Read Makhuwa-Shirima 1 Nyaha 15 Bible Online

1 Nyaha 15 - Makhuwa-Shirima bible

1 Nyaha 15

¹Davide iitekenleene impasawe musidadeni ya Davide, owo aahaarehererela nipuro Arka* a Muluku, anaakungela eheema.

²Vano Davide aaheera: “Ti aLeevi paahi eneera yaateexeke Arka* a Muluku, niwoko Yave aathanlenle yeeyo ni weera erumeele ohoolowawe. Vano ola okhaleke ti mutekwaayeene wa mahuku ootheene.”

³Davide aahaathukumanyiha aYixrayeli ootheene oYerusaleemu weera yaaruuhe Arka* a Yave vanipuroni aarehererenlaawe.

⁴Aathukumanyihatho ekhapira ya Aharoni ni aLeevi:

⁵a ekhapira ya aKohati, Uriyeli, muhooleli, ni amusi ncira ni miloko miili;

⁶a ekhapira ya Merari, Asaya, muhooleli, ni amusi macira meeli ni miloko miili;

⁷a ekhapira ya Gerexoni: Yoweli, muhooleli, ni amusi ncira ni miloko miraru;

⁸a ekhapira ya Elisafani, Semaiya, muhooleli, ni amusi macira meeli;

⁹a ekhapira ya Heberoni, Eliyeli, muhooleli, ni amusi miloko mithannamiraru;

¹⁰a ekhapira ya Uziyeli, Aminadabe, muhooleli, ni amusi ncira ni muloko neeli.

¹¹Woottharelana Davide aahaathukumanyiha asaserdoti* Zadoki ni Abiyatari, ni aLeevi Uriyeli, Asaya, Yoweli, Xemaiya, Eliyeli ni Aminadabe.

¹²Owo aaweerelasa: “Nyuwosa ti mapwattapwattha a imusi sa aLeevi; nyuwosa ni asikhwiinyu aLeevi ontthuneya wiitteeliha ni waaruuha Arka* a Yave, Muluku a aYixrayeli, wa nipuro kaarehererenlaaka.

¹³Mweenre nyuwosa mwahaatexa Arka* emaara yoopacera, isara sa Yave, Mulukwaahu, sootannyera ophwatiwa eriyaraahu. Hiyo khanaamukoherenre moota heeni neeraahu niweettihe.”

¹⁴Vano, asaserdoti* ni aLeevi yaahiitteeliha weera yaateexe Arka* aYave, Muluku a oYixrayeli.

¹⁵Vano aLeevi yaahaakuxa Arka* a Muluku, yaathatelaka ni ikopo, ntoko Moisesi aalamulenlaawe, ettharihaka masu a Yave.

¹⁶Davide aahaalamulelatho ahooleli a aLeevi weera yaathanle eriyari ya axunnaya anamwiipa yiipe icipo sa ohakalala, siipiwaka ni ikaruma sa icipo: atthakare, amakita ni ikengere.

¹⁷Hiiho, aLeevi yaamuthanla Hemani, mwaana mulopwana a Yoweli; eriyari ya asikhwaawe Asafi, mwaana mulopwana a Berakiya ni eriyari ya aMerari, amusaaya, yaamuthanla Etani, mwaana mulopwana a Kuxaya;

¹⁸vamoha ni yaawosa, amusaaya yaari mukuttula wanaaveeli: Zakariya, Yaaziyeli, Xemiramoti, Yehiyeli, Uni, Eliyabe, Benaya, Maaseya, Matitiya, Elifelehu, Mikeneya, Obede-Edomi ni Yeiyeli yaari anamalipelela a milako.

¹⁹Anamwiipa Hemani, Asafi, ni Eta waatthuneya wiipa ikengere sa ebronze*;

²⁰Zakariya, Aziyeli, Xemiramoti, Yehiyeli, Uni, Eliyabe, Maaseya ni Benaya, waatthuneya owiipa atthakare, ettharihaka moota woowiipa oniitthaniwa alamoti*,

²¹Matatiya, Elifelehu, Mikeneya, Obede-Edomi, Yeyeli ni Azaziya, waatthuneya owiipa amakita, ettharihaka moota woowiipa oniitthaniwa Xeminiti*.

²²Kenaniya, mutokweene a aLeevi, aathanleliwe ociponi; owo waari mutekwaawe, niwoko owo annawerela mutekweene yoowo.

²³Berekiya ni Elikana yaari anamalipelela a milako ni waatthuneya waakhapelela Arka*.

²⁴Asaserdoti* Xebaniya, Yoxafati, Netaneli, Amasai, Zakariya, Benaya ni Eliyezeri, waatthuneya wiipa mapalapatta ohoolo wa Arka* a Muluku. Obede-Edomi ni Yehiya waatthuneyatho okhala anamalipelela a milako ni waawehaweha Arka*.

²⁵Hiiho, mfestani etokotoko Davide, asitokweene a aYixrayeli ni ahooleli a anakhotto macira muloko yaarowasa waakuxa Arka* a wiiraana a Yave yaari vaate wa Obede-Edomi.

²⁶Eenre Muluku aakhavihera aLeevi yaateexa Arka* a wiiraana a Yave, yaaveleeliwa aximombe athanneeli ni anapunci a ikhondoolo athanneeli.

²⁷Vano Davide aawara mukaandyo wa eliinyu* wootteettheya, ni hiihotho aLeevi ootheene yaateexa Arka*, anamwiipa nitho Kenaniya, mutokweene a anamwiipa. Davide aangwaratho mooxikotti a esaserdoti a eliinyu*.

²⁸Vano, aYixrayeli ootheene yaahaahoola Arka* a wiiraana a Yave ehakalanleene, ni oruma wa mapalapatta ni mapalapatta a manyaaka ni ikengere, vamoha ni oruma wa atthakare ni amakita.

²⁹Arka* a wiiraana a Yave yaavolowaaya musidadeni ya Davide, Mikali mwaana muthiyana a Sawuli, eera oonaka vaxanelani. Hiiho, waaheereya weera woomoona mwene Davide iinaka ni ahakalalaka, aamunyoosa ni murima.