Read Makhuwa-Shirima 2 Nyaha 5 Bible Online

2 Nyaha 5 - Makhuwa-Shirima bible

2 Nyaha 5

¹Omanleene muteko wootheene aavaraawe Salomoni wa Empa ya Yave, owo aaruuha itthu yaatteelihalaaya atithawe Davide, aniikaathi vamoha ni mihakhu sa Mpaani mwa Muluku: eparatha*, eyuuma yoorikaxa ni ikaruma sootheene.

²Vano Salomoni, aahaathukumanyiha oYerusaleemu asitokweene a oYixrayeli ni ahooleli ootheene a ipuumba ni mapwattapwattha a imusi sa aYixrayeli, weera yaakuxe oSiyoni, esidade ya Davide, Arka* a wiiraana a Yave.

³Vano, asilopwana ootheene a oYixrayeli yaathukumana wa mwene, mweehuhuni ya efesta, wamweerini wanaathannamiili.

⁴Ephiyakaru asitokweene ootheene a oYixrayeli, aLeevi yaahaakuxa Arka*

⁵vamoha ni Eheema ya Muthukumano* ni ikarumasaya sootteelihiwa sootheene. Sootheene iye yaakuxale asaserdoti* aLeevi.

⁶Mwene Salomoni ni muloko wootheene wa oYixrayeli waathukumanne ni yoowo ohoolo wa Arka*, yaaveleela ikhondoolo ni imombe sahaawereyaru waalikela.

⁷Asaserdoti* yaahaarongha Arka* a wiiraana a Yave vanipuroniwaya, vaNipuroni Nootteela* na mpuwa wa Empa ya Muluku, vaNipuroni Nootteelaxa*, enawiikaathi waamapupha a akerubini*.

⁸Mapupha a akerubini* yaakungeenle vanipuroni na Arka*, yaakuttelelaka Arka* ni ikopo saavareliwa muteko woowaateexerano Arka*.

⁹Ikopo iye saari soorakamaxa moota wooweera okhwipiwaya waakhumela omokoni wa Arka* waangwereya wooneya mpatta wa ohoolo wa Nipuro Nootteela*, vaheera opwaha vaavawo khawaawereya; ni iyo siri wuuwu mpaka olelo va.

¹⁰Mwarkani* saarimo paahi itthabwa piili aahenlaawemo Moisesi aaraawe oHorebe, weiwo Yave aapankaawe wiiraana ni aYixrayeli ekhumaleene wExipitu.

¹¹Asaserdoti*, yaakhuma vaNipuroni Nootteela*. Ootheene awo yaahiitteelihasa, ehipwatthelaka mukuttula yaaraaya.

¹²aLeevi ootheene yaari anacipo — Asafi, Hemani, Yedutuni vamoha ni anamwanaaya asilopwana ni amusaaya yaaheemela mpatta ninkhuma nsuwa wa altaari*, ewanreene ikuwo sootteettheya, yiipaka ikengere, amakita ni atthakare, ehooliwaka ni asaserdoti* ncira ni miloko miili yiipaka mapalapatta.

¹³Yaawo yiipa mapalapatta ni anamwiipa a icipo, ereene murima mmoha, yaamvuwiha emutthapelaka Yave. Moorumani wa mapalapatta, ikengere ni ikaruma sikina, yaakhuwelaxa, emvuwihaka Yave ni yaahiipa moota ola: “Owo ti ooreera; osivelawawe khoommala.” Hiiho, nihutte naasareya Mpaani mwa Yave,

¹⁴moota wooweera asaserdoti* khayaawera ovara mitekosaya, niwoko ovuwa wa Yave waasareya Mpaani mwa Muluku.