Read Makhuwa-Shirima 1 Nyaha 13 Bible Online

1 Nyaha 13 - Makhuwa-Shirima bible

1 Nyaha 13

¹Davide ahaakoherera asitokweenaawe ootheene — asitokweene a anakhotto macira muloko, ni a ncira nimoha.

²Vano owo aaheerela muthukumano wootheene wa aYixrayeli: “Nyuwosa mwaakhulenleene, ni wu waareene otthuna wa Yave, Mulukwaahu, naarumihele mutthenga axunnihu mulaponi moothemwene wa oYixrayeli, mpakatho wa asaserdoti* ni aLeevi ari ni yaawosa musidadenimwaya, weera erwe yiitakansere ni hiyo.

³Nrowe naahokoloxe Arka* a Mulukwaahu, niwoko khanaasaasa otthuna wa Muluku mweehuhuni ya olamula wa Sawuli.

⁴Vano muthukumano wootheene waahaakhulela, niwoko muloko wootheene waahoona weera wooreera.”

⁵Hiiho Davide aahaathukumanyiha aYixrayeli ootheene, okhuma mooloko Xihori, wExipitu, mpaka oLebo-Hamate, weera yaaruuhe oKiriyate-Yeyarimi Arka* a Muluku.

⁶Davide ni aYixrayeli ootheene yaarowasa oBaala, ori oKiriyate-Yeyarimi, oYuda, weera yaakuxe Arka* a Muluku, Yave akilaathenleene ehicaawe eriyari ya akerubini*; Arka* mwa yaawo aniitthaneliwa Nsinanawe.

⁷Vaate wa Abinadabe yaahaakuxa Arka* a Muluku mukaaroni enyowani, yeettihiwa ni Uza ni Ahiyo.

⁸Davide ni aYixrayeli ootheene, yaarowasa yiinaka ni yiipaka evihereyanxeene ohoolo wa Muluku, erumaka amakita, atthakare, ikoma, ikengere ni mapalapatta.

⁹Yaaphiyalaaya wamveeriwa etrigu wa oKidoni, Uza aahookola moono weera aavarele Arka*, niwoko imombe saakwattuliwa.

¹⁰Vano isara sa Yave saampattela Uza, ni Owo aamwiiva niwoko noowaatava Arka*. Uza aakhwenle vaavaale ohoolo wa Muluku.

¹¹Davide aanyoonyiwa, niwoko isara sa Yave aampattihenraawe Uza. Tivawo nipuro nne nniitthaniwaaya mpaka olelo va Perezi-Uza.

¹²Nihuku nne Davide aamoova Muluku aniikoha: “Moota heeni kineeraaka kiwere waahokoloxa Arka* a Muluku?”

¹³Tivawo aahiyalaawe waaruuha Arka* musidadeni ya Davide. Ohiyanawaya aaronghale vaate wa muGiti iitthaniwa Obedi-Edomi.

¹⁴Arka* a Muluku yaakhala owannyawe nyeeri miraru, ni Yave aareeliha emusaawe ni sootheene aarinaawe.