Read Makhuwa-Shirima 1 Nyaha 11 Bible Online

1 Nyaha 11 - Makhuwa-Shirima bible

1 Nyaha 11

¹aYixrayeli ootheene yaathukumana ni Davide oHeberoni, emweerelaka: “Hiyo nri emusaanyu xaxaxa.

²Khalayeene, naari Sawuli areene mwene, ti nyuwo mwaahoolela aYixrayeli mukhottonimwaya. Vano Yave Mulukwaanyu, aaweerelani: ‘Nyuwo munimwaakukhula aYixrayeli, mulokwaaka, ni munookhala namalamulaaya.’”

³Vano asitokweene ootheene a oYixrayeli, yaarowa omukumanano mwene Davide oHeberoni, ni weiwo owo aawiiraanannaaweno ohoolo wa Yave, ni iwe yaamuttikitthela Davide omwene wa oYixrayeli, ntoko Yave aahimalaawe mwa Samuweli.

⁴Davide ni aYixrayeli ootheene, yaarowasa oYerusaleemu, ori oYebusi. aYebusi, amaki a musidade,

⁵yaamweerelasa Davide: “Nyuwo khamungwera ovolowamo.” Wa soothesene Davide aawina moolipamo mwa oSiyoni, eri esidade ya Davide.

⁶Nihuku nne, Davide aaheera: “Yoowo aanaapacere waawanano aYebusi, onookhala mutokweene a anakhotto.” Vano Yowabe, mwaana mulopwana a Zeruwiya, ti aapacenre waawanano, tivawo aavahiwaawe otokweene wa anakhotto.

⁷Davide aakhala woolipawo, tivawo wiitthaniwaaya esidade ya Davide.

⁸Owo aarasela esidade, muxerexere moothemwene wa moolipamo, okhuma itarato mpaka ixiri saarukureenrewo, ni Yowabe, aareherera mpatta mukina waahanle wa esidade.

⁹Hiiho, Davide annapwaherera okhala ooweraxa, niwoko Yave, a ikuru sootheene aari ni yoowo.

¹⁰Masina ala anttharelana, yaari a asitokweene a anakhotto oottittimiheyaxa a Davide, mwa yaawo vamoha ni aYixrayeli ootheene yaathanlale omukhaliha Davide mwene, ntoko Yave aaroromelinghaawe.

¹¹Masineene ti ala: Yaxobeyami, muHakomoni, aahoolela asitokweene; ti yoowo aawiivale ni ekatanaawe anakhotto macira mararu mukhottoni emoha.

¹²Vahoolowaya aari Eleyazari, mwaana mulopwana a Dodai, ngwAhohi, mmoha a anakhotto ooweraxa araru.

¹³Owo aari ni Davide oPas — Dayimi, weiwo aFilisti yaathukumanenlaayawo ekhotto. Vanipuroni yaaraayawo ematta ya esevada* yincipale, anakhotto a aYixrayeli yaahaatthawasa aFilisti,

¹⁴mene awosa yaari ethataanelo eriyari ya mmatta. Awosa yaahaakiha ematta ele, enaavulalihasa aFilisti, ni Yave ahaawinihaxa.

¹⁵Mukuttula mmoha wa aFilisti okonenleene mureyareyani na oRefayimi, asitokweene araru eriyari ya asitokweene miloko miraru, yaarowasa omukumanano Davide vamwala ori vakhiviru wa nikhuku na wAdulami.

¹⁶Ehuhuweene yeele Davide aari woolipawo vale, ni anakhotto a aFilisti yaari oBeteleheemu.

¹⁷Davide aahaawelaxa maahi, eeraka: Ii! Aakhanle mutthu eera akiruuhele maahi a munttankhini nri vakhiviru wa mulako wa oBeteleheemu!

¹⁸Vano araru ale yaahiivolongha yaakonenlaayawo aFilisti, enarikasa maahi a munttankhini mmwe, enamuruuhela Davide. Vaheera owo aakhootta owura; ohiyanawaya, aayeeha apakaka yoomveleelela Yave.

¹⁹Davide aaheera: “Khoontthuniheriwaru vamaitoni wa Muluku opaka yeeyo! Maahi ala aneemelela ephome ya asilopwana ala yaalemve okumaaya!” Yeenre awosa yaleva okumaaya weera emuruuhele maahi, Davide khaatthunne owura. Wu waari ominya murima wa anakhotto oottittimiheyaxa araru ala.

²⁰Abixayi, munneiye Yowabe, aari mutokweene wa mukuttula wa anakhotto miloko miraru. Owo aahaawanano ni nivaka nimoha anakhotto macira mararu, anawiiva, anakhalano epili antoko araru ale.

²¹Owo aattittimihiwaxa opwaha mukuttula wa anakhotto miloko miraru, anathatuwa mutokweenaaya, mene khaalikananne araru ale.

²²Benaiya mwaana mulopwana a Yoheyada aari oominya murima, nakhotto a oKabezeeli, aawera opaka itthu sincipale. Aawiiva anakhotto eeli a ooreerela a oMowabe, ni nihuku nimoha na etthapwe, aakhuruwela mulittini noowiixera, anamwiiva mwatto.

²³Aamwiivatho ngwExipitu mmoha, aarino imeetru* piili ni vakhanani sa orakamawawe. ngwExipitu ole, aaroovarelaru nivaka, mwiittaaya waalikana yootthavela ya namatthava, Benaiya aangwanano ni ekopo. Aamwaakha ngwExipitu nivaka aavarenlaawe, anamwiivelano.

²⁴Iya saari soopaka sa Benaiya, mwaana mulopwana a Yehoyada, aarinotho epili ntoko anakhotto araru oottittimiheyaxa a Davide.

²⁵Owo aattittimihaxiwa ompwaha akhalaru mmoha a miloko miraru, mene khanaalikanane araru ale. Hiiho, Davide aamukhaliha mutokweene a anamalipelelaawe.

²⁶Anakhotto akina yaari ti ala: Asaheli, munneiye Yowabe; Elehanani, mwaana mulopwana a Dodo a oBeteleheemu;

²⁷Xamote, muHarori; Helezi, muPeloni;

²⁸Ira, mwaana mulopwana a Ikexi a oTekowa; Abiyezeri a wAnatote;

²⁹Sibekai, muHusate; Ilai, ngwAhohi;

³⁰Maarai, muNetofate; Helede, mwaana mulopwana a Baana, muNetofate;

³¹Itai, mwaana mulopwana a Ribai, muGibeyoni, mulaponi ya oBenyamini; Benaiya, muPiratoni;

³²Hurayi, a mmaxaapwani a oGaaxi; Abiyeli, ngwArbate;

³³Azimavete, muBaharimi; Eliyaba, muXaalboni;

³⁴anamwane asilopwana a Haxemi, muGizoni; Yonatani, mwaana mulopwana a Sage, muHarari;

³⁵Ahiyami, mwaana mulopwana a Sakari, muHarari; Elifali, mwaana mulopwana a Uri;

³⁶Heferi, mMekerati; Ahiya, muPeloni;

³⁷Hezeru, muKarameli; Naarai, mwaana mulopwana a Ezebai;

³⁸Yoweli, munneiye Natani; Mibehari, mwaana mulopwana a Hageri;

³⁹ngwAmoni Zeleke; Naarai, muBeroti, aamukuxera ikapwitthi Yowabe, mwaana mulopwana a Zeruha;

⁴⁰Ira ni Garebe, awIteri;

⁴¹Uriya, muHiti, Zabade, mwaana mulopwana a Ahelai;

⁴²Adina, mwaana mulopwana a Xiza, muRubeni, mutokweene a aRubeni ni a anakhotto miloko miraru;

⁴³Hanani, mwaana mulopwana a Maaka; Yosafate, mMiteni;

⁴⁴Uziya, ngwAxterati; Xama ni Yehiyeli, anamwane asilopwana a Hotami, ngwAroweri;

⁴⁵Yediyayeli, mwaana mulopwana a Ximeri, munneiye Yoha, muTizi;

⁴⁶Eliyeli, mMahavi; Yeribai ni Yosaviya, anamwane asilopwana a Elinaami; Itema, mMowabi,

⁴⁷ni Eliyeli, Obede ni Yaasiyeli, mMezobayi.