Read Makhuwa-Shirima 1 Nyaha 22 Bible Online

1 Nyaha 22 - Makhuwa-Shirima bible

1 Nyaha 22

¹Vano Davide aaheera: “Nna ti nipuro wa Empa ya Muluku, Yave, ni na altaari* a sooveleela soohisa wa aYixrayeli.”

²Davide aalamulela weera ethukumanyihiwe anamarwa yaakhala oYixrayeli, ni eriyari ya yaawosa, aahaathanla atthu anamapwexa maluku weera erehererase maluku ookheriwa ootekela Empa ya Muluku.

³Owo aavaha eyuuma yincipale yoohanela misomaari ni sooweemelela masele, mpakatho ebronze* opwaha moota yeeraaya eringiwe olemelawaya.

⁴Aavahatho iviika sa esidari* soohaalikeleya niwoko aSidoni ni aTiri, yaamuruuhela Davide esidari* yincipalexa.

⁵Davide uupuwela ha: Mwanaka mulopwana Salomoni ori mmirawo ohixuttihingwe nnenesene. Vano Empa aneeraawe atekeliwe Yave ontthuneya okhala yootikhiniheyaxa, ya epili etokotoko ni yoowaaraxa vamaithoni wa miloko sootheene. Tivawo kineeraaka kihiye sootheene soorehereriwasene kihinaaye okhwa.”

⁶Davide aalamulela wiitthaniwa mwaniye Salomoni, anamulamulela omutekela Empa Yave, Muluku a oYixrayeli,

⁷amweerelaka: “Mwanaka, vamurimaniwaka kaatthuna oteka Empa ya Yave, kittittimiherelaka Nsina na Yave, Mulukwaaka.

⁸Vaheera Yave aahuuluma ni miyo: ‘Nyuwo moowiiva atthu ancipale ni moowana ikhotto sincipale. Tivawo muneeraanyu muhikitekele Empa yoottittimiherela Nsinanaka, niwoko mooyeeha ephome yincipale mulaponi, ohoolowaka.

⁹Vaheera nyuwo munoomuyara mwaana mulopwana anaakhale a murettele, ni Miyo kinoopakiha weera owo akhalane murettele ni amwiitana ootheene a mukhwipimwawe. Anaattehiwe Salomoni, ni Miyo kinoomvaha murettele ni mmaaleleyo oYixrayeli mweehuhuni ya olamulawawe.

¹⁰Ti yoowo anaateke Empa attittimiherelaka Nsinanaka. Miyo kinookhala Atithawe ni owo onookhala mwanaka. Hiiho, Miyo kinoolipiha wa mahuku ootheene ehice ya omwenaawe mwa aYixrayeli.’

¹¹Vanonto mwanaka, Muluku akhale ni weyo, ni Owo oowerihe oteka Empa ya Yave, Mulukwaawo, ntoko Owo eenraawe weera weyo onoopaka.

¹²Yave ookhalihaka muhooleli a aYixrayeli, Owo oovahe miruku ni wiiwexexa, weera weyo wiiwelele Nlamulo na Yave, Mulukwaawo.

¹³Weyo sinooweettela nnenesene wiipasoopa wiiwelela ikano ni malamulo Yave aavanghaawe aYixrayeli mwa Moisesi. Olipe ni ominye murima! Ohoove ni ohiporore!

¹⁴Ngwiilipiheraxani, koorehererela Empa ya Yave, ikiilu* 3 400 sa eyuuma yoorikaxa, ikiilu* 34 000 sa eparatha*, mpakatho sa ebronze* ni eyuuma ehingwereya waalikela, ohiya itthaabwa ni maluku. Ni weyo onoowera waandyeerera waatta wa ikaruma iyo.

¹⁵Weyo wookhalano anamiteko ancipalexa: anamapwexa maluku, mapatarero ni makalipinteiru, mpakatho aneettottho a wakhalaru moota wa muteko,

¹⁶ntoko ni eyuuma yoorikaxa, eparatha*, ebronze* ni eyuuma. Vano opacereke muteko, ni Yave akhale ni weyo.”

¹⁷Vano Davide aahaalamulela ahooleli ootheene a oYixrayeli weera emukhavihere mwanawe Salomoni.

¹⁸Owo aaweerela: “Vekhaikhai Yave, Mulukwaanyu ori ni nyuwosa ni ohoovahani murettele. Vano Owo oowinnyerera amaki a elapo ela mmatatanimwaka, ni eyo enlamuliwa ni Yave vamoha ni mulokwaawe.

¹⁹Vano, mmwaase Yave, Mulukwaanyu ni murimaanyu wootheene ni okumaanyu wootheene. Mpacereke oteka Nipuro Nootteela* na Yave Muluku, weera nyuwosa ngwere waaruuha Arka* a Yave, ni ikaruma sootteelihiwa siri sa Muluku, wa Mpaani mwa Yave eniitekiwe nittittimihereliwaka Nsina na Yave.”