Read Makhuwa-Shirima 2 Nyaha 18 Bible Online

2 Nyaha 18 - Makhuwa-Shirima bible

2 Nyaha 18

¹Yehoxafati aakhalano mihakhu sincipale ni nttittimiho, anamwiiraanano Ahabi ni moota wa othela.

²Siviraleene iyaakha sikina, owo aarowa omuxekura Ahabi oSamariya. Ahabi aahiiva ikhondoolo ni imombe sincipale weera amwaakhelele Yehoxafati ni atthwaawe, anamutannya owanano oRamoti-Gileyadi.

³Ahabi, mwene a oYixrayeli, aamukoha Yehoxafati, mwene a oYuda: “Munoorowa ni miyo owanano oRamoti-Gileyadi?” Yehoxafati aamwaakhula: “Kiri ntoko nyuwo, ni mulokwaaka ori ntoko mulokwaanyu; nnookhala ni nyuwo okhottoni.”

⁴Vaheera aahaandyeerera: “Kinoovekelani weera mwaasaase toko miruku sa Yave.”

⁵Vano mwene a oYixrayeli, aahaathukumanyiha maprofeeti macira maxexe, anaakoha: “Nirooke okhottoni owanano oRamoti-Gileyadi, hoye hoye nihirooke?” Awosa yaamwaakhulasa: “Murowe, niwoko Muluku onimwinnyerera mmatatani mwa mwene.”

⁶Wa soothesene, Yehoxafati aakoha: “Khawoworu va mprofeeti a Yave, weera nimukoherere?”

⁷Mwene a oYixrayeli, aamwaakhula Yehoxafati: “Ookhala va mulopwana oomukohererela Yave, wa soothesene miyo kinoomuthanya, niwoko khankithaliheraru itthu sooreera, mene soonanara paahi. Owo ti Mikaya, mwaana mulopwana a Imela.” Yehoxafati aamwaakhula: “Amwene khawaatthuneya ohima yeeyo.”

⁸Vano mwene a oYixrayeli, aamwiitthana mmoha a arumeiyaawe aneera: “Munruuhe woowaakuveya Mikaya, mwaana mulopwana a Imela.”

⁹Mwene a oYixrayeli, ni Yehoxafati, mwene a oYuda, ewanreene sa emwene, yaakilaathiye muhicenimwaya sa emwene, wamveeriwa vamulako wa oSamariya, ni maprofeeti ootheene yaathalihera yeeyo yuupuwelaaya ntoko oreene otthuna wa Muluku oohoolowaya.

¹⁰Zedekiya mwaana mulopwana a Kenaana, aapaka manyaka a eyuuma, aneera: “Yave oneera ha: ‘Nyuwo munimwaavulalihera manyaka ala awArami, mpaka ophwateya.’”

¹¹Maprofeeti ootheene akinaawo, yaathalihera etthweene yeeyo, yeeraka: “Ngwanane oRamoti-Gileyadi, ni munoowina, niwoko Yave onimwinnyerera mmatatani mwa mwene.”

¹²Namutthenga aarongwe omwiitthana Mikaya, aamweerela: “Ngwoone maprofeeti ootheene akinaawo anroromeliha weera mwene sinoomweettela nnene. Maswaanyutho yaakhulele ni wuulumawanyu okhaleleke mpattaaya.”

¹³Wa soothesene, Mikaya aaheera: “Kinlipela mwa Yave Mukumi weera kinoohima paahi yeeyo aneeraawe alamulele Mulukwaaka.”

¹⁴Owo aphiyaleene, mwene aamukoha: “Mikaya, nirooke nawananeke oRamoti-Gileyadi hoye hoye nihirooke?” Mikaya, aamwaakhula: “Mwawananeke, ni munoowina, niwoko awosa animwinnyereriwa mmatatanimwanyu.”

¹⁵Mwene aamweerela: “Koonyesererihekeni imaara ihayi weera mukileele paahi ekhaikhai mwa Nsina na Yave?”

¹⁶Vano Mikaya aamwaakhula: “Koowoona aYixrayeli ootheene emwareenleene mmattumuxani, ntoko ikhondoolo soohikhalano mukukhuli, ni koomwiiwa Yave eeraka: ‘Alasa khaanono mwene. Khula mutthu ahokoleeleke owaani ni murettele.’”

¹⁷Vano mwene a oYixrayeli aamweerela Yehoxafati: “Kohooleelani weera owo onthalihera otthuna wa Muluku uulumaka soonanararu mwaha wa miyo, ohikhanle sooreera.”

¹⁸Mikaya aapwaherera: “Mwiiwe masu a Yave: Koomoona Yave akilaathiyeene vahiceniwawe, vamoha ni anakhotto ootheene a wiirimu ereene moonowaawe woolopwana ni woothiyana.

¹⁹Vano Yave aaheera: ‘Taani anaamutannye Ahabi, mwene a oYixrayeli, weera awanane oRamoti-Gileyadi ni akhwelewo?’ Vano mmoha uuluma etthu emoha, mukina uuluma ekina, mpaka

²⁰ommaleloni munepa mmoha waaheemela ohoolo wa Yave oneera: ‘Miyo kinoomutannya.’ Yave aakoha: ‘Moota heeni?’

²¹Owo waamwaakhula: ‘Kinoorowa kakhaleke munepa woowootha mmwaano mwa maprofeeti ootheene a mwene.’ Yave aaheera: ‘Nyuwo munoowera omulokottha; Murowe, mwapakewo.’

²²Vano Yave aahela munepa woowootha mmwaano mwa maprofeetaanyu awo. Yave ookhaliha erisaanyu.”

²³Vano Zedekiya, mwaana mulopwana a Kenaana, aamukhuveela, anamvaha Mikaya makoofi owiitho, anamukoha: “Okuxenre ephiro heeni munepa wa mpatta wa Yave, okhumakaru mwa miyo weera wuulume ni nyuwo?”

²⁴Mikaya aamwaakhula: “Nyuwo mmoonelele vanihukuni muneeraanyu mwiipithe mukwartuni mwa mpuwaxa.”

²⁵Vano mwene a oYixrayeli aalamulela: “Munrumihe Mikaya weera ahokoleele wa Amoni, governadori a esidade ni wa Yowaxi, mwaana mulopwana a mwene,

²⁶ni mweere weera mwene oneera ha: ‘Mungwalele mulopwana ola mukaliposo, mumvaheke yooca vakhaani ni maahi paahi mpaka kineeraaka kihokolowe oolipeene.’”

²⁷Mikaya aahima: “Nyuwo mwahokolowa oolipeene, Yave khuulumme mwa miyo.” Aahaandyeereratho: “Ootheene nyuwo, mwiiwe yeeyo kinghimaaka!”

²⁸Vano, mwene a oYixrayeli ni Yehoxafati, mwene a oYuda, yaarowasa owanano oRamoti-Gileyadi.

²⁹Mwene a oYixrayeli, aamweerela Yehoxafati: “Kinoovolowa mukhottoni kiwanreene sikina, mene nyuwo ngwareleke sa emwene.” Mwene a oYixrayeli aawara sikina, ni ooweeli yaarowasa okhottoni.

³⁰Mwene a wAsiriya aahaalamulela asitokweenaawe a ikaaro sa ekhotto: “Muhingwananeru mukina — akhalaka nakhooto, hata mutokweene — ohikhanle ongwanano mwene a oYixrayeli.”

³¹Asitokweene a ikaaro emoonakaru Yehoxafati, yuupuwela: “Ola ti mwene a oYixrayeli.” Vano yaarukunuwa weera emuwanane, vaheera Yehoxafati aakhuwela, ni Yave aamukhavihera. Muluku aahaasusihasa wa yoowo,

³²niwoko yoonakaru weera khaahiyono mwene a oYixrayeli, yaahiya omuttharelela.

³³Vanonto, nakhotto mmoha aari mwaasa olatha muuraawe, anamphwanyiha mwene a oYixrayeli eriyari ya yoowaraawe ya eyuuma ya ekhotto. Mwene aamweerela namweettiha a ekaarowaawe: “Okikhumihe mukhottoni! Koovulalihiwa!”

³⁴Ekhotto yaakukumaxa nihuku nenenenno ni hiiho mwene a oYixrayeli aahiilipihera mukaaronimwawe aawehaka awArami, mpaka oxekuwa. Hiiho, nsuwa nneelaka, owo aahookhwa.