Read Makhuwa-Shirima 2 Nyaha 30 Bible Online

2 Nyaha 30 - Makhuwa-Shirima bible

2 Nyaha 30

¹Hezekiya aahaarumihela mutthenga aYixrayeli ni aYuda ootheene, ni aahaalepelatho ikaratta awEfrayimi ni aManaxe, aalattulaka weera erwe Mpaani mwa Yave oYerusaleemu, ni empake mPaska* a Yave, Muluku a oYixrayeli.

²Mwene, asitokweene ni muloko wootheene wa oYerusaleemu, yaalakelasa ompaka mPaska* vamweerini wanaaveeli.

³Khawaawereiye ompaka vanihukuni naahimmwale, niwoko asaserdoti* yaatteelihiwe, khayaattiye, ni muloko khawaathukumanne oYerusaleemu.

⁴Muupuwelo ole waari ntoko wooreera wa mwene mpakatho wa muthukumano.

⁵Vano yaalakela olaleiwa oYixrayeli wootheene, okhuma oBerxeba mpaka oDani, olattuliwaka muloko weera orowe oYerusaleemu weera apakiwe mPaska* a Yave, Muluku a oYixrayeli. Vano, ancipale khayaampanke ettharihaka moota waalempwalaaya.

⁶Munlamuloni na mwene, anamitthenga yaaviravira oYixrayeli ni oYuda wootheene, ekuxaleene ikaratta soottittiwa ni mwene nitho asitokweenaawe, ni mutthenga ola: “aYixrayeli, muhokoleele wa Yave, Muluku a Abrahaamu, Isaki ni Yixrayeli, weera Owo ahokoleele wa nyuwosa muhanle ni moopongwe mmatatani mwa mwene a wAsiriya.

⁷Muhikhale ntoko asitithinyu ni axunninyu yahaaroromeleiye wa Yave, Muluku a makholowaaya, moota wooweera Owo aahaahiya ephwateiyeene ntoko nyuwosa munoonaanyu.

⁸Vanonto, muhikhale attiyamaaru ntoko makholowaanyu; mwiixinnyerere wa Yave. Murwaase vaNipuroni Nootteela* Owo otteelihalaawe wa mahuku ootheene. Munrumeele Yave, Mulukwaanyu, weera mooro wa isarasawe woohuluweni.

⁹Nyuwosa mwahokoleela wa Yave, yaawo yaavanre axunninyu ni anamwaniinyu, animwaamorelasa ikharari, ni awosa anoohokoleela elapo ela, niwoko Yave, Mulukwaanyu, ti ooreera murima, ni oosareya ikharari. Owo khookhoottani nyuwosa mwahokoleelasa wa Yoowo.”

¹⁰Anamitthenga yaaviravirasa esidade ti esidade, wEfrayimi ni oManaxe, ni mpakatho oZebuloni, vaheera muloko waahaatheyasa, owuulihihaka muru.

¹¹Vanonto, asilopwana akina akina a wAxeri, a oManaxe ni a oZebulomi, yaahiiyevihasa, enarowasa oYerusaleemu.

¹²oYuda, ntata na Muluku naari mwa muloko aavahaka wiiwanana mmuupuweloni weera ekwanihere yeeyo mwene ni asitokweenaawe yaalamulenlaaya, ettharihaka masu a Yave.

¹³Nakupa mutokotoko aathukumana oYerusaleemu vamweerini wanaaveeli, weera epake efesta ya epaawu yoohikhalano eferementu.

¹⁴Awosa yaahaavenxa altaari* yaari oYerusaleemu, enaaphwata altaari* ootheene a erubani*, yaavonyeraka mureyareyani na oKidroni.

¹⁵Yaahiiva eputtiputthi ya mPaska* vanihukuni nanaamuloko ni maxexe na mweeri wanaaveeli. Asaserdoti* ni aLeevi oowuulihiheyeene muru, yaahiitteelihasa, enaruuha Mpaani mwa Yave sooveleela soohisa.

¹⁶Yaakhalasa mmapuronimwaya ntoko ehimmwalaaya munlamuloni na Moisesi, mulopwana a Muluku. Asaserdoti* yaamisa ephome yaavahiwaaya ni aLeevi.

¹⁷Yeenre ancipale a nakupa yahitteelihiwa, waatthuneya aLeevi wiiva iputtiputthi sa mPaska* wa ootheene yahaatteelihiwe, ni hiiho khawaawereya omutteelihera Yave iputtiputthisaya.

¹⁸Yaarimweeraru ancipale yaakhumelenle wEfrayimi, oManaxe, wIsakari ni oZebuloni ehiitteelinghe, yaamuca mPaska*, evirikanyihaka yeeyo yaalempwale. Mene Hezekiya aahaavekelelasa, eeraka: “Yave ori a murima wooreera aalevelele yaawo

¹⁹aninnyerera murimaaya omwaasa Muluku a makholowaaya, naari ehitteenle ntoko ontthuneyaaya vaNipuroni Nootteela*.”

²⁰Hiiho, Yave aahiiwa nivekelo na Hezekiya ni aalevelela muloko.

²¹aYixrayeli yaarwiiye oYerusaleemu, yaapaka ni ohakalala efesta ya epaawu yoohikhalano eferementu mweehuhuni ya mahuku mathannameeli. Khula nihuku, aLeevi ni asaserdoti* yaamwiipela icipo Yave moorumani mwa ikaruma sa Yave.

²²Hezekiya aahaavaha masu ooreeraxa aLeevi ootheene yoonihenre wiiwexexa wooreera wa moota woomurumeela Yave. Mmahukuni mathannameeli awosa yaahooca sa sooveleela, enapaka sooveleelela murettele, enamutthapela Yave, Muluku a makholowaaya.

²³Muthukumano wootheene waalakela opwahereriha efesta mmahukuni mathannameelitho, ni yaapakasa hiiho ni ohakalala.

²⁴Hezekiya mwene a oYuda, aavaha muthukumano aximombe macira muloko, ikhondoolo ni anapunci a ipuri macira miloko mathannameeli, ni ahooleli yaavaha muthukumano aximombe macira muloko ni ikhondoolo vamoha ni anapunci a ipuri macira macireene muloko. Asaserdoti* ancipale yaahiitteelihasa.

²⁵Muthukumano wootheene wa oYuda waatthapa vamoha ni asaserdoti*, aLeevi ni ootheene yaathukumanne ekhumelelaka oYixrayeli, vamoha ni anamarwa yaarwiiye oYixrayeli ni yaakhala oYuda.

²⁶Waakhala ohakalalaxa oYerusaleemu, niwoko okhuma mmahukuni a Salomoni, mwaana mulopwana a Davide, mwene a oYixrayeli, kheeneereiye etthu ntoko yeele musidadeni.

²⁷Asaserdoti* ni aLeevi yaaheemelasa weera ereelihe muloko, ni Muluku aawiiwa; mavekelowaaya yaaphiya wiirimu, woomakawawe wootteela.