Read Makhuwa-Shirima 2 Nyaha 1 Bible Online

2 Nyaha 1 - Makhuwa-Shirima bible

2 Nyaha 1

¹Salomoni, mwaana mulopwana a Davide, aahiitekiha moota woolipa moomwenenimwawe, niwoko Yave, Mulukwaawe, aari ni yoowo anamutatuxa ooweraxa.

²Vano Salomoni aahuuluma ni aYixrayeli ootheene — ni ahooleli a anakhotto macira muloko ni a ncira, aphuki, ahooleli ootheene a oYixrayeli ni asitokweene a imusi.

³Vahoolowaya, mwene vamoha ni muthukumano wootheene, aarowa vaNipuroni Nootteela* na oGibiyoni, niwoko Eheema ya Muthukumano* yaari weiwe, yeele aapankaawe Moisesi murumeiyi aYave munikareni.

⁴Vano Davide aahaateexa Arka* a Muluku okhuma oKiriyate-Yeharimi mpaka eheema owo aakungenlaawe oYerusaleemu.

⁵Vaheera altaari* a ebronze* mwa yaawo Bezaleli, mwaana mulopwana a Uri, ni osuulu wa Huri, aapankaawe, yaari oGibiyoni ohoolo wa etabernaakulu* ya Yave. Tivawo Salomoni ni muthukumano wootheene yaamukoherenraayawo Yave.

⁶Salomoni aamveleelela Yave sooveleela soohisa macira muloko valtaarini* a ebronze, Muheemani ya Yave.

⁷Ohiyuweene yoole, Muluku aahiixoonihera wa Salomoni, anamweerela: “Yakhalaru etthu muneeraanyu mukivekele, Miyo kinimoovahani.”

⁸Salomoni aamwaakhula: “Nyuwo mwaawoonihera onnene atithaka Davide, munakikhaliha namarandelaaya.

⁹Vanonto Yave, Muluku, mukwanihere yeeyo mwaaroromelinghaanyu atithaka, niwoko mookikhaliha mwene a muloko woowaattaxa ntoko ntthupi.

¹⁰Mukivahe miruku ni esuwelo, weera miyo kiwere ohoolela muloko ola. Vano taani anaawere olamula mulokwaanyu mutokotoko ola?”

¹¹Muluku aamweerela Salomoni: “Yeenre ela ekhalaka yoohaawela ya murimaanyu, ni nyuwo muhivekelaka mihakhu, hata sooreela, naari nttittimiho, hoye hoye okhwa wa amwiittanaanyu, hata okumi mwincipale, mene miruku ni esuwelo weera mulamule mulokwaaka, mwa yoowo Miyo kookhalihenraakani mwene,

¹²nyuwo munimwaakhela yeeyo mvekenlaanyu. Kinimoovahanitho mihakhu, sooreela ni nttittimiho, ohitonkwaawe okhalano akhalaru mwene aari nyuwo muhinaaye okhalano, ni khakhalatho anaakhalane vahoolo wa nyuwo.”

¹³Vano Salomoni aahokolowa nipuro noolapa na oGibiyoni, oohoolo wa Eheema ya Muthukumano*, anarowa oYerusaleemu, anaalamula aYixrayeli.

¹⁴Salomoni aathukumanyiha ikaaro ni ikavalu*, mpaka aakhalano ikaaro sa ikavalu* 1 400 ni ikavalu* 12 000, mwa seiyo mpatta mukina saalipeleliwa musidadeni sikina sikina, ni mpatta mukina saari vakhiviruwawe oYerusaleemu.

¹⁵Mwene aahaandyeereraxa eparatha* ni eyuuma yoorikaxa oYerusaleemu ntoko ereene maluku, ni nyiri sa esidari* saahaattaxa ntoko ifiigu sa nthupini vathi vathi vamwaako.

¹⁶Ikavalu* sa Salomoni saakhumelela wExipitu ni oKuwe, weiwo yaarowaayawo ananakoso a mwene weera ethume.

¹⁷Yaathuma wExipitu ekaaro emoha ni ixekeli* macira mathannamosa sa eparatha* ni ekavalu* emoha yaathuma ni ixekeli* ncira ni miloko mithanu sa eparatha*. Yaahaathumiheratho seiye mamwene ootheene a aHiti ni a awArami.