Read Makhuwa-Shirima 2 Nyaha 28 Bible Online

2 Nyaha 28 - Makhuwa-Shirima bible

2 Nyaha 28

¹Ahazi aapaceraawe olamula, aarino iyaakha miloko miili sa oyariwawawe, analamula oYerusaleemu iyaakha muloko niithannamosa. Ohiyanawaya ni Davide nikholonawe, khaapanke yeeyo onaakhulelaawe Yave.

²Owo aaheettela iphiro sa mamwene a oYixrayeli, anapaka miluku sa eyuuma, eerelaka waalapa aBahali*.

³Aapaka sooveleela soohisa mureyareyani na oBeni-Hinomi, mpakatho aahaapaka yooveleela anamwanaawe asilopwana, atakihaka ikhovelelo soothanyeya sa miloko oomonlaawe Yave ohoolo wa aYixrayeli.

⁴Aapakatho sooveleela ni aahisa erubani* mmanttumuxani ootteeliheriwa miluku sikina, vasulu mattumuxa ni vathi wa khula mwiri woopombaxa.

⁵Tivawo Yave, Mulukwaawe aawinnyerenraawe mmatatani mwa mwene a wAsiriya. awArami yaangwinasa, enaatthukasa atthu ancipale eriyari ya mulokwaawe, enaaronghasa oDamasku. Aahinnyereriwatho mwa aYixrayeli, mwa yaawo yaangwinanxe.

⁶Munihukuni nimoha, Peka mwaana mulopwana a Remaliya, aawiiva anakhotto 120 000 oolipaxa murima a oYuda, niwoko aYuda yaamuhiya Yave, Muluku a makholowaaya.

⁷Zikeri, nakhotto ngwEfrayimi, aamwiiva Maaseiya, mwaana mulopwana a mwene, Azerikami, mutokweene aawehaweha empa ya emwene, ni Elikana iiwananaxa ni mwene.

⁸aYixrayeli yaahaarongha oSamariya anamatthukiwa 200 000 asithiyana, amiravo ni asimwali a axunnaya aYuda. Aakuxatho soohuhula sincipale.

⁹Vaheera mprofeeti a Yave, iitthaniwa Obede, aari oSamariya, aavenya arowaka waakumanano anakhotto yaahokolowaaya oSamariya. Owo aaweerelasa: “Yave, Muluku a makholowaanyu, aanyoonyeriweene aYuda, aawinnyererasa mmatatanimwanyu. Vaheera nyuwo moowiiva woohaamorela ikharari moota wooweera Muluku ohoona.

¹⁰Vanonto nyuwosa muntthuna waapaka ipottha asilopwana ni asithiyana a oYuda ni oYerusaleemu! Nyuwosa mookhalanotho nthowa na omutthekela Yave, Mulukwaanyu.

¹¹Vano, mukiiwe! Mwaahokoloxe axunninyu mwaapankaanyu anamatthukiwa, niwoko isara sa Muluku sohoomorelani.”

¹²Hiiho, Azariya, mwaana mulopwana a Yehohanani, Berekiya, mwaana mulopwana a Mexilemote, Yehizekiya, mwaana mulopwana a Xalumi, ni Amasa, mwaana mulopwana a Hadelai, yaari asitokweene akina akina a Efrayimi, yaahaaluluwanano yaawo yaahokolowa okhottoni, eweerelaka:

¹³“Muhaaruuhase va anamatthukiwa. Ohiyanawaya, nnookhalano nthowa ohoolo wa Yave. Nyuwosa muntthuna waandyeereratho yootthekaahu ni nthowanahu? Nthowanahu nri ntokotoko, ni mooro wa isarasawe woonimorela hiyo aYixrayeli.”

¹⁴Vano anakhotto yaahaatapuxa anamatthukiwa, eniikaathi soohuhula vamaithoni wa ahooleli ni muthukumano wootheene.

¹⁵Asilopwana ala aromoliwe masinaaya, yaahaakuxasa anamatthukiwa ni soowara vamoha ni ikwakwaatta sa soohuhuliwa, enaawarihasa ootheene yaari tiriya. Yaahaavaha yooca, yoowura ni makhura ooreherera erutthu. Ootheene yaakhulumungwe yaahaawelihasa mwaabuuruni. Hiiho, yaahaahokoloxerasa mulaponimwaya yaakhalaayawo oYeriko, esidade ya mavare, enahokoleela oSamariya.

¹⁶Ehuhuweene yeele mwene Ahazi, aamurumihela anamitthenga mwene a wAsiriya weera amvekele ekhavihero.

¹⁷awEdomi yaahokoleelatho owana oYuda yaavaraka atthu,

¹⁸ni aFilisti yaawanano isidade vathi vathi wa mmanyaakoni ni mpatta wa ohitto wa oYuda. Yaawina enaakamela oBeti-Xemexi, wAyaloni ni oGederoti mpakatho oSoko, oTimena ni oGimezo, vamoha ni mittetthesaya.

¹⁹Yave aayeviha oYuda niwoko na Ahazi, mwene a oYixrayeli, mwaha wa weettelawawe yeeyo yahaakhoveleliwe oYuda, ahiroromeleyaxaka wa Yave.

²⁰Aaphiyalaawe Tigelate-Pileseri, mwene a wAsiriya, ohiya omukhavihera, owo aamutannyenre milattu.

²¹Ahazi aakuxa itthu ikina ikina sa Mpaani mwa Yave, empa ya emwene ni sa ahooleli, anamvaha mwene a wAsiriya, mene eyo khayaavareleiye muteko.

²²Naari ehuhuweene yeeyo owo aavireene mmakacamihoni, mwene Ahazi aamweera otepa ohiroromeleya wa Yave.

²³Owo aapakela sooveleela miluku sa oDamasku mwa seiyo saangwinne, niwoko uupuwela: “Seenre miluku sa oSamariya saakhavihera, kinoopakela sooveleela weera sikikhavihere miyotho.” Vaheera iyo saamutannyenre oheleya nthala owo ni aYixrayeli ootheene.

²⁴Ahazi aathukumanyiha ikaruma sa Mpaani mwa Muluku, anakhumihamo. Aawala milako sa Empa ya Yave, anaateka altaari* mmattuumbani moothemwene a oYerusaleemu.

²⁵Aateka mapuro oolapa miluku sikina musidadeni sootheene sa oYuda weera apakele sooveleela miluku sikina, atannyaka isara sa Muluku a makholowaawe.

²⁶Sookhumelela sikina iyo sa olamulawawe ni mitekosawe sootheene, okhuma ompacereroni mpaka ommaleloni, silempwale mulivuruni sa nyaha sa mamwene a oYuda ni oYixrayeli.

²⁷Ahazi aahookhwa, anavithiwa vamoha ni makholowaawe musidadeni ya oYerusaleemu, mene khoohiyono mmahiyeni a mamwene a oYixrayeli. Aamurandenle ti mwaniye mulopwana Hezekiya.