Read Makhuwa-Shirima 2 Nyaha 24 Bible Online

2 Nyaha 24 - Makhuwa-Shirima bible

2 Nyaha 24

¹Yowaxi aathatungwaawe mwene aarino iyaakha ithannapiili sa oyariwawawe, analamula oYerusaleemu iyaakha miloko mixexe. Amayawe yiitthaniwa Zibiya; awo yaari muBerxeba.

²Musaserdoti* Yehoyada nlelo areene ni okumi, Yowaxi aapaka yeeyo onaakhulelaawe Yave.

³Owo aamuthanlela Yowaxi axaara eeli, ni owo aakhalano anamwane asilopwana ni asithiyana.

⁴Eviraleene ehuhu ekina Yowaxi aalakela orasela Empa ya Yave.

⁵Owo aahaathukumanyiha asaserdoti* ni aLeevi, anaweerelasa: “Murowase musidadeni sa oYuda ni mwakuxase musoko wa khula eyaakha, oYixrayeli wootheene weera eraseliwe Empa ya Mulukwaanyu. Murowase vaanaano va!” Wa soothesene, aLeevi yaapisa orowa.

⁶Tivawo mwene aamwiitthannaawe Yehoyada, mutokweene a asaserdoti*, anamukoha: “Heeni muhaanyesereringhaanyu aLeevi weera eruuhe oYuda ni oYerusaleemu musoko waalamuleliwe ni Moisesi, murumeiyi a Yave wa muthukumano wa aYixrayeli, mwaha wa Eheema ya Arka* a wiiraana?”

⁷Vekhaikhai Ataliya, muthiyana ootakhala ole, ni anamwanaawe asilopwana yaananariha Empa ya Muluku, mpakatho aavarela muteko ikarumasaya sootteelihiwa woowaalapano aBahali*.

⁸Vano, munlamuloni na mwene, yaapakasa ekaaxa eniikaathi vaate, vamulako wa Empa ya Yave.

⁹Woottharelana, waalaleiwa oYuda ni oYerusaleemu weera emuruuhele Yave musoko mwa yoowo Moisesi murumeiyi a Muluku aanyesereringhaawe aYixrayeli munikareni.

¹⁰Ahooleli ootheene ni muloko wootheene yaaruuha ni ohakalala micaangosaya, enahelasa mukaaxani mpaka osarihamo.

¹¹Imaara sootheene aLeevi yaaronghaaya ekaaxa wa asitokweene a mwene, ni awosa yoonaaya weera yaakhala eparatha* yincipale, namalepa a empa ya emwene ni namwaalikela musurukhu a mutokweene a asaserdoti* yaamwiittha, enahokoloxa. Yannapaka hiiho khula nihuku enathukumanyiha eparatha* yincipale.

¹²Mwene ni Yehoyada yaawinnyerera eparatha* eyo asilopwana yaawehaweha miteko saatthuneya Mpaani mwa Yave. Awosa yaawiiwananano mapatarero ni makalipinteiru weera erasele Empa ya Muluku, ni yaavara muteko ni iyuuma ni ebronze* weera ereherere Eyo.

¹³Asilopwana yaawehaweha muteko yannavara nnenesene, moota wooweera muteko wa oreherera waaheetta nnenesene. Awosa yaarasela Empa ya Muluku ntoko yaaraaya woopacera, enalipihera.

¹⁴Emalihaleene, yaarongha eparatha* yaahanle eyo wa mwene ni wa Yehoyada, enapakeliwano soovarela muteko Mpaani mwa Yave: ikaruma soovarela muteko, ni wa sooveleela soohisa, ohiya itixela ni ikaruma sikina sa eyuuma yoorikaxa ni sa eparatha*. Nlelo Yehoyada areene ni okumi, sooveleela soohisa saapwaherera opakeliwa Mpaani mwa Yave.

¹⁵Yehoyada okhwiiye uuluvalanxeene, areeneno iyaakha ncira ni miloko miraru sa oyariwawawe.

¹⁶Ovithiwe vamoha ni mamwene musidadeni ya Davide, mwa yooreera aapankaawe oYixrayeli, amweerelaka Muluku ni Empa ya Yave.

¹⁷Akhwiiyeene Yehoyada, ahooleli a oYuda yaarowasa wuuluma ni mwene enamuttittimiherela, ni owo aahaakhulela yeeyo yaahimmaaya.

¹⁸Vano, yaahiyasa Empa ya Yave, Muluku a makholowaaya, enakokhorela nyiri soothipeleliwa sa Axera, mpakatho miluku sikina. Isara sa Muluku saamorela oYuda ni oYerusaleemu niwoko na yoonanara ele.

¹⁹Yave aarimwaarumiharu maprofeeti wa muloko weera aahokoloxere wa Yoowo, ni maprofeeti yaarimwaathaliheraru otthuna wa Muluku, muloko khawaatthunne owiiwasa.

²⁰Vano Munepa wa Muluku waamukhuruwela Zakariya, mwaana mulopwana a musaserdoti* Yehoyada. Owo aaheemela ohoolo wa muloko aneera: “Onghimaawe Muluk ti ela: ‘Heeni nyuwosa muhiniiwelelaanyu malamulo a Yave? Nyuwosa khasiweettelani nnene. Mweenre munghiya Yave, Owotho onimoohiyani.’ ”

²¹Vaheera akina akina yaamvaanelela, ni munlamuloni na mwene, yaamvonya maluku mpaka okhwela vanipuwani na Empa ya Yave.

²²Mwene Yowaxi khaapwatthenle weera Yehoyada, atithawe Zakariya, yaamoonihera murima wooreera, ni Zakariya aamwiiva mwaniye mulopwana. Vano Zakariya aakhwaawe, aakhuwela: “Yave, ooneke yeela ni apakeke ikukuttula!”

²³Ommaleloni wa eyaakha, anakhotto a awArami, yaamurowela Yowaxi, enavolowa oYuda ni oYerusaleemu, enawiiva ahooleli ootheene a muloko, enarumihela wa mwenaaya sootheene yaahuhunlaaya oDamasku.

²⁴Yaarookhalaru vakhaani anakhotto awArami, Yave aawinnyerera mmatatanimwayasa anakhotto ancipale. Weenre oYuda wamuhiya Yave, Muluku a makholowaaya, Yowaxi aathorihiwa.

²⁵awArami epwahanseene, yaamuhiyale Yowaxi avulalanxeene. Asitokweenaawe yaamvaanelelasa, niwoko owo aamwiiva mwaana mulopwana a Yehoyada, enamwiivelasa vabeettinivawe. Hiiho owo aahookhwa, anavithiwa musidadeni ya Davide, mene ohikhanle mmahiyeni a mamwene.

²⁶Yaawo yaamvaanelenle yaari Zabadi, mwaana mulopwana a ngwAmoni muthiyana Ximeyate, ni Yeyozabate, mwaana mulopwana a mMowabe muthiyana Ximeriti.

²⁷Nyaha sa anamwanaawe asilopwana, soothaliheriwa otthuna wa Muluku sincipale mwaha wa yoowo, ni soohimmwa sa oraseliwa wa Empa ya Muluku silempwale mulivuruni sa nyaha sa mamwene. Aamurandenle ti mwaniye mulopwana Amaziya.