwoko khaaroromeleiye wa Yave; khiiwelenle masu a Yave, mpaka aaphiyeraawe omukoherera muthiyana uuluma ni minepa sa anamakhwa,

¹⁴ahiyaka omukoherera Yave. Tivawo, Yave aamwinnyerenraawe mookhwaani, anamvaha omwene Davide, mwaana mulopwana a Yixai.