Read Makhuwa-Shirima 2 Nyaha 15 Bible Online

2 Nyaha 15 - Makhuwa-Shirima bible

2 Nyaha 15

¹Munepa wa Muluku waamukhuruwela Azariya, mwaana mulopwana a Odedi.

²Owo aarowa omukumanano Asa, anamweerela: “Asa vamoha ni muloko wootheene wa oYuda ni oBenyamini, mukiwiriyane: Nyuwo mwakhala ni Yave, Owo onookhala ni nyuwo. Mwamwaasa, Owo onimootthuniherani omphwanya, vaheera mwamuhiya, Owotho onimoohiyani.”

³aYixrayeli yaakhala ehuhu yincipale ehirino Muluku a ekhaikhai, naari musaserdoti* oowaaxuttiha nlamulo.

⁴Vaheera moothanananimwaya, awosa yaahokoleela wa Yave, Muluku a aYixrayeli, emwaasaka, ni Owo aatthunihera weera emphwanye.

⁵Mmahukuni ale weettiwa ni woova, niwoko yaakhala makacamiho wa amaki ootheene a mulaponi.

⁶Miloko ni isidade sannaphwatana, niwoko Muluku aaruuhela moota wootheene wa makacamiho.

⁷Mene mukhale oolipa ni muhiporore, niwoko munootthuveleliwa mutekwaanyu.”

⁸Mwene Asa iiwakaru masu ale, ni mprofeeti Azariya, mwaana mulopwana a Obede, aathalihenraawe otthuna wa Muluku, aalipihaxa murimaawe. Aavenxa miluku soohiira sa elapo yootheene ya oYuda, oBenyamini ni isidade aawinnaawe mmanyaakoni sa wEfrayimi, anaareherera altaari* a Yave yaari ohoolo wa nipithela* na Empa ya Muluku.

⁹Vahoolowaya aathukumanyiha muloko wootheene wa oYuda ni oBenyamini, anaalattulatho yaawo yaari awEfrayimi, aManaxe ni aSimeyoni mwa yaawo yaakhala eriyaraaya, niwoko ancipale a aYixrayeli yaarowa mpatta wa mwene Asa, woowoona weera Yave, Mulukwaawe, aari ni yoowo.

¹⁰Vamweerini wanaararu wa eyaakha yanaamuloko niithanu ya olamula wa Asa awosa yaathukumana oYerusaleemu.

¹¹Ehuhuweene yeele yaamveleelela Yave imombe macira mathannameeli, ikhondoolo ni ipuri macira miloko mathannameeli yaahuhunlaaya.

¹²Yaahiiraana ni murima wootheene ni okumi wootheene woomwaasani Yave, Muluku a makholowaaya.

¹³Akhalaru mutthu eera ahimwaase Yave, Muluku a oYixrayeli, waatthuneya wiiviwa — akhalaka mutthu piswa, hoye hoye oottittimiheyaxa, mulopwana hata muthiyana.

¹⁴Hiiho yaamuroromeliha Yave ekhuwelaka, wiiwanyeyaka oruma wa manyaaka ni mapalapatta.

¹⁵Muloko wootheene wa oYuda waahakalalela yoororomeliha, niwoko awosa yaapanke ni murima wootheene. Yaamwaasa Muluku ni nthiti; Owo aapakiha weera emphwanyase, ni aahaavaha murettele mmwiinanonimwaya wootheene.

¹⁶Mwene Asa aahaakuruxa amunneiye yiitthaniwa Maaka okhala pwiyamwene mutokweene, niwoko awo yaathipela mwiri woothipeleliwa wa Axera woohiira. Asa aaphwata mwiri ole, anathikilasa, anahisera mureyareyani na oKidroni.

¹⁷Yaaroohimalihiwaru oYixrayeli altaari* a mmattumuxani, murima wa Asa waamukhalelaxa nthiti Yave mookuminimwawe wootheene.

¹⁸Owo aaruuha Mpaani mwa Muluku eparatha*, eyuuma yoorikaxa ni ikaruma owo ni atithawe yaatteelihalaaya.

¹⁹Hiiho, khayaakhanlerutho ekhotto mpaka eyaakha yanaamiloko miraru ya olamulawawe.