Read Makhuwa-Shirima 2 Nyaha 11 Bible Online

2 Nyaha 11 - Makhuwa-Shirima bible

2 Nyaha 11

¹Rehobowami aphiyaleene oYerusaleemu, aahaathukumanyiha anakhotto 180 000, a epuumba ya Yuda ni Benyamini, weera yaawanane aYixrayeli ni emwaakamelele omwenaawe.

²Vanonto Yave aahuuluma ni Xemaya, mulopwana a Muluku:

³“Munleele Rehobowami, mwaana mulopwana a Salomoni, mwene a oYuda, ni aYixrayeli ootheene a oYuda ni a oBenyamini:

⁴‘Yave oneera ha: Muhirowe waawanano axunninyu. Muhokoleele owaani ootheene nyuwo, niwoko ti Miyo kipanke yeeyo.’” Hiiho, awosa yaahiiwelela masu a Yave, enahiya orowa ongwanano Yerobowami.

⁵Rehobowami aakhala oYerusaleemu, anarasela isidade sikina sikina weera yaakihe oYuda. Isidadesene saari iya:

⁶oBeteleheemu, wEta, oTekowa,

⁷oBeti-Zuri, oSoko, wAdulami,

⁸oGate, oMarexa, oZife,

⁹wAdorayimi, oLakixi, wAzeka,

¹⁰oZora, wAyaloni ni oHeberoni. Isidade iya, saalipihiwe oYuda ni oBenyamini.

¹¹Owo aalipiha soowaakihasaya, anakumanyiha, anawiikaathimo asitokweene, aavahaka yooca, makhura a sooliveira* ni eviinyu.

¹²Aathokororamo ixikudu* ni mavaka mancipale musidadeni sootheene, atatuxaka soolipaxa. Hiiho, oYuda ni oBenyamini, waapwaherera olamuliwa ni yoowo.

¹³Asaserdoti* ni aLeevi a ilapo sootheene sa oYixrayeli, yaari a mpattaawe.

¹⁴aLeevi mpaka yaahiya moocihamwaya ni sooreelasaya, enarowasa oYuda ni oYerusaleemu, niwoko Yerobowami, ni anamwanaawe asilopwana yaahaakhootta okhala asaserdoti* a Yave.

¹⁵Owo aahaathanla asaserdotaawe wa mapuro oolapa miluku soowootha, ni miluku yaapankaaya sa ekhalelo ya anapunci a ipuri ni a imombe.

¹⁶Wa ipuumba sootheene sa aYixrayeli — yaale yaari oolikaneene omwaasa Yave, Muluku a oYixrayeli, yaahaattharasa aLeevi mpaka oYerusaleemu weera empakele sooveleela Yave, Muluku a makholowaaya.

¹⁷Awosa yaalipihera omwene wa oYuda, ni mweehuhuni ya iyaakha tthaaru yaamukhavihera Rehobowami, mwaana mulopwana a Salomoni, yeettelaka iphiro sa Davide ni sa Salomoni mweehuhuni yootheene ele.

¹⁸Rehobowami aathelanne ni Mahalate, mwaana muthiyana a Yeremote, mwaana mulopwana a Davide. Amayawe Mahalate, yiitthaniwa Abihayili, mwaana muthiyana a Eliyabi, mwaana mulopwana a Yixai.

¹⁹Owo aamuyarela anamwane asilopwana araru: Yewuxi, Xemariya ni Zahami.

²⁰Vahoolowaya aathelana ni Maaka, mwaana muthiyana a Abesalomi, mwa yoowo aamuyarannaawe anamwane asilopwana ala: Abiya, Atayi, Ziza ni Xelomiti.

²¹Rehobowami annamusivela Maaka, mwaana muthiyana a Abesalomi, ompwaha akhalaru mukina a axaariye ni ikuxosawe. Wa ootheene, aarino axaariye muloko ni athannaararu ni ikuxo miloko mithannamosa, anamwane asilopwana miloko miili ni athannaararu ni anamwane asithiyana miloko mithannamosa.

²²Rehobowami aamuthanla Abiyasi, mwaana mulopwana a Maaka, okhala mutokweene eriyari ya axunneiye, eerelaka omukhaliha mwene.

²³Owo aaheettela miruku, aamwaraxelaka anamwanaawe asilopwana akina mulaponi sa oYuda ni oBenyamini mpaka musidadeni soolipihiwa. Aahaavaha yooca yincipale ni asithiyana ancipale.