Read Makhuwa-Shirima 1 Nyaha 19 Bible Online

1 Nyaha 19 - Makhuwa-Shirima bible

1 Nyaha 19

¹Eviraleene ehuhu ekina, Nahaxi, mwene a awAmoni, aahookhwa, anamurandela mwaniye.

²Davide aahuupuwela: “Kimoonihere murima wooreera Hanuni, mwaana mulopwana a Nahaxi, niwoko atithawe yaakoonihera murima wooreera.” Hiiho, Davide aahaarumiha anamitthenga weera yampembese Hanumi mwaha wa okhwa wa atithawe. Vaheera anamitthenga a Davide yaaphiyalaaya mulaponi mwa awAmoni weera yampembese Hanuni mwaha wa okhwa wa atithawe,

³ahooleli a awAmoni yaamweerelasa: “Munuupuwela weera Davide onaattittimiherela atithinyu woowaarumiha anamitthenga weera yoopembeseni? Khaveetthuwo vawo! Davide aaruminghe ntoko anamahottela weera ehottele elapo ni ekuxe.”

⁴Vano Hanuni aahaatthukasa anamitthenga a Davide, anaametthasa ireru, anaahula vakhaani mpatta wa soowarasaya mpaka mmakhuttuni, anawoomolasa.

⁵Davide iiwakaru yeeyo, aahaarumiha anamitthenga weera yaakumanane, niwoko yaatepaxa oyevihasiwa, anaalamulelasa weera yaaleelase ha: “Mukhalase oYeriko mpaka omelela ireru, vahoolowaya, muhokoleelaseke owaani.”

⁶Hanumi ni awAmoni, yoonaka weera yaahiitannyera osoondiwa ni Davide, yaahooliha ikaaro sa ekhotto sa wArami-Naharayimi, wArami-Maaka ni oZoba, ni anamweettiha ikaaro, elivaka ni eparatha* yaalemela ikiilu* 30 000.

⁷Yaahooliha ikaaro 32 000 ni anamweettihaaya, yaahiiwananano mwene a oMaaka vamoha ni anakhottwaawe. Owo aahoorwa, anakonela vakhiviru ni oMedeba, ni awAmoni yahiitthanasiwa musidadenimwaya, enattimula erowaka okhottoni.

⁸Davide asuwelaka yeeyo, aamulamulela Yowabe weera attimule vamoha ni anakhotto ootheene.

⁹awAmoni yaavenyasa, enathataanela owana vamulako wa esidade, ni mamwene yaarwiiye yaathataanenle vanlakalakani.

¹⁰Yowabe oonaka weera sookhala mikuttula miili — mmoha ohoolo ni mukina ottuli — aahaathanla anakhotto akina akina ooreerela a oYixrayeli, anaareherera weera yawane ni awArami.

¹¹Anakhotto yaahanle akinaawo, aahaakuxa weera elamuliweke ni Abixayi, munneiye Yowabe, anaareherera weera yaawananeke awAmoni.

¹²Yowabe aamweerela Abixayi: “awArami yalipaxa okipwaha miyo, murwe mukikhavihere; vaheera awAmoni yalipaxa woopwahani nyuwo, miyo kinimoorwa wookhaviherani.

¹³Mulipe ni niwane nnenesene mwa mulokwaahu ni mwa isidade sa Mulukwaahu, ni weera Muluku apake yeeyo eri ya otthunawawe.”

¹⁴Vano Yowabe vamoha ni anakhottwaawe, yaahaawanano awArami mwa yaawo yaamutthangwe.

¹⁵awAmoni yoonaka weera awArami yaamutthawa Yowabe, awosa yaamutthawatho munneiye Abixayi, enavolowasa musidadeni. Vahoolowaya, Yowabe aahokoleela oYerusaleemu.

¹⁶awArami esuwelaka weera yaawiniwa ni aYixrayeli, yaahaarumihasa anamitthenga weera yaaruuhe awArami yaakhala okhopela Efratesi, ni Xopehaki, mutokweene a anakhotto a Hadadezeri, aahoorwa ohoolowayasa.

¹⁷Davide aleeliweene yeeyo, aahaathukumanyiha aYixrayeli ootheene, anamulapuwa Yordanu; aahaarowelasa, anaathata anakhottwaawe weera yaawanane yaaluluwananaka. Vaheera epaceraka ekhotto,

¹⁸awosa yaatthawasa ohoolo wa aYixrayeli, ni Davide aawiiva anamweettihaaya ikaaro sa ekhotto macira miloko mathannameeli, ni 40 000 a anakhottwaaya. Aamwiivatho Xopehaki, aari mutokweene a anakhottwaaya.

¹⁹Anamakhavihera a Hadadezeri yoonakaru weera yaawinasiwa ni aYixrayeli, yaapaka murettele ni Davide, eniixinnyererasa wa yoowo. Hiiho, awArami khayaatthunnetho waakhavihera awAmoni.