Read Makhuwa-Shirima 2 Nyaha 3 Bible Online

2 Nyaha 3 - Makhuwa-Shirima bible

2 Nyaha 3

¹Vano Salomoni aapacera oteka Empa ya Yave, oYerusaleemu, vamwaakoni Moriya, weiwo Yave iixoonihenraawe wa atithawe Davide, vanipuroni nimveeriwa* etrigu na muYebusi Arawuna, vanipuroni naarehereriwe ni Davide.

²Aapacenre oteka vanihukuni nanaaveeli na mweeri wanaaveeli wa eyaakha yanaaxexe ya olamulawawe.

³Mathipelo aapakenlaawe Salomoni Empa ya Muluku, yaarino imeetru* miloko miili niithannapiili sa mweerakamelonimwaya, ni imeetru* ithanniixexe sa mweekhuveelonimwaya, ottharihiwaka muringo wa khalayi.

⁴Nipithela* na mpatta wa ohoolo wa Empa ya Muluku, waarino imeetru* ithanniixexe mweekhuveelonimwaya onlikana mweekhuveeloni wa Empa ya Muluku yootheene, ni imeetru* ithanniixexe orakamelawaya osulu. Owo aahuruwela mpuwamwaya eyuuma yoorikaxa yooreera.

⁵Aahuruwelanotho itthaabwa sa epinyeiru* nipuwa ntokweene, ahuruwelakano eyuuma yoorikaxa yooreera, anacaambulela icaambulo sa mavare ni sa onyooro.

⁶Aaphwaneliha Empa ya Muluku ni maluku oowaaraxa. Eyuuma yoorikaxa yaavareliwa muteko yaari ya oParvayimi.

⁷Aahuruwelatho ni eyuuma yoorikaxa iviika, isereemu, ixiri ni masele a Empa ya Muluku, anaapatthela akerubini* muxirini.

⁸Aapaka Nipuro Nootteelaxa*, nreeneno imeetru* ithanniixexe sa mweerakamelonimwaya ni imeetru* ithanniixexe sa mweekhuveelonimwaya, elikanaka ni mweekhuveeloni mwa Empa ya Muluku. Mpuwamwaya, aahuruwelano itonelada* miloko miili niimoha sa eyuuma yoorikaxa yooreera.

⁹Misomaari sa eyuuma yoorikaxa saalemela igrama* macira mathannamosa. Aahuruwelanotho ni eyuuma yoorikaxa isaala sa osulu.

¹⁰vaNipuroni Nootteela*, aahaapatthela, anaahuruwelelano ni eyuuma yoorikaxa akerubini* eeli.

¹¹Vano ookungeyeene mapupha ooweeli yaarino imeetru* ithanniixexe. Nipupha nimoha na oopacera naari imeetru* piili ni vakhaani, nitavaka exiri ya Empa ya Muluku, nipuphanawe nikina na imeetru* piili ni vakhaani, nitavaka nipupha na kerubini* mukina.

¹²Hiihotho nipupha na kerubini* mukina naari imeetru* piili ni vakhaani, nitavaka exiri ya Empa ya Muluku, nipuphanawe nikina na imeetru* piili ni vakhaani, nitavaka nipupha na kerubini* mukina.

¹³Akerubini*, ekungeiyeene, mapuphwaaya yaari imeetru* ithanniixexe. Yaakhala yeemelelo ohoolo wa esaala etokweene.

¹⁴Owo aapaka eluttu ya ekuwo ya kanka, yookankela, yooxeera ni ya nliinya nootteettheya, exoreliweenemo akerubini*.

¹⁵Aahaapaka amarimbu eeli ohoolo wa Empa ya Muluku, ooweeli awo yaarino imeetru* muloko niithannamosa, khula nrimbu nreeneno vasuluwaya muru wa amarimbu wa imeetru* piili ni eriyari ya emeetru*.

¹⁶Aaphwaneliha nyuru iye ni onyooro wootthaviwa. Aapakatho irooma* ncira, aniikaathi moonyooroni.

¹⁷Vahoolowaya, aaweemexa amarimbu ohoolo wa Empa ya Muluku, mmoha mpatta wa ohitto, mukina mpatta wa ottuttuwani. Yoowo aari mpatta wa ohitto, aamutteha Yakini, ni yoowo aari mpatta wa ottuttuwani aamutteha Bowaxi.