Read Makhuwa-Shirima 1 Nyaha 14 Bible Online

1 Nyaha 14 - Makhuwa-Shirima bible

1 Nyaha 14

¹Hirami mwene a oTiro, aamurumihela Davide anamitthenga, vamoha ni iviika sa esidari*, mpakatho mapatarero ni makalipinteiru weera emutekele empa ya emwene.

²Vano, Davide aahoona weera Yave aamwaakhulela okhalawawe mwene oYixrayeli ni annamweettiherela nnene omwenaawe moosivelani mulokwaawe aYixrayeli.

³oYerusaleemu Davide aahaathelatho asithiyana akina, anaayaratho anamwane asilopwana ni asithiyana.

⁴Masina a anamwane aayarenlaawe wu, ti ala: Xamuwa, Xobabe, Natani, Salomoni,

⁵Ibehari, Elixuwa, Elipelete,

⁶Noga, Nefege, Yafiya,

⁷Elixama, Beeliyada ni Elifelete.

⁸aFilisti yaasuwenlaaya weera Davide oovariwa omwene wa oYixrayeli wootheene, yaarowasa ni anakhotto ootheene weera emutthuke, mene Davide aasuwela yeeyo, anarowa waawanano.

⁹Afilisti evoleenleene nreyareya na oRefayimi,

¹⁰Davide aamukoha Muluku: “Kaawananeke aFilisti? Nyuwo munoowinnyerera mmatatanimwaka?” Yave aamwaakhula: “Murooke, Miyo kinoowinnyerera mmatatanimwanyu.”

¹¹Vano Davide ni anakhottwaawe, aarowa oBahali-Perazimi, ni Davide aahaawinasa, aneera: “Muluku ohaaphwata amwiittanaaka mwa matataaka, mooteene yoowo osareya wa maahi ontannyeraaya ophwata.” Hiiho nipuro nne, naattehiwa Bahali-Perazimi.

¹²Yeenre aFilisti yahiyawo milukusaya, Davide aalamulela weera sihisiwe.

¹³aFilisti yaahokoleelatho owana onreyareyani

¹⁴ni Davide aamukohereratho Muluku ni Owo aamwaakhula: “Muhaawanane ohoolo, mene mwaavirele ottuliwaya ni mwaawananeke ohoolo wa ibalsamu*.

¹⁵Vano nyuwo mwiiwaru oruma wa mikhitto musulu wa ibalsamu*, mvenyereke ekhotto, niwoko eyo eneneero enghima weera Yave oorowa ohoolowanyu weera awiive anakhotto a aFilisti.”

¹⁶Davide aapaka ntoko Yave aamulamulenlaawe, ni awosa yaahaawina anakhotto a aFilisti ephiroweeneeyo, okhuma oGibiyoni mpaka oGezeri.

¹⁷Hiiho epili ya Davide yaamwareela elapo yootheene, ni Yave aapakiha weera miloko sootheene simoove.