Read Makhuwa-Shirima 1 Nyaha 12 Bible Online

1 Nyaha 12 - Makhuwa-Shirima bible

1 Nyaha 12

¹Yaakhala asilopwana akina yiitakansenre ni Davide oZiklage, weiwo aamwiipithaawewo Sawuli, mwaana mulopwana a Kixi. Awosa yaari eriyari ya anakhotto yaamukhavihenre Davide mukhottoni;

²okhuma ntata noolopwana mpaka noothiyana yaavarela muteko muupa ni ekwamba yoovonyerano maluku. Awosa yaari a epuumba ya Benyamini ni ya Sawuli. Vano masinaaya yaari ti ala:

³Ahiyezeri, mutokweenaayasa, ni Yowaxi, mwaana mulopwana a Xemaahi, muGibeya; Yeziyeli ni Pelete, anamwane asilopwana a Azimavete; Beraka, Yewu, ngwAnatoti,

⁴ni Iximaiya, muGibeyoni, nakhotto mutokweene a anakhotto miloko miraru ni asitokweenaayasa; Yeremiya, Yahaziyeli, Yohanani, Yozabade, muGederati,

⁵Eluzai, Yeremote, Behaliya, Xemariya ni Xefatiya, muHarufi;

⁶aKorahi Elekana, Isexiya, Azareeli, Yohezeri ni Yaxobeyami;

⁷Yohela ni Zebadiya, anamwane asilopwana a Yerohayimi a oGedori.

⁸A epuumba ya Gadi, akina akina yaahiiraanano Davide moolipamwawe munikareni. Yaari anakhotto oominya murima, oolikaneene owana, ni yaasuwela owana ni exikudu* ni nivaka. Ekhalelowaaya yaari ntoko ya mwatto, ni yaari oowaaluwa ntoko naahe mmanyaakoni.

⁹Mutokweene aari ti Ezeri; anaaveeli Obadiya; anaararu Eliyabe;

¹⁰anaaxexe Miximana, anaathanu Yeremiya;

¹¹anaathannamosa Atayi; anaathanneeli Eliyeli;

¹²anaathannaararu Yohanani; anaathannaaxexe Elezabadi;

¹³anaamuloko Yeremiya; ni anaamuloko nimmoha aari ti Makebanai.

¹⁴aGadi ootheene ale, yaari asitokweene a anakhotto; mukhaanaaya aangwera waawanano anakhotto ncira, ni mutokweenaaya, waawanano anakhotto macira muloko.

¹⁵Ti yaala yaamulapungwe Yordanu, mweeri woopacera wa eyaakha, mooloko osareiyeene okhopela ni okhopela, enawoomolasa ootheene yaakhala mureyareyani okhuma mpatta ninkhuma nsuwa mpaka mpatta ninkela nsuwa.

¹⁶aBenyamini akina akina ni asilopwana akina a aYuda, yaahoorwatho wa Davide, moolipamwawe.

¹⁷Davide aarowa waakumanano, anaweerelasa: “Mwaarwaasiyeene mmuretteleni, weera mukikhavihere, kiri oolikaneene owaakhelani. Vaheera mwatthuna okilokottha ni okinnyerera mmatatani mwa amwiittanaaka, matataaka ehivanreeneru ya nipuhero, Muluku a makholowaahu, oone yeeyo ni oothorihaseni.”

¹⁸Vano, Munepa waamukhuruwela Amasai, mutokweene a anakhotto miloko miraru, ni owo aamweerela: “Ii! Davide, hiyo ti awinyu! Ii! Mwaana a Yixai, nri ni nyuwo! Sootheene siweetteleni nnene nyuwo nitho oowiiraananaanyu, niwoko Mulukwaanyu onimookhaviherani.” Hiiho Davide aawaakhelasa, anaakhaliha asitokweene a mikuttulasawe sa anamahuhula.

¹⁹Anakhotto akina akina a Manaxe yaatthawelela wa Davide owo aarongwaawe ni aFilisti ongwanano Sawuli. Awosa khayaakhavihenre aFilisti, niwoko asitokweenaaya aFilisti yaawoopererasa ni yaawoomolasa, yeeraka: “Nnoolivela ni okumi, Davide anihiya anahokoleela wa Sawuli, pwiiyaawe.”

²⁰Asilopwana a Manaxe, yaatthawelenle wa Davide, owo aarongwaawe oZikelage, ti ala: Adena, Yosabade, Yedihayeli, Mikayeli, Yozabade, Elihu ni Ziletai, asitokweene a anakhotto a macira muloko oManaxe.

²¹Awosa yaamukhavihera Davide waawanano anamahuhula, niwoko awosa yaari anakhotto oowera owana, ni yaari asitokweene a anakhottwaawe.

²²Vano, khula nihuku yannarwa anakhotto weera emukhavihere Davide, mpaka anakhottwaawe yaakhala ancipalexa ntoko anakhotto a Muluku.

²³Waatta wa anakhotto yaari oolikaneene orowa okhottoni mwa yaawo yaarwiiye wa Davide oHeberoni weera emwinnyerere omwene wa Sawuli ntoko Yave aahimalaawe, ti wu:

²⁴A epuumba ya Yuda, 6 800 oolikaneene owana ekhotto, ekuxaleene exikudu* ni nivaka;

²⁵a epuumba ya Simeyoni, 7 100 oolikaneene owana ekhotto;

²⁶a epuumba ya Leevi, 4 600,

²⁷vamoha ni Yehoyada, muhooleli a emusi ya Aharoni, vamoha ni anakhotto 3 700,

²⁸ni Zadoki, aari mmiravo ni murima woolipa ni mapwattapwattha miloko miili neeli a emusaawe;

²⁹a epuumba ya Benyamini, amusaawe Sawuli, macira miloko miraru, ancipale a yaawo yaari oororomeleya mweemusini ya Sawuli mpaka ehuhuweene yeele;

³⁰a epuumba ya Efrayimi, yaari anakhotto oowera owana ekhotto, oowiiwanyeyaxa mmahimonimwaya, 20 800;

³¹a eriyari ya epuumba ya Manaxe, yaathanliwe eromoliwaka masinaaya weera emvare omwene Davide, yaari anakhotto 18 000;

³²a epuumba ya Isakari, asilopwana yiiwexenxe ihuhu soottittimiheyaxa ni yaasuwenle moota aYixrayeli waatthuneyaaya weetta yaari asitokweene macira meeli ni imusisaya sootheene sa olamulawaya;

³³a epuumba ya Zebuloni, anakhotto ooxuttihiweene, oolikaneene owanano wakhalaru moota wa kapwitthi, yaalakenle omukhavihera Davide moota woomalela, yaari 50 000;

³⁴a epuumba ya Nafitali yaari ahooleli macira muloko ereeneno anakhotto 37 000 ekuxaleene ixikudu* ni mavaka;

³⁵a epuumba ya Dani, yaari anakhotto 28 600 oolikaneene owana ekhotto;

³⁶a epuumba ya Axeri, anakhotto ooxuttihiweene, oolikaneene owana ekhotto, yaari 40 000;

³⁷ni wa mpatta ninkhuma nsuwa oYordanu, a ipuumba sa Rubeni, sa Gadi ni eriyari ya epuumba ya Manaxe, yaari anakhotto 120 000 ekuxaleene ikapwitthi soohiyanahiyana.

³⁸Anakhotto ootheene ala yaahiixoonihera ni otthunawaya weera erumeele mmiserani. Yaahoorwa oHeberoni elakenleene moota woomalela omvara Davide omwene wa oYixrayeli wootheene. Hiiho, aYixrayeli ootheene akinaawo yaatthunaaya yaari etthu emohamoharu yeeyo.

³⁹Yaakhalasa ni Davide mahuku mararu, ecaaka ni ewuraka, niwoko amusaaya yaahaavahasa yoocaaya.

⁴⁰Amaki a ipuumba soowaattamana mpakatho a mmapuroni oorakamela ntoko Isakari, Zebuloni ni Nafitali, yaahaaruuhelasa sooca sincipale sikuxiwaka ni abuuru, ikamelu*, amula* ni imombe. Saahaattaxa sooca ntoko iya: Ephepa, iboolu sa ifiigu, iboolu sa iwuuva* soowuumihiwa, eviinyu, makhura, imombe ni ikhondoolo, niwoko waakhala ohakalalaxa oYixrayeli.