Read Makhuwa-Shirima 1 Nyaha 28 Bible Online

1 Nyaha 28 - Makhuwa-Shirima bible

1 Nyaha 28

¹Davide aahaathukumanyiha oYerusaleemu asitokweene ootheene a oYixrayeli: Ahooleli a ipuumba, asitokweene a mikuttula sa anakhotto a mwene, asitokweene a anakhotto macira muloko ni asitokweene a anakhotto ncira, ahooleli ootheene yaawehaweha ittima ni mihuwo saari sa mwene ni anamwanaawe asilopwana, vamoha ni asitokweene a empa ya emwene, anakhotto oottittimiheyaxa ni anakhotto ooweraxa ootheene.

²Mwene Davide aaheemela, aneera: “Mukiwiriyane axunnaka ni mulokwaaka. Kaatthunaxa vamurimaniwaka oteka Empa ya Yave, weera mwemmo kiwiikaathi Arka* a wiiraana a Yave, moonyikaliheramo inaawo sa Mulukwaahu ni kaavaanela weera kiteke.

³Vaheera Muluku ookeerela: ‘Nyuwo khamukitekela Empa yoottittimiherela Nsinanaka, niwoko nyuwo muri nakhotto ni moowiiva atthu ancipale.’

⁴Vanonto Yave, Muluku a oYixarayeli, ookithanla eriyari ya emusaaka yootheene weera kikhale mwene a oYixrayeli, wa mahuku ootheene. Owo oomuthanla Yuda ntoko muhooleli, ni mpuumbani mwa Yuda, oothanla emusaaka ni eriyari ya anamwane asilopwana a atithaka Owo ootthuna okikhaliha mwene a oYixrayeli wootheene.

⁵Hiiho, eriyari ya anamwane ancipale okivanghaawe, oomuthanla Salomoni weera akilaathele ehice ya emwene ya Yave, oYixrayeli.’

⁶Owo ookeerela: ‘Mwaninyu mulopwana Salomoni, ti anaakitekele Empa ni mapuwaaka, niwoko Miyo koomuthanla weera akhale mwanaka, ni Miyo kinookhala atithawe.

⁷Owo apwaherera wiiwelela malamulowaaka ni soorumasaka ntoko ompakaawe olelo, kinoolipiha omwenaawe wa mahuku ootheene.’

⁸Tivawo kinooleelaakani vaanaano va ohoolo wa aYixrayeli ootheene ni muthukumano wa Yave, Mulukwaahu: Mwiiwelele soolamula sootheene sa Yave Mulukwaanyu weera mukhale mulaponi ela yooreera ni muhiyere ikhapirasanyu wa mahuku ootheene.

⁹Vano weyo mwanaka Salomoni, omusuwele Muluku a atithawo, ni omurumeele ni murima wootheene, ohinyesereriwaka, niwoko Yave ongwehaweha mirima sootheene ni onsuwela wiixera wa soowuupuwela sootheene. Weyo wamwaasaasa, onoomphwanya, vaheera wamuhiya, Owo onimookhootta wa mahuku ootheene.

¹⁰Woone, Yave oothanlenle oteka Empaawe mwa yeeyo eniikhale Nipuro Nootteela*. Olipe ni ovare muteko.”

¹¹Vano Davide aamvaha mwaniye mulopwana Salomoni eyoonihero ya moota wooteka nipithela* na Empa ya Yave, ikwaartusaya, moosungamo, ikwaartu sa osulu, isaalasaya, ni nipuro noorehererela wiiwanana ni Yave.

¹²Aamvahatho iyoonihero sootheene sa matekelo ootheene, mwa seiyo Munepa waahenlaaya vamurimanivawe, mwaha wa mapuwa a Empa ya Yave, ni isaala sootheene sa mukhwipimwaya, moosungamo moothemwene mwa Empa ya Muluku, ni moosungamo soovaha sootteelihiwa.

¹³Aamuxuttihatho makawanyihero mikuttula sa asaserdoti*, sa aLeevi ni mavarelo miteko sootheene Mpaani mwa Yave, ni ikaruma seera sivareliweke muteko.

¹⁴Aakhaliha muringo wa olemela wa eyuuma yoorikaxa wa ikaruma sootheene sa eyuuma yoorikaxa ni olemela wa eparatha* wa ikaruma sootheene sa eparatha* seera sivareliweke miteko soohiyanahiyana.

¹⁵Owo aamuleela olemela wa eyuuma yoorikaxa wa khula onyaari ni nyettosaya, ni olemela wa eparatha* wa khula onyaari ni nyettosaya;

¹⁶olemela wa eyuuma yoorikaxa wa khula meesa a ipaawu sootteeliheriwa, olemela wa eparatha* wa meesa a eparatha*,

¹⁷olemela wa eyuuma yoorikaxa yooreera wa igarfu, ibasiya soomiserano ni wa ikoomixi*, olemela wa eyuuma yoorikaxa wa khula nipoottoro* na eyuuma yoorikaxa, olemela wa eparatha* wa khula nipoottoro na eparatha*,

¹⁸ni olemela wa eyuuma yoorikaxa yaareherereliwe altaari* a erubani*. Aamvahatho eyoonihero ya ekaaro ya akerubini* a eyuuma yoorikaxa ni mapuphaaya ookungeyeene yaakosoopa Arka* a wiiraana a Yave.

¹⁹Davide aamweerela Salomoni: “Sootheene iya kaalepa kihooleliwaka ni Yave, ni Owo ookiweriha weera kiiwexexe sootheene iya.”

²⁰Davide aamweerelatho: “Olipe ni ominye murima! Ovare muteko! Ohoove hata ohiporore, niwoko Muluku, Yave Mulukwaaka, ori ni weyo. Owo kharwa oohiya hata oothaama mpaka omala otekiwa wootheene wa Empa ya Yave.

²¹Mikuttula sa asaserdoti* ni sa aLeevi soolikana wa miteko sootheene sineera sivariweke Mpaani mwa Muluku, ni weyo onuukhaviheriweke ni asilopwana angweraxa ovara wakhalaru muteko. Ahooleli ni muloko wootheene animwiiwelela soolamulelasawo sootheene.”