Read Makhuwa-Shirima 2 Nyaha 35 Bible Online

2 Nyaha 35 - Makhuwa-Shirima bible

2 Nyaha 35

¹Yosiya aampaka mPaska* a Yave oYerusaleemu, ni eputtiputthi ya mPaska* yiiviwe vanihukuni nanaamuloko ni maxexe na mweeri woopacera.

²Owo aahaathanlela asaserdoti* mitekosaya, anaalipihera okhalela nthiti muteko wa Mpaani mwa Yave.

³Owo aaweerela aLeevi yaahusiha aYixrayeli ootheene ni yaatteeliheriwe Yave: “Ngwiikaathi Arka* ootteelihiwa Mpaani mwa Yave etekingwe ni Salomoni, mwaana mulopwana a Davide, mwene a oYixrayeli. Khoontthuniheriwaru oweetteettiha Arka* mwaathatenleene. Vano munrumeele Yave, Mulukwaanyu, ni aYixrayeli, mulokwaawe.

⁴Mwiirehererase emusi emusi mmikuttulanimwaya, muttharihaka ikano silempwale ni Davide, mwene a oYixrayeli, ni mwaniye Salomoni.

⁵Mukhale vaNipuroni Nootteela* ni mukuttula wa aLeevi, wa khula mukuttula wa aLeevi okhaleke mukuttula wa imusi sa muloko.

⁶Mwiive iputtiputthi sa mPaska*, mwiitteelihase ni mwaarehererele iputtiputthi axunninyu aYixrayeli, mpakaka yeeyo Yave olamulenlaawe mwa Moisesi.”

⁷Yosiya aavaha muloko wootheene waariwo, ikhondoolo ni ipuri 30 000 ntoko sooveleela wa mPaska*, mpakatho imombe macira miloko miraru — sootheene saakhumihiwe mwa sooreela sa mwene.

⁸Asitokweene yaacaangelatho ni otthuna, muloko, asaserdoti* ni aLeevi. Hilikiya, Zakariya ni Yehiyeli, anamawehaweha a Empa ya Muluku, yaahaavahasa asaserdoti* ikhondoolo ni ipuri 2 600, ni imombe macira mararu ntoko sooveleela sa mPaska*.

⁹Konaniya, vamoha ni axunneiye Xemaiya ni Netaneli, ni ahooleli a aLeevi Haxabiya, Yehiyeli ni Yozabadi, yaahaavaha aLeevi ikhondoolo ni ipuri macira miloko mithanu ni imombe macira mathanu ntoko sooveleela sa mPaska*.

¹⁰Miteko saarehereriwa, ni asaserdoti* yaakhala mmapuronimwaya ni aLeevi moorandelananimwaya, ntoko mwene aalamulenlaawe.

¹¹Iputtiputthi sa mPaska* saahiiviwa, ni asaserdoti* yaamisa ephome yaavahiwaaya, aLeevi eperaka ixapala sa axinama.

¹²Awosa yaamwalamwaxatho sooveleela soohisa weera evahe mikuttula sa imusi sa muloko, weera awosa emveleelele Yave, ntoko elempwalaaya mulivuruni ya Moisesi; yaapakatho hiiho ni imombe.

¹³Yaawooxa axinama a mPaska*, ntoko yaalempwalaaya, enaapeya mmwaapuni, mukhalini ni musupuriyani sooveleela sootteelihiwa; yaarumeela woowaakuveya muloko wootheene.

¹⁴Vahoolowaya aLeevi yaahiirehererela mpattaaya ni wa asaserdoti* a ekhapira ya Aharoni yaapwaherera opaka yooveleela yoohisa ni mipatta sa makhura mpaka ohiyu. Tivawo aLeevi yiirehererenlaaya mpattaaya ni wa asaserdoti*, ekhapira ya Aharoni.

¹⁵Anacipo a ekhapira ya Asafi yaari mmapuroni yaavaheriwaaya ni Davide, Asafi, Hemani ni Yedutuni, namoonihera* a mwene. Anamalipelela a milako yaalipelela khula mulako khawaatthuneya ovenya mmapuronimwaya, niwoko asikhwaaya aLeevi yaahaarehererela sooveleela.

¹⁶Hiiho, nihuku nne, miteko sootheene sa Yave saavariwa weera apakiwe mPaska* ni sipakiwe sooveleela soohisa valtaarini* a Yave, ntoko mwene Yosiya aalamulenlaawe.

¹⁷aYixrayeli yaariwo yaampaka mPaska* nihuku nne, ni mmahukuni mathannameeli yaapaka efesta ya epaawu yoohikhalano eferementu.

¹⁸oYixrayeli khanapakiwe mPaska* siiyoole okhuma mmahukuni a mprofeeti Samuweli; ni khawoworu mwene a oYixrayeli aampanke mPaska* siiyoole, ntoko aampankaawe Yosiya, asaserdoti*, aLeevi, aYuda ni aYixrayeli ootheene yaariwo, vamoha ni muloko wa oYerusaleemu.

¹⁹mPaska* ole aapakiwe vayaakhani yanaamuloko niithannaatthaaru ya olamula wa Yosiya.

²⁰Vahoolo wa sootheene aapankawe Yosiya ni areherenreene Empa ya Yave, Neko mwene a wExipitu, aarowa owana oKarekemixi, wEfrate, ni Yosiya aarowa ongwanano.

²¹Wa soothesene, Neko aamurumihela anamitthenga, amweerelaka: “Ii! Mwene a oYuda, muhipwatthele. Emaara ela, nkinoowananani, mene kingwanano omwene mukina. Muluku ookeerela weera kaakuveye; tivawo, muhiye omvaanya Muluku ori ni miyo; ohiyanawaya Owo onimoophwatani.”

²²Wa soothesene, Yosiya khaatthunne ohokolowa, ni aahiitikinsiha weera angwaneno. Owo khaatthunne wiiwa yeeyo aamuleenlaawe Neko wa mpatta wa Muluku, anarowa ongwanano munghawalawani wa oMegido.

²³Mukhottoni ananyuupa yaamulatha mwene Yosiya, anaweerela arumeiyaawe: “Mukivenxase va, koovulalaxa.”

²⁴Awosa yaamukuruxa mukaaronimwawe, enangweliha ekaaro ekina, enamurongha oYerusaleemu, mwa weiwo okhwenlaawewo. Owo ovithiwe mmahiyeni mwa makholowaawe, ni amaki ootheene a oYuda ni oYerualeemu yaamwiinlelasa.

²⁵Yeremiya aahiipa ecipo amuttittimiherelaka Yosiya, ni mpaka olelo va anamwiipa asithiyana ni asilopwana, annimuttittimiherela Yosiya ni icipo seiye sa olalamika. Eyo yoothatuwa ekhovelelo oYixrayeli, ni elempwale mulivuruni ya olalamika.

²⁶Sookhumelela sikina iyo sa olamula wa Yosiya, ni mitekosawe sa murima wa omuluku, ettharihiwaka yeeyo elempwale muNlamuloni na Yave —

²⁷sookhumelela sootheene okhuma ompacereroni mpaka ommaleloni — silempwale mulivuruni sa nyaha sa mamwene a oYixrayeli ni oYuda.