Read Makhuwa-Shirima 2 Nyaha 14 Bible Online

2 Nyaha 14 - Makhuwa-Shirima bible

2 Nyaha 14

¹Abiya aahookhwa, anavithiwa vamoha ni makholowaawe, musidadeni ya Davide. Aamurandenle ti mwaniye mulopwana Asa, ni moolamulanimwawe, elapo yaakhala ni murettele mweehuhuni ya iyaakha muloko.

²Asa aapaka yeeyo aakhulelaawe Yave, Mulukwaawe.

³Aahaavenxa altaari* a miluku sa anamarwa ni altaari* a mmattumaxani, anaapwexakasa amarimbu ootteeliheriwa, anakurumula nyiri soothipeleliwa sa Axera.

⁴Aalamulela muloko wa oYuda weera omwaase Yave, Muluku a makholowaaya, ni weera yiiwelele ikanosawe ni malamulowaawe.

⁵Aavenxa mapuro oolapa a mmattumuxani ni altaari* a erubani* musidadeni sootheene sa oYuda; hiiho omwene waakhala ni murettele moolamulanimwawe wootheene.

⁶Aaraselatho oYuda isidade soolipihiwa, niwoko yaari ehuhu ya murettele. Khaawo yaangwananne mweehuhuni ya iyaakha iye, niwoko Yave aamwiitthuuwiha.

⁷Owo aaherela muloko wa oYuda: “Nrowe niraseleke isidade iya nitekeke ixiri ni itoore*, masele ni anampattika. Elapo ti yawihu niwoko noomwaasa Yave, Mulukwaahu; hiyo noomwaasa ni Owo oonivaha murettele mmwiinanonimwahu wootheene.” Hiiho yaateka, enapuha.

⁸Asa aakhalano anakhotto yaari asilopwana 300 000 a oYuda, ereeneno ixikudu* sitokotoko ni mavaka. Aakhalanotho anakhotto 280 000 a oBenyamini, ereeneno ixikudu* ikhaanene ni nyuura. Ootheene awo yaari anakhotto oolipa.

⁹muKuxe Zera aahaarowelasa vamoha ni anakhotto ancipalexa ni ikaaro sa ekhotto 300, anaphiya oMarexa.

¹⁰Asa aarowa weera angwaneno, ni awosa yaahiirehererela owana mureyareyani na oZefata, waattamela oMarexa.

¹¹Vano Asa aamukhuwelela Yave, Mulukwaawe: “Yave, khawoworu onlikana ni Nyuwo, onaakhavihera oolosowa yaawanaka ni oolipa. Ii! Yave, Mulukwaahu, munikhavihere, niwoko nnoororomelani Nyuwo, ni nirweenle waawanano anakhotto ancipale ala mwa Nsinananyu. Ii! Yave, Nyuwo ti Mulukwaahu; muhimuhiye mutthu oowananakani.”

¹²Yave ahaawina aKuxe ohoolo wa Asa ni Yuda. aKuxe yaatthawasa,

¹³ni Asa vamoha ni anakhottwaawe, yaahaattharelelasa mpaka oGerari. Waatta wa yaawo yaamonre waatepaxa moota wooweera aKuxe khayaawera orehereratho waattawaya; yaaphwatasiwa ohoolo wa Yave ni anakhottwaawe. Hiho, asilopwana a oYuda yaahuhula sooreela sincipale.

¹⁴Yaaphwatasa isidade sootheene saarukureenre oGerari, niwoko waahaamorela amaki a weiwo woopiha wa Yave. Yaahuhula isidade sootheene iye, niwoko saakhalamo mihakhu sincipale.

¹⁵Yaawananotho mwaakonelingwe wa akukhuli, enakuxa ikhondoolo, ipuri ni ahaaci ancipale. Vahoolowaya, yaahokoleela oYerusaleemu.