Read Makhuwa-Shirima 2 Nyaha 34 Bible Online

2 Nyaha 34 - Makhuwa-Shirima bible

2 Nyaha 34

¹Yosiya aapaceraawe olamula, aarino iyaakha ithannatthaaru sa oyariwawawe, analamula oYerusaleemu iyaakha miloko miraru niimoha.

²Owo aapaka onaakhulelaawe Yave, aneettela iphiro sa Davide, nikholonawe, ahihapuwakaru.

³Vayaakhani yanaathannaararu ya olamulawawe, areene nlelo mmiravo, owo aapacera omwaasa Muluku a Davide, nikholonawe. Vayaakhani yanaamuloko ni piili aapacera otteeliha oYuda ni oYerusaleemu mapuro oolapa a miluku soowootha, nyiri soothipeleliwa sa Axera, icaambulo soopatthiwa, ni soohaniwa.

⁴Ettharihiwaka malamulowaawe, yaaphwatiwa altaari* a aBahali*; ohiya yeeyo, owo aahaapwexakasa altaari* a erubani* yaakhala vasuluwaya. Aanyaanyatho anattikittha nyiri soothipeleliwa sa Axera, icaambulo soopatthiwa ni soohaniwa, anamwaraxela mmahiyeni a yaale yaapakenle sooveleela.

⁵Vahoolowaya aahisa makhuva a asaserdoti* valtaarini* awo; hiiho aatteeliha oYuda ni oYerusaleemu.

⁶Musidadeni sa ipuumba sa Manaxe, Efrayimi ni Simeyoni, mpaka sa Nafitali, ni mmathalani a mukhwipimwaya,

⁷ahaaphwata altaari* ni nyiri soothipeleliwa sa Axera, attikitthaka miluku mpaka othatuwa ntthupi, anaapwexakasa altaari* ootheene a erubani* mulaponi moothemwene mwa oYixrayeli. Hiiho, aahokoleela oYerusaleemu.

⁸Vayaakhani yanaamuloko niithannatthaaru ya olamulawawe, owo aamurumiha Xafani, mwaana mulopwana a Azaliya, ni Maaseiya, guvernadori a esidade, vamoha ni Yowa, mwaana mulopwana a Yowahazi, namawehaweha a empa ya emwene weera areherere Empa ya Yave Mulukwaawe, eerelaka otteeliha elapo ni Empa ya Yave.

⁹Awosa yaarowa omwinnyerera mutokweene a asaserdoti* Hilikiya, eparatha* yaaruuhiwe Mpaani mwa Muluku. aLeevi yaari anamalipelela a milako yaahaakhela yeeyo wa amaki a oManaxe ni wEfrayimi, ni wa oohalahala ootheene a oYixrayeli, mpakatho muloko wootheene wa oYuda ni oBenyamini ni wa amaki a oYerusaleemu.

¹⁰Yaawinnyerera eparatha* eyo asilopwana yaathanliwe weera ewehawehe orehereriwa wa Empa ya Yave, mwa yaawosa yaaliva anamiteko yaareherera ni yaarasela Empa ya Yave.

¹¹Eparatha* eyo, yaahaavahasa makalipinteiru ni anamateka weera ethume maluku ookheriwa ni itthaabwa wa mikoomba ni iviika sa impa seiyo mamwene a oYuda yaahiyalaaya siheleyaka nthala.

¹²Asilopwana awo, yaavara muteko moororomeleyani. Yaahooleliwa ni Yahati ni Obadiya, aLeevi a ekhapira ya Merari, ni Zakariya ni Mexulami, a ekhapira ya Kohati. aLeevi — ootheene oowera wiipa ikaruma sa icipo —

¹³yaawehaweha anamiteko, yaawehawehaka yaawo mmitekoni sootheene. aLeevi akina yaari anamalepa, asitokweene, ni anamalipelela a milako.

¹⁴Yaakhumihaaya eparatha* yaaruuhiwe Mpaani mwa Yave, musaserdoti* Hilikiya aaphwanya elivuru ya Nlamulo na Yave, yaavahiwe mwa Moisesi.

¹⁵Hilikiya aamweerela namalepa Xafani: “Koophwanya elivuru ya Nlamulo Mpaani mwa Yave.” Vano yaamwinnyerera Xafani.

¹⁶Hiiho, Xafani aarongha elivuru wa mwene, anamuleela: “Arumeiyaanyu ampaka sootheene alamuleliwaaya.

¹⁷Aahana eparatha* yaari Mpaani mwa Yave, enawinnyerera anamawehaweha ni anamiteko.”

¹⁸Owo aahaandyeereratho: “Musaserdoti* Hilikiya ookinnyerera elivuru.” Vano Xafani aamusomela mwene mpatta woolempwa wa elivuru.

¹⁹Mwene iiwakaru masu a elivuru, aahaahula soowarasawe,

²⁰anamulamulela Hilikiya, Ahikami, mwaana mulopwana a Xafani, Abedoni, mwaana mulopwana a Mikaya, namalepa Xafani, ni Asaya, namakhavihera a mwene:

²¹“Mwakikoherele Yave, miyo ni oohalahala a oYixrayeli ni a oYuda mwaha wa yeeyo elempwale mulivuruni ela ephwanyingwe. Onipattiherawawe isara Yave ti otokotoko, niwoko makholowaahu khayiiwelenle masu a Yave, ni khayeettenle sootheene silempwale mulivurunimu.”

²²Hilikiya vamoha ni yaale aaruminghaawe mwene vamoha ni yoowo, yaarowasa wuuluma ni mprofeeti muthiyana Hulda, mwaariye Xalumi, mwaana mulopwana a Tokati ni osuulu wa Hasera, ni mutokweene a anamathokorora a ikuwo Mpaani mwa Yave. Owo aakhala muttetthe munyowani wa oYerusaleemu.

²³Hulda aaweerelasa: “Yave, Muluku a oYixrayeli, oneera ha: Mwamuleele mulopwana oorumihaleni wa Miyo:

²⁴‘Yave oneera ha: Miyo kinooruuhela erisa nipuro nna ni wa amakaaya; malapho ootheene alempwale mulivuruni esommwale vamaithoni wa mwene a oYuda.

²⁵Yeenre ekihiya, enahisera erubani* miluku sikina, etannyaka isarasaka mwa miluku sootheene sipakiwe ni matataaya, isarasaka sinoopattela nipuro nna ni khasicipihiwaru.’

²⁶Mwamuleele ha mwene a oYuda, oorumihaleni weera munkoherere Yave: ‘Yave, Muluku a oYixrayeli oneera ha mwaha wa masu nyuwo mwiiwalaanyu:

²⁷Weenre murimaanyu ohuleya, muniiyeviha ohoolo wa Muluku, mwiiwakaru yeeyo Owo uulumenlaawe nipuro nna ni amakaaya, ni mweenre nyuwo mwiiyeviha ohoolowaka, mwaahulaka soowarasanyu, muniinla vamaithoniwaka, Miyo koowiiwani, onghima Yave.

²⁸Tivawo, Miyo kineeraaka koothukumanyiheni vamoha ni makholowaanyu, ni nyuwo munoovithiwa mmuretteleni. Maithowaanyu khayoona erisa kineeraaka kiruuhele nipuro nna ni amakaaya.’ ” Vano awosa yaamuronghela Yosiya yoowaakhula ele.

²⁹Vahoolowaya, mwene aahaathukumanyiha asitokweene ootheene a oYuda ni oYerusaleemu.

³⁰Hiiho, aavolowa Mpaani mwa Yave, ahooliwaka ni asilopwana ootheene a oYuda ni a oYerusaleemu, asaserdoti* ni aLeevi — muloko wootheene, okhuma atthu piswa mpaka oottittimiheya. Mwene aahaasomela ootheene akhuwelaka masu ootheene a elivuru ya wiiraana yaaphwanyiwe Mpaani mwa Yave.

³¹Owo aaheemela vanrimbunivawe, ni vamaithoni wa Yave, aarehereratho wiiraana, iiroromelihaka omutthara Yave ni wiiwelela ni murima wootheene ni okumi wootheene malamulowaawe, soolamulasawe, soorumasawe ni ikanosawe. Aahiiroromelihatho okwanihera masu a wiiraana alempwale mulivuruni mmwe.

³²Vahoolowaya aapakiha weera ootheene a oYerusaleemu ni oBenyamini yiiroromelihe ni wiiraana; amaki a oYerusaleemu yaakwanihera wiiraana wa Muluku, aani Muluku a makholowaaya.

³³Yosiya aavenxa miluku sootheene soothanyeya sa elapo yootheene ya oYixrayeli, anaanyesereriha ootheene yaari oYixrayeli omurumeela Yave, Mulukwaaya. Owo nlelo areene ni okumi, muloko khawaahiyale omutthara Yave, Muluku a makholowaaya.