Read Makhuwa-Shirima 2 Nyaha 32 Bible Online

2 Nyaha 32 - Makhuwa-Shirima bible

2 Nyaha 32

¹Vahoolo wa sootheene Hezekiya aapankaawe moororomeleyaxani, Senakeribi mwene a wAsiriya, aavolowa oYuda, anarica isidade soolipihiwa weera awine.

²Hezekiya oonaka weera Senakeribi aatthuna owanano oYerusaleemu,

³aahaakoherera asitokweenaawe ni asitokweene a anakhotto, moota woottiya yaaviraayamo maahi a anaattuuttu a mpatta wa okerekhere wa esidade; ni awosa yaahaakhulela.

⁴Hiiho yaathukumana asilopwana ancipale, enaawalasa anaattuuttu ootheene ni nxaapwa nivinre mulaponi. Awosa yeera: “Nnaahiyere heeni mamwene a wAsiriya ewaaka ni ephwanyaka maahi ootheene ala?”

⁵Vahoolowaya, alipihaleene murima, aarasela ixiri sootheene saakurumungwe, anateka itooresaya*. Aapakatho exiri ekina mpatta wa omokoni wa yoopacera, analipihera itarato sa esidade ya Davide; aalamulelatho ohaniwa mavaka ni ixikudu* sincipaletho.

⁶Aathanlela muloko asitokweene a anakhotto, anaathukumanyiha vanipuwani, vamulako wa esidade, aalipiherakano masu ala:

⁷“Mukhale oolipa ni mminye murima. Muhoove hata muhiporore mwaha wa mwene a wAsiriya ni wa anakhottwaawe ancipale, niwoko hiyo nookhalano Mmoha ooweraxa opwaha owerawaya.

⁸Awosa arino paahi owera wa omutthu, vaheera Yave, Mulukwaahu, ori ni hiyo weera anikhavihere ni awane ekhottwaahu.” Muloko waalipiha murima ni masu a Hezekiya, mwene a oYuda.

⁹Vahoolowaya, Senakeribi, mwene a wAsiriya ni anakhottwaawe ootheene ericaka oLakixi, aahaaruma asitokweene orowa oYerusaleemu ni mutthenga ola wa Hezekiya, mwene a oYuda, ni wa muloko wootheene waakhalawo:

¹⁰“Senakeribi mwene a wAsiriya oneera ha: Munroromela heeni oYerusaleemu oriciweene?

¹¹Hezekiya eeraawe: ‘Yave, Mulukwaahu, onoonivuluxa mmatatani mwa mwene a wAsiriya,’ owo onimweera woolokotthani, weera oohiyeeni mukhwaaka etala ni ntthona.

¹²Vano khahiyono Hezekiya muneenaawe aavenxale altaari* a miluku iyo, aweerelaka aYuda ni aYerusaleemu: ‘Nyuwosa mulapeke valtaarini* amoharu paahi ni muhiserekewo erubani’?

¹³Nyuwosa khamusuwenle yeeyo miyo ni makholowaaka nimpakelaahu miloko sootheene sa ilapo ikina? Weeraka miluku sa miloko iyo saatoko waatapuxa mulaponimwaya mmatatanimwaka?

¹⁴Wa miluku sootheene sa miloko siphwatingwe ni makholowaaka, muluku heeni wa seiyo owenre ovuluxa mulokwaawe mmatatanimwaka? Vanonto moota heeni Mulukwaanyu aneeraawe awere wootapuxani mmatatanimwaka?

¹⁵Tivawo muhimuhiye Hezekiya oolokotthakani hoye hoye oohapuxakani mooteene yoowo. Muhimwaakhulele, niwoko khoowoworu muluku wa wakhalaru muloko hoye hoye mwene otonke owera otapuxa mulokwaawe mmatatanimwaka ni wa makholowaaka. Wootepaxa Mulukwaanyu khawera wootapuxani mmatatanimwaka!”

¹⁶Asitokweene a Senakeribi yannamuruwana Yave, Muluku, ni Hezekiya murumeiyi a Yave.

¹⁷Senakeribi aalepatho ekaratta amuruwanaka Yave, Muluku a oYixrayeli ni mpikisaano ola: “Mooteene yoowo miluku sa miloko sa ilapo sikina sihitapunxaaya milokosaya mmatatanimwaka, Muluku a Hezekiya khatapuxatho mulokwaawe mmatatanimwaka.”

¹⁸Vano asitokweene awAsiriya yaakhuwelela vaHeberi muloko wa oYerusaleemu waari vaxirini, weera emututuxe ni emoopopihe yeerelaka owina esidade.

¹⁹Yaahima sa Muluku a oYerusaleemu emulikanxeraka miluku sa miloko sikina sa mulaponi sipakingwe ni atthu.

²⁰Niwoko na sootheene iyo, Hezekiya ni mprofeeti Yesaya, mwaana mulopwana a Amosi, yaakhuwelela wiirimu evekelaka.

²¹Yave aamurumiha ndyelo aawiivale anakhotto ootheene yaawana, ni ahooleli ootheene ni asitokweene waakonelingwe wa mwene a wAsiriya, moota wooweera owo aavenyawo oowuulihiheyeene muru arowaka elapwaawe. Nihuku nimoha, avolowaka mpaani mwa mulukwaawe, akina akina a anamwanaawe yaamwiiva ni ekatana.

²²Hiiho, Yave aamvuluxa Hezekiya ni muloko wa oYerusaleemu mmatatani mwa Senakeribi, mwene a wAsiriya, ni mwa miloko sootheene sikina. Aahaakiha nyiinanosawe sootheene.

²³Ancipale yaaruuha oYerusaleemu soomvaha Yave, ni sooreerela wa Hezekiya, mwene a oYuda. Okhuma ehuhuweene yeele woorowa ohoolo, owo aattittimihaxiwa ni miloko sootheene.

²⁴Ehuhuweene yeele, Hezekiya aavoreiwa ohaleela okhwa. Owo aamvekela Yave, mwa Yoowo aamwaakhunle, amvahaka eneneero yootikhiniha.

²⁵Vaheera Hezekiya aathatuwa oowiixoona, ohicelanaka onnene aapakeliwaawe; tivawo isara sa Yave saammorenlaaya owo, oYuda ni oYerusaleemu.

²⁶Vano Hezekiya aahiiyeviha, oonelelaka wiixoonawawe, mpakatho muloko wa oYerusaleemu; tivawo isara sa Yave sahaamorenlaaya wa muloko, moolamulani wa Hezekiya.

²⁷Hezekiya aathadyireyaxa ni aavuwa; aapaka moosungamo eparatha*, eyuuma yoorikaxa, maluku oowaaraxa, itthu sooreerela, ixikudu* ni moota wootheene wa itthu sooreerela.

²⁸Aapakatho matatha oosungamo etrigu, eviinyu ni makhura; aatekelatho makhoola wa mihuwosawe soohiyanahiyana vamoha ni ikhondoolosawetho.

²⁹Aateka isidade, anakhalano mihuwo sincipale, niwoko Muluku aamvahaxa mihakhu soowaattaxa.

³⁰Ti Hezekiya aalamulenle owaliwa ehime ya oGihoni, mpatta wa osulu, weera avirihe maahi vathi vathi, erowaka mpatta wa ninkela nsuwa wa esidade ya Davide. Hezekiya saamweettela nnenesene sootheene aapakaawe.

³¹Vaheera alamuli a oBabiloniya yaarumihalaaya anamitthenga weera yamukohe mwaha wa eneneero yootikhiniha yeereiye mulaponi, Muluku aamuhiya weera amoote murima ni asuwele sootheene saari vamurimaniwawe.

³²Sookhumelela sikina iyo sa olamula wa Hezekiya ni mitekosawe sa murima wa omuluku, silempwale mmooneloni wa mprofeeti Yesaya, mwaana mulopwana a Amosi, mulivuruni sa mamwene a oYuda ni oYixrayeli.

³³Hezekiya aahookhwa, anavithiwa vamoha ni makholowaawe onttumuxani araayawo mahiye a ekhapira ya Davide. aYuda ootheene ni muloko wa oYerusaleemu yaamuttittimiherela okhwawawe. Aamurandenle ti Manaxe, mwaniye mulopwana.