Read Makhuwa-Shirima 1 Nyaha 5 Bible Online

1 Nyaha 5 - Makhuwa-Shirima bible

1 Nyaha 5

¹Ala yaari anamwane asilopwana a Rubeni, ntthaara na Yixrayeli. Vanonto, owo ti aari ntthaara na Yixrayeli, vaheera eenre aakonano amwaaraya atithawe, soophwanelasawe sa ontthaara yaavahiwa anamwane asilopwana a Yoseefe, mwaana mulopwana a Yixrayeli, moota wooweera Rubeni khaalikeleliwe ntoko ntthaara munamalepelani a mukhapirani.

²Yuda aarookhalaru ooweraxa a axunneiye, ni mwa yoowo aarookhumelelaru muhooleli, soophwanela sa ontthaara aavahiwe ti Yoseefe.

³Anamwane asilopwana a Rubeni, mwaana a ntthaara na Yixrayeli: Hanoki, Palu, Hezeroni ni Karmi.

⁴Ekhapira ya Yoweli: Mwaniye iitthaniwa Xemaiya, tiithi a Goge, tiithi a Ximeyi,

⁵tiithi a Mika, tiithi a Rehaya, tiithi a Bahali,

⁶tiithi a Beera, mwa yoowo Tigelati-Pileseri, mwene a wAsiriya, aaronghale wootthukiwani elapo ekina. Beera aari muhooleli a epuumba ya Rubeni.

⁷Amusaawe, yaalempwale ettharihiwaka mahimwaaya, munamalepelani a mukhapirani: Yeyeli, aari mutokweene, Zakariya

⁸ni Bela, mwaana mulopwana a Azazi, mwaana mulopwana a Xema, mwaana mulopwana a Yoweli. Awosa yaarowa okhala mulaponi ekhumme wAroweri mpaka omwaako Nebo ni Bahali-Meyoni.

⁹Vano, wa mpatta ninkhuma nsuwa, yaahaakamela elapo erongwe mpaka onikareni, enaphiya omoolokoni Efratesi, niwoko mihuwosaya saahaandyeerereya oGileyade.

¹⁰Mweehuhuni ya olamula wa Sawuli, awosa yaavolowa mukhottoni, yaawananaka aHagari, enaawinasa, enaakamela mookonelamwaya mulaponi moothemwene wa mpatta ninkhuma nsuwa oGileyade.

¹¹Epuumba ya Gadi yaakhala vakhiviruwaya, okhuma elapo ya oBaxani mpaka oSaleka.

¹²Yoweli ti aari mutokweene oopacera a mahimo a oBaxani, anaaveeli Xafami; ni akinaawo yaari Yanai ni Xafate.

¹³Asitithaya yaalikeliwe imusi imusi, ti ala: Mikayeli, Mexulami, Xeba, Yorai, Yakani, Ziya ni Eberi. Ootheene awo yaari athanneeli.

¹⁴Awosa yaari a ekhapira ya Abihayali, mwaana mulopwana a Huri, mwaana mulopwana a Yarowa, mwaana mulopwana a Gileyade, mwaana mulopwana a Mikayeli, mwaana mulopwana a Yexixai, mwaana mulopwana a Yahedo, mwaana mulopwana a Buzi.

¹⁵Ahi, mwaana mulopwana a Abediyeli ni osuulu wa Guni, ti aari mutokweene a emusi ele.

¹⁶Epuumba ya Gadi, yaamanke oGileyade, oBaxani vamoha ni mittetthesaya ni othanuwa wootheene wa moocihamo wa oXaroni.

¹⁷Ootheene awo yaalikeliwe munamalepelani a mukhapirani mweehuhuni ya olamula wa Yotami, mwene a oYuda ni ya Yerobowami, mwene a oYixrayeli.

¹⁸Ipuumba sa Rubeni, Gadi ni eriyari ya epuumba ya Manaxe, saakhalano anakhotto 44 760, oowera ovarela exikudu* ni ekatana, ovarela muteko muura, ni ooxuttihiweene owana ekhotto.

¹⁹Awosa yaavolowasa mukhottoni, yaawananaka aHagari, aYeturi, aNafisi ni aNodabi.

²⁰Ewanaka hiihaale, yaamukhuwelela Muluku, mwa Yoowo aakhavihenre, awinnyereraka mmatatanimwaya aHagari ni oowiiraananaaya ootheene. Muluku aawaakhula, niwoko yaamuroromela Yoowo.

²¹Vano yaakuxasa mihuwo sa aHagari, ikamelu* 50 000, ikhondoolo 250 000 ni abuuru macira miloko miili. Yaahaavaratho, enaatthuka atthu 100 000.

²²Hiiho, yaahookhwa amwiittana ancipale niwoko ekhotto ele yaari ya Muluku. Awosa yaahaakamela elapo ele mpaka ehuhu yooronghiwa wootthukiwani elapo ekina.

²³Eriyari ya epuumba ya Manaxe yaahaattaxa, eniitekiha mulaponi ekhumme oBaxani mpaka oBahali-Hermoni, eyo tiiyo, mpaka oSeniri (omwaako Hermoni).

²⁴Mapwattapwattha a imusi sa epuumba ela, yaari ti ala: Eferi, Ixi, Eliyeli, Azriyeli, Yeremiya, Hodaviya ni Yakdiyeli. Awosa yaari anakhotto ooweraxa, asilopwana a epili ni mapwattapwattha a imusisaya.

²⁵Vaheera khayaaroromeleiye wa Muluku a makholowaaya, enararuwasa, ettharaka miluku sa miloko aaphwantaawe Muluku ohoolowaya.

²⁶Tivawo Muluku a oYixrayeli, aamutannyenraawe Puli, ori Tigelati-Pileseri, mwene a wAsiriya weera akuxe ipuumba sa Rubeni, Gadi ni eriyari ya epuumba ya Manaxe, wootthukiwani. Aahaarongha oHala, oHabori, oHara ni wa mooloko Gozani, mwa weiwo araayawo mpaka olelo va.