Read Makhuwa-Shirima 2 Nyaha 10 Bible Online

2 Nyaha 10 - Makhuwa-Shirima bible

2 Nyaha 10

¹Rehobowami aarowa oXekhemi, niwoko ti weiwo yaathukumannaayawo aYixrayeli ootheene weera emvare omwene.

²Iiwaawe ihali iye eera areene Yerobowami, mwaana mulopwana a Nebate, wExipitu, aamutthawaawe mwene Salomoni. Vano aahokolowa wExipitu.

³Vano yaarumiha omwiitthana. Hiiho, owo ni aYixrayeli ootheene yaarowa okumana ni Rehobowami, eneera:

⁴“Atithinyu yaanilemeliheraxa, vano mvukule muteko woovihaxa ni olemeliheraxiwa wu, vahoolowaya hiyo nnimoorumeelani.”

⁵Rehobowami aawaakhula: “Muhokoleele wa miyo eviraleene mahuku mararu.” Hiiho muloko waapwaha.

⁶Mwene Rehobowami aahaakoha asitokweene yaamurumeela Salomoni, atithawe, mweehuhuni ya okumaaya: “Miruku heeni munkivahaanyu soowaakhulelano muloko ola?”

⁷Awosa yaahaakhulasa: “Olelo mwapakela yooreera muloko ola, munasiveliha mwaakhulaka moota onreerela, awosa anookhala arumeiyaanyu wa mahuku ootheene.”

⁸Wa soothesene, Rehobowami aakhootta miruku aavahiwaawe ni asitokweene a oYixrayeli, anaakoherera amiravo yunnungwe vamoha ni yoowo, ni yaamurumeela.

⁹Owo aahaakohasa: “Murino miruku heeni? Moota heeni nneeraahu naakhule muloko ola onkeerela: ‘Mvukule onilemelihera wa atithinyu?’”

¹⁰Amiravo yunnungwe ni yoowo, yaaheera: “Wa muloko owo ongweerelani: ‘Atithinyu yaanilemeliheraxa; muniveruwihele,’ mweerele: ‘Naamphaaka ti oowiittivalaxa opwaha eyuunu ya atithaka.

¹¹Aani atithaka yaahoolemeliherani; vaheera miyo nkeere otepa woolemeliherani. Atithaka yoottaruxelani ekwamba; mene miyo kinimoottaruxelani awalisi.’”

¹²Eviraleene mahuku mararu, Yerobowami ni muloko wootheene yaahokoleela wa Rehobowami, ntoko aalamulenlaawe mwene: “Eviraleene mahuku mararu, muhokoleele wa miyo.”

¹³Vaheera mwene aawaakhula mooxililini, akhoottaka miruku sa asitokweene a oYixrayeli.

¹⁴Owo aatthara miruku sa amiravo, eeraka: “Atithaka yaahoolemeliherani; vaheera miyo nkeere otepa woolemeliherani. Atithaka yoottaruxelani ekwamba; mene miyo kinimoottaruxelani awalisi.”

¹⁵Hiiho, mwene khaakhulenle muloko, niwoko sookhumelela iyo saarweela wa Muluku, weera ekwanihereiye masu aamuulumenlaawe Yave Yerobowami, mwaana mulopwana a Nebate mwa muXiloni Ahiya.

¹⁶aYixrayeli ootheene yoonaka weera mwene aakhootta owiiwa, yaamwaakhula: “Nrinoni hiyo ni Davide? Nrinoni hiyo ni mwaana a Yixai? Khula mutthu a hiyo ahokoleeleke muheemanimwawe, ni Davide akosoopeke empaawe.” Hiiho aYixrayeli ootheene yaahokoleela owaani.

¹⁷Wa soothesene, aYixrayeli yaakhala musidadeni sa oYuda, Rehobowami aapwaherera okhala mwenaaya.

¹⁸Mwene Rehobowami aamurumiha Adonirami, mutokweene a miteko soonyesererihiwa, vaheera aYixrayeli ootheene yaamvonya maluku mpaka okhwa. Wa soothesene mwene aawera owela ekaarowaawe, anatthawela oYerusaleemu.

¹⁹Hiiho, aYixrayeli khaaniiwanana ni omwene wa Davide mpaka olelo.