Read Makhuwa-Shirima 1 Nyaha 16 Bible Online

1 Nyaha 16 - Makhuwa-Shirima bible

1 Nyaha 16

¹Awosa yaahaaruuha Arka* a Muluku, enawiikaathi muheemani aarehererenlaawe Davide, enapaka sooveleela soohisa, ni sa murettele ohoolo wa Yave.

²Apankeene sooveleela soohisa ni sa murettele, Davide aareeliha muloko mwa Nsina na Yave

³ni aamvaha khula mulopwana ni muthiyana muYixrayeli, epaawu emoha, eboolu ya itaamara* ni eboolu ya iwuuva* soowuumihiwa.

⁴Davide aahaathanla aLeevi akina akina weera erumeele ohoolo wa Arka* a Yave, evekelaka, etthapelaka ni emvuwihaka Yave, Muluku a oYixrayeli.

⁵Eriyari ya yaawosa, Asafi aari mutokweene, woottharelana aari ti Zakariya, ni vahoolowaya Yeyeli, Xemiramote, Yehiyeli, Matatiya, Eliyabe, Benaya, Obede-Edomi ni Yeyeli. Awosa, waatthuneya owiipa atthakare ni makita, Asafi iipaka ikengere.

⁶Asaserdoti* Benaya ni Yahaziyeli waatthuneya wiipa mapalapatta ehuhu yootheene ohoolo wa Arka* a wiiraana a Muluku.

⁷Naari nihuku nenenenne na emaara yoopacera Davide aamvanghaawe Asafi ni amusaawe ecipo yootthapela ela weera emvuwihaseke Yave:

⁸Muntthapele Yave, mukhuwelele Nsinanawe, mulaleiye eriyari ya miloko yeeyo Owo opankaawe.

⁹Mmwiipele Yoowo, mumvuwihe; muthalihe mitekosawe sootikhiniha sootheene.

¹⁰Mvuwihe Nsinanawe Nootteela; ohakalale murima wa yaawo ammwaasa Yave.

¹¹Mungwehe Yave ni ikurusawe, mwaasaase ekhovaawe imaara sootheene.

¹²Muupuwelele sootikhiniha Owo opankaawe mmiiriiranimwawe ni wa soolamulela ohimmaawe,

¹³ii! Ekhapira ya Yixrayeli, murumeiyaawe, ii! Anamwane asilopwana a Yakobe, oothanliwaawe.

¹⁴Owo ti Yave, Mulukwaahu; soolamulasawe sinooneya mulaponi yootheene.

¹⁵Mahuku ootheene onuupuwelela wiiraanawawe, sa masu olamulenlaawe ikhapira ikhapirasene,

¹⁶sa wiiraana opankaawe ni Abrahaamu, sa nlipelo ompakenlaawe Isaaki.

¹⁷Aamuroromelinghe yoowo Yakobe ntoko ekano, ni wa Yixrayeli ntoko wiiraana woohimala, eeraka:

¹⁸“Wa nyuwo kinimoovahani elapo ya oKanaani ntoko yoohiyeriwa muneeraanyu mukuxe.”

¹⁹Awosa nlelo ereene vakhaani, aani ehaattaxiyeru, ereenemo anamarwa,

²⁰yaaxoraxora elapo ni elapo, ni imwene ni imwene.

²¹Owo khaatthunihenre weera ekhale oowaahasula; ohaahiiha mamwene mwaha wa yaawosa, aalamulelaka:

²²“Muhaatave oottikittheliwaaka; muhaapakele yoonanara maprofeetaaka.”

²³Khula oxekuwa mmwiipele Yave! Khula nihuku mulaleiye ovuluxawawe!

²⁴Mulaleiye ovuwawawe eriyari ya ilapo, soopakasawe sootikhiniha eriyari ya miloko sootheene!

²⁵Vano Yave ti Mutokweene ni oophwanelaxa ovuwihiwa; Owo oovaxiweke opwaha miluku sootheene.

²⁶Miluku sootheene sa miloko ti soowootha, vaheera Yave oopaka irimu.

²⁷Waara ni ovuwa ori ohoolowawe; ikuru ni ohakalala onsareya woomakawawe.

²⁸Ii! Miloko sootheene sa mulaponi, simvuwihe Yave, ni silaleiye ovuwawawe ni ikurusawe.

²⁹Muttittimihe Nsina na Yave moota nimphwanelaaya. Muruuhe sooveleela ni murwe vamaithoniwawe. Munlape Yave ngwaarani wa otteelawawe.

³⁰Sithukumele ohoolowawe miloko sootheene! Elapo ya vathi yootekiheyaxa, ni eyo kheenttikinyeyaru!

³¹Irimu sihakalale ni etthaya etthape, ni eriyari ya miloko yeeriwe: “Onlamula ti Yave!”

³²Erume ephareiya ni sootheene sirimo; nitthape ntuphi ni sootheene sirimo!

³³Vano nyiri sa moothakoni sinimwiipa ni ohakalala, sinimwiipa ohoolo wa Yave, niwoko Owo ongwa othoriha elapo.

³⁴Muntthapele Yave, niwoko Owo ti ooreera; osivelawawe khoommala.

³⁵Mukhuwele: “Munivuluxe, ii! Muluku, Mvuluxaahu! Munithukumanyihe ni munitapuxe mwa miloko weera nitthapele Nsinananyu Nootteela ni ottottopeleyawanyu okhale ovuwawahu.”

³⁶Attottopeliwe Yave, Muluku a oYixrayeli, ohimmalaru. Vano muloko wootheene waakhuwela: “Ame! Attottopeliwe Yave!”

³⁷Davide aamuhiya Asafi ni emusaawe ohoolo wa Arka* a wiiraana a Yave weera erumeelewo woohihiyerera, ettharihaka sootthuneya sa khula nihuku

³⁸vamoha ni Obede-Edomi ni miloko mithanamosa ni athannararu akina. Vano Obede-Edomi, mwaana mulopwana a Yedutuni ni Hosa yaari anamalipelela a milako.

³⁹Davide aamuhiya Zadoki, musaserdoti*, ni asaserdoti* akinaawo ohoolo wa etabernaakulu* ya Yave vanipuroni noolapa na oGibiyoni yaamurumeelaayawo Yave.

⁴⁰Weiwo yaapaka sooveleela soohisa valtaarini* a sooveleela soohisa khula oxeexelo ni oxekuwa, ettharihaka sootheene silempwale munlamuloni na Yave, Owo aavanghaawe aYixrayeli.

⁴¹Hemani ni Yedutuni yaari ni yaawo, nitho akina yaaromoliwe masina weera emutthapele Yave, ekhuwelaka: “Osivelawawe khoommala.”

⁴²Hemani ni Yedutuni, mutekwaaya waari wiipa wa mapalapatta, ikengere ni ikaruma sikina soomwiipela Yave. Anamwane asilopwana a Yedutuni yaathanliwe okhala anamalipelela a milako.

⁴³Vahoolowaya muloko wootheene waattimula, khula mutthu arowaka owannyawe, ni Davide aahokoleela owaani weera areelihe emusaawe.