Read Makhuwa-Shirima 2 Nyaha 13 Bible Online

2 Nyaha 13 - Makhuwa-Shirima bible

2 Nyaha 13

¹Vayaakhani yanaathannaararu ya olamula wa Rehobowami, Abiya aathatuwa mwene a oYuda,

²analamula iyaakha tthaaru oYerusaleemu. Amayawe yiitthaniwa Maaka, mwaana muthiyana a Uriyeli, muGibeya. Vano, yaakhala ekhotto eriyari ya Abiya ni Yerobowami.

³Abiya aavolowa mukhottoni aakuxaka anakhotto 400 000 ooweraxa owana, ni Yerobowami aarowa waawanano ni anakhotto 800 000 ooweratho owana.

⁴Abiya aawela mwaako Zemarayimi, mmanyaakoni sa wEfrayimi, anakhuwela: “Yerobowami ni aYixrayeli ootheene, mukiiwe!

⁵Nyuwosa khamusuwenle weera Yave, Muluku a oYixrayeli, oomvaha Davide vamoha ni ekhapiraawe, omwene wa oYixrayeli, attharihaka wiiraana woohimala?”

⁶Waarookhalaru hiiho, Rehobowami, mwaana mulopwana a Nebate, murumeiyi a Salomoni, mwaana mulopwana a Davide, aamurukunuwela pwiiyaawe.

⁷Rehobowami, mwaana mulopwana a Salomoni, nlelo areene mmiravo, ahisuwenleru etthu ni ahiweraka ongwanano, asilopwana akina akina a atakhali ni oohivareleya muteko yaahitakansa ni Yerobowami enangwanano Rehobowami.

⁸Vano nyuwosa muntthuna owanano omwene wa Yave, ori mmatatani mwa ekhapira ya Davide! Vekhaikhai nyuwosa muri nakupa mutokotoko ni mookhalano imombe sa eyuuma yoorikaxa opankaawe Yerobowami weera sikhale milukusanyu.

⁹Vano, khamuhiyono nyuwosa ngwoomonle asaserdoti* a Yave, ekhapira ya Aharoni, ni aLeevi, munaathanla asaserdotaanyu ntoko simpakaaya miloko sikina? Akhalaru mutthu aneera iitteelihere mwaamombe mmoha ni anapunci a ikhondoolo athanneeli, onoowera othatuwa musaserdoti* a seiye sihikhanle miluku.

¹⁰Vaheera wa hiyo, Yave ti Mulukwaahu, ni khanimuhingye. Asaserdotaahu animurumeela Yave ekhaviheriwaka ni aLeevi ari a ekhapira ya Aharoni.

¹¹Khula oxeexelo ni oxekuwa awosa ampaka sooveleela soohisa ni sa erubani* yoowunkhelaxa wa Yave. Awosa anthata ipaawu vameesa akhoveleliwe okhala ootteela, ni khula oxekuwa ampattiha soomwaleela sa onyaari orino nyetto sa eyuuma yoorikaxa yooreera. Vano, hiyo nintthariha soonyesereriha sa Yave, Mulukwaahu, nyuwosa munghiyalaanyu.

¹²Moone nnenesene! Muluku ori ni hiyo; Owo ti Mutokweenaahu. Asaserdotaawe, ekuxaleene mapalapattaaya anoowiipelani mapalapatta weera ekhuwelele ekhotto. aYixrayeli, muhingwaneno Yave, Muluku a makholowaanyu, niwoko nyuwosa khamuwina.”

¹³Eyo eri hiiho, Yerobowami aahaarumihela anakhotto ottuli wa anakhotto a oYuda, moota wooweera owo aari ohoolo wa aYuda, ni anakhotto yiipinthe yaari ottuli.

¹⁴Anakhotto a oYuda yaarukunungwaaya yoonaka weera yaawananiwa mpatta wa ohoolo ni ottuli, yaamukhuwelela Yave. Asaserdoti* yaahiipa mapalapattaaya

¹⁵ni anakhotto a oYuda yaakhuwelela ekhotto. Moorumani wa okhuweleliwa ekhotto, Muluku aangwina Yerobowami ni aYixrayeli ootheene ohoolo wa Abiya ni aYuda.

¹⁶aYixrayeli yaahaatthawa anakhotto a oYuda, ni Muluku aawinnyerera mmatatanimwaya.

¹⁷Abiya vamoha ni anakhottwaawe, aahaawinaxa; yaahookhwa anakhotto ooweraxa 500 000 a oYixrayeli.

¹⁸Ehuhuweene yeele aYixrayeli yaanyaatuliwa ni anakhotto a oYuda yaakhalano ikuru soowinelano, niwoko yaamuroromela Yave, Muluku a makholowaaya.

¹⁹Abiya aamuttharelela Yerobowami, anamwaakha isidade sa oBeteli, oYexana ni wEfroni, vamoha ni mittetthesaya.

²⁰Mweehuhuni ya olamula wa Abiya, omwenaawe Yerobowami khawaalipihereiye. Aavulalihiwa ni Yave, anakhwa.

²¹Ohiyanawaya, Abiya aahiitekiha. Owo aahaathela asithiyana muloko naaxexe, anaayara anamwane asilopwana miloko miili neeli ni asithiyana muloko ni athannamosa.

²²Sookhumelela sikina iyo sa olamula wa Abiya, itthu opankaawe ni ohimmaawe, silempwale mulivuruni sa nyaha sa mprofeeti Ido.