Read Makhuwa-Shirima 2 Nyaha 4 Bible Online

2 Nyaha 4 - Makhuwa-Shirima bible

2 Nyaha 4

¹Salomoni aalamulelatho opakiwa altaari* a ebronze, ereeneno imeetru* ithanniixexe sa mweerakamelonimwaya ni a mweekhuveelonimwaya, ni imeetru* ixexe ni eriyari ya emeetru* sa orakamelawaya osulu.

²Aahana nttankhi ntokotoko, noorukureera, nireeneno imeetru* ixexe ni eriyari ya emeetru* waanuwawaya ni imeetru* piili ni eriyari ya emeetru* orakamelawaya osulu. Yaatthuneya efiiyu ya imeetru* muloko ni tthaaru ni eriyari ya emeetru* yooringano orukureerawaya.

³Vathi wa mmakoteloni ni mukhwipimwaya, saakhala icaambulo sa anapunci a imombe — icaambulo muloko wa khula emeetru*. Imombe saahaniwe mmiserani miili sihaneliweene vamohamoharu ni nttankhi.

⁴Nttankhi niikaathiwe vasulu wa anapunci a imombe muloko ni piili, araru ewehihiweene mpatta wa ottuttuwani, araru mpatta ninkela nsuwa, araru mpatta wa ohitto ni araru mpatta ninkhuma nsuwa. Naari vasuluwaya, ni nyetto sa ottuli sa anapunci saawehihiwe eriyari.

⁵Mwiittaaya nttanki nne waari wa ikatha ixexe ni owanoniwaya waalikana ni wa ekoomixi — ntoko ethutu yoothapuruwa. Mmo saavolowamo iliitru* 63 000.

⁶Aapaka ibasiya muloko, aniikaathi ithanu mpatta wa ohitto ni ithanu mpatta wa ottuttuwani. Mmo, saarapiheliwamo sootheene saavareliwa muteko wa sooveleela soohisa, vaheera nttankhi naari noowiivululela asaserdoti*.

⁷Aapakatho onyaari muloko wa eyuuma yoorikaxa, attharihaka moota waatthuneyaaya, aniikaathi Mpaani mwa Muluku, mithanu mpatta wa ohitto ni mithanu mpatta wa ottuttuwani.

⁸Aapaka meesa muloko, aniikathi Mpaani mwa Muluku, mathanu mpatta wa ohitto ni mathanu mpatta wa ottuttuwani. Aapakatho ibasiya soovuuvihera ncira sa eyuuma yoorikaxa.

⁹Aapakatho nipuwa na asaserdoti*, ni nipuwa ntokweene ni maselaaya, aahuruwelano masele ni ebronze*.

¹⁰Aahiikaathi nttankhi mpatta wa ohitto, vanloothoni na eriyari ya mpatta ninkhuma nsuwa ni mpatta wa ohitto wa Empa ya Muluku.

¹¹Hurami-Abi aapakatho ixaaru, apoxoro ni ibasiya soovuuvihera. Aamaliha muteko wootheene wa Mpaani mwa Muluku aarummwalaawe ni mwene Salomoni.

¹²Amarimbu eeli, nyuru sa amarimbu miili saalikana ni ikoomixi sireene vasulu amarimbu; onyooro miili wootthaviwa saaphwaneliheriwe nyurusene seiye.

¹³Iroma macira maxexe wa onyooro miili wootthaveliwa, sireene misera miili sa irooma* wa khula onyooro miili wootthaveliwa saaphwaneliha nyuru;

¹⁴ikarinyu muloko vamoha ni ibasiyasaya muloko;

¹⁵nttankhi ni anapunci muloko neeli a imombe yaari vathi wa nttankhi;

¹⁶ixaaru, apoxoro, igarfu sa enama ni ikaruma sootheene iye Hurami-Abi aapakenlaawe Empa ya Yave, mwa seiyo aamurummaawe mwene Salomoni, saari sa ebronze* yoohaniwa.

¹⁷Mwene aalamulenle ototoxiwa, munghawalawani wa oYordanu, eriyari ya oSukote ni oZaretani.

¹⁸Salomoni aapanke itthu sincipalexa moota wooweera mpaka ohingwereyaaya waalikela olemela wa ebronze* yaavareliwe muteko.

¹⁹Ohiya seiyo, Salomoni aalamulela opakiwatho ikaruma sootheene iya wa Empa ya Muluku: altaari* a eyuuma yoorikaxa, meesa mwa yaawo saakhalaayawo ipaawu sa Okhala,

²⁰onyaari wa eyuuma yoorikaxa yooreera ni nyettosaya, weera omwaleelele ohoolo wa Nipuro Nootteelaxa* na mpuwa, ntoko waahimmwalaaya,

²¹ithutu, onyaari ni soorehererano mutthambo — sootheene sa eyuuma yoorikaxa yooreera.

²²Owo aapakatho soorehererano mutthambo, ibasiya, soovuuvihera, isasaani, ibasiya soohisera erubani* sa eyuuma yoorikaxa yooreera, ni masele a eyuuma yoorikaxa a Empa ya Muluku: ekhalaka masele a esaala ya mpuwaxa, eyo tiiyo Nipuro Nootteelaxa*, mpaka masele a esaala etokweene.