Read Makhuwa-Shirima 1 Nyaha 23 Bible Online

1 Nyaha 23 - Makhuwa-Shirima bible

1 Nyaha 23

¹Davide uuluvalanxeene, aamvara omwene wa oYixrayeli mwaniye mulopwana Salomoni.

²Owo aahaathukumanyihatho ahooleli ootheene a oYixrayeli, mpakatho asaserdoti* ni aLeevi.

³Yaahaalikeliwa aLeevi yaarino iyaakha miloko miraru woorowa ohoolo ni waattawaya waaphiyera 38 000.

⁴Davide aahaathanla 24 000 a yaawosa weera ewehawehe muteko wa Empa ya Yave, nitho macira miloko mithannamosa weera ekhale asitokweene ni aphuki.

⁵Vano macira miloko mixexe akina mutekwaaya okhaleke woolipelela milako, ni macira miloko mixexe akinatho emvuwiheke Yave ni ikaruma sa masoma, Davide aapankaawe ciireru.

⁶Davide aahaakawanyiha aLeevi, attharihaka mikuttula sa anamwane asilopwana a Leevi: Gerexoni: Kohati ni Merari.

⁷Anamwane asilopwana eeli a Gerexoni: Ladani ni Ximeyi.

⁸Anamwane asilopwana a Ladani: A ntthaara, Yehiyeli, woottharelana Zetani ni Yoweli; ootheene awo yaari araru.

⁹Anamwane asilopwana a Ximeyi: Xelomoti, Haziyeli ni Harani; ootheene awo yaari araru. Alasa yaari mapwattapwattha a imusi sa Ladani.

¹⁰Anamwane asilopwana a Ximeyi: Yahate, Ziza, Yehuxi ni Beriya. Alasa yaari anamwane asilopwana a Simeyi — ootheene awo, yaari axexe.

¹¹Mwaana a ntthaara aari Yahate, ni anaaveeli aari Ziza, vaheera Yehuxi ni Beriya khayaarino ikhapira sincipale, tivawo yaalikeliwaaya ntoko a emusi emoha.

¹²Anamwane asilopwana a Kohati: Amrami, Izehari, Heberoni ni Uziyeli — ootheene awo yaari axexe.

¹³Anamwane asilopwana a Amrami: Aharoni ni Moisesi. Aharoni aamwalamwalihiwa, owo ni ekhapiraaweene wa mahuku ootheene weera aatteelihereke itthu sootteelaxa, ompakela sooveleela Yave, orumeela ohoolowawe ni oreeliha mwa Nsinanawe wa mahuku ootheene.

¹⁴Anamwane asilopwana a Moisesi, mulopwana a Muluku, yaalikeliwe ntoko mpatta wa epuumba ya Leevi.

¹⁵Anamwane asilopwana a Moisesi: Gerexomi ni Eliyezeri.

¹⁶Xubayeli aari pwattapwattha a ekhapira ya Gerexomi.

¹⁷Rehabiya ari pwattapwattha a ekhapira ya Eliyezeri. Eliyezeri khaamuyanreru mwaana, vaheera Rehabiya aakhalano anamwane ancipale.

¹⁸Xelomite aari pwattapwattha a anamwane asilopwana a Izehari.

¹⁹Anamwane asilopwana a Heberoni: Yeriya aari a ntthaara, anaaveeli aari ti Amariya, anaararu Yahaziyeli ni anaaxexe Yekameyami.

²⁰Anamwane asilopwana a Uziyeli: A ntthaara aari Mika, ni anaaveeli aari Isexiya.

²¹Anamwane asilopwana a Merari: Maheli ni Muxi. Anamwane asilopwana a Maheli: Eleyazari ni Kixi.

²²Eleyazari aakhwiiye aahaayanre anamwane asilopwana — aarino asithiyanaru. Axirokoraya a wuutiithini, anamwane asilopwana a Kixi, ti yaathelanse yaawosa.

²³Anamwane asilopwana a Muxi: Maheli, Ederi ni Yeremoti; ootheene awo yaari araru.

²⁴Iya ikhapira sa Leevi saalikeliwaka mweemusinimwaya, eyo tiiyo mapwattapwattha a imusi yaalepeliwe ettharihiwaka masinaaya ni yaalikeliwe mutthu ti mutthu, a iyaakha miloko miili woorowa ohoolo, yaarumeela Mpaani mwa Yave.

²⁵Vano Davide aaheera: Eenre Yave, Muluku a oYixrayeli, iitthuuwiha mulokwaawe, anarwa omaka oYerusaleemu wa mahuku ootheene,

²⁶aLeevi khoontthuneyatho oteexa etabernaakulu* hata ikaruma simvareliwamo muteko.

²⁷aLeevi yaahaalikeliwa, okhuma a iyaakha miloko miili woorowa ohoolo, sittharihiwaka soolamula sookisera sa Davide.

²⁸Sootthuneya sa aLeevi, waari okhavihera ikhapira sa Aharoni mmutekoni wa Empa ya Yave: yaawehaweha mapuwa, isaala sa omokoni, mootteelihani wa itthu sootheene sootteeliheriwa ni miteko sikina sa Empa ya Muluku.

²⁹Yaawehaweha epaawu yootteeliheriwa, ephepa yoopakela sooveleela sa irooro, iboolu soohikhalano eferementu, wooxa epaawu ni weetheya ephepa vamoha ni olemela ni miringo sootheene.

³⁰Ohiya yeeyo, waatthuneya wiixoonihera khula oxeexelo ni oxekuwa weera etthapele ni emvuwihe Yave,

³¹ni imaara sootheene sapakiwaaya sooveleela soohisa wa Yave muSaabaduni, mufestani sa mweeri munyowani ni mufestani soothanliwa. Waatthuneya orumeela imaara sootheene ohoolo wa Yave, ottharihiwaka waatta ni moota yaalepeliwaaya.

³²Hiiho, ti aLeevi yaawehaweha Eheema ya Muthukumano*, Nipuro Nootteela*, ni waakhavihera axunnaya, ekhapira ya Aharoni mwa muteko wa Empa ya Yave.