Read Makhuwa-Shirima 2 Nyaha 16 Bible Online

2 Nyaha 16 - Makhuwa-Shirima bible

2 Nyaha 16

¹Vayaakhani yanaamiloko miraru niithannamosa ya olamula wa Asa, Baasa, mwene a oYixrayeli, aavolowa oYuda analipiha oRama, weera ahikhaleru eera awere ovolowa naari okhuma mulaponi mwa Asa, mwene a oYuda.

²Vano Asa aathukumanyiha eparatha* ni eyuuma yoorikaxa ya omuhakhuni wa Empa ya Yave, ni wa empaawe ya emwene, anamurumihela Ben-Hadade, mwene a wAsiriya, aalamula oDamasku ni mutthenga weera:

³“Nrowe niiraane, ntoko yaapankaaya atithaka ni atithinyu. Kinoorumihelani eparatha* ni eyuuma yoorikaxa. Vano, mmalihe wiiraananawanyu ni Baasa, mwene a oYixrayeli, weera owo akhume mulaponimwaka.”

⁴Ben-Hadade aahaakhulela yoohima ya mwene Asa, anaalamulela asitokweene a anakhottwaawe weera yawanane isidade sa oYixrayeli. Awosa yaawina wIyoni, oDani, wAbeli-Mayimi ni isidade soothokorora sooca sootheene oNafitali.

⁵Baasa asuwelaka yeeyo, aahiya oteka ixiri sa oRama.

⁶Vano mwene Asa aahaathukumanyiha asilopwana ootheene a oYuda, ni awosa yaavenxa oRama maluku ni itthaabwa aavarelaawe muteko Baasa. Asa aalipiha oGeba ni oMizepa, avarelaka muteko ikaruma iye.

⁷Ehuhuweene yeele, namoonihera* Hanani aarowa omuleela Asa, mwene a oYuda: “Mweenre mwaasa ekhavihero ya mwene a wAsiriya ohikhanle wa Yave, Mulukwaanyu, anakhotto a mwene a wAsiriya ahoopowa mmatatanimwanyu.

⁸Weeraka aKuxe ni aLibiya khayaahiyono anakhotto ooweraxa, ereeneno nakupa mutokotoko a ikaaro ni anamweettiha a ikavalu*? Wa soothesene nyuwo mwaavekenlaanyu ekhavihero ya Yave, Owo aawinnyerera mmatatanimwanyu.

⁹Vano, maitho a Yave angweha elapo yootheene weera aalipihere ootheene yaawo animukhalela nthiti ni murima wootheene. Wa yeeyo, nyuwo moopaka ya ololo. Okhuma vaanaano va woorowa ohoolo, mmweereke owana ikhotto.”

¹⁰Mwaha wa yeeyo, Asa aamunyoonyeriwa namoonihera*; aanyoonyaxiwa mpaka olamulela otthukiwa. Ehuhuweene yeele, Asa aahaahasula moololoni akina akina a muloko.

¹¹Sookhumelela sa olamula wa Asa, okhuma ompacereroni mpaka ommaleloni, silempwale mulivruni sa nyaha sa mamwene a oYuda ni oYixrayeli.

¹²Vayaakhani yanaamiloko miraru niithanniixexe ya olamulawawe, Asa yaamukela eretta munaawoni. Vano, erettaawe yaarootepaxaru, khaavekenle ekhavihero wa Yave, mene aavekenle paahi wa mamediku.

¹³Vayaakhani yanaamiloko mixexe niimoha ya olamulawawe, Asa aahookhwa, anavithiwa vamoha ni makholowaawe.

¹⁴Yaamvitha munihiyeni owo aalamulenlaawe othipeliwa musidadeni ya Davide. Yaamwaatalela mudyaneesani mwa muttembo sireenemo sooreerela ni soowunkhela soohiyanahiyana soorikaxa, enakukha ecirangare emuttittimiherelaka yoowo.