Read Makhuwa-Shirima 2 Nyaha 6 Bible Online

2 Nyaha 6 - Makhuwa-Shirima bible

2 Nyaha 6

¹Vano Salomoni aaheera: “Yave aaheera weera onookhala munihutteni nooriipihana!

²Vekhaikhai kohootekelani Empa yootikhiniheyaxa, nipuro mwa nenno weera mmakemo mahuku ootheene!”

³Vahoolowaya, mwene aarukunuwa anareeliha muthukumano wootheene wa aYixrayeli, waari vale yeemelelo.

⁴Vano aaheera: “Attottopeliwe Yave, Muluku a oYixrayeli, mwa Yoowo okwanihenre ni matataawe yeeyo aaroromelinghaawe atithaka Davide ni eyanowaawe, eeraka:

⁵‘Okhuma nihuku kikhumihalaaka wExipitu mulokwaaka, nkithanlaleru esidade ya ipuumba sa aYixrayeli weera kitekemo Empa ya Muluku wa Nsinanaka, hata khaawo kaamuthanlalaaka weera akhale muhooleli a aYixrayeli, mulokwaaka.

⁶Vaheera vano kithanlale oYerusaleemu weera nikhalewo Nsinanaka, kinamuthanla Davide weera aalamule aYixrayeli, mulokwaaka.’

⁷Atithaka Davide yaatthunaxa vamurimaniwaya oteka Empa ya Muluku, ettittimiherelaka Nsina na Yave, Muluku a oYixrayeli.

⁸Vaheera Yave aaweerela: ‘Nyuwo moopaka nnene woohaawela vamurimaniwanyu ovaanela oteka Empa ya Muluku muttittimiherelaka Nsinanaka.

⁹Vanonto, khamuhiyono nyuwo muneera muteke, mene ti mwaninyu mulopwana, muneeraanyu mungyare; ti yoowo aneera ateke Empa ya Muluku attittimiherelaka Nsinanaka.’

¹⁰Hiiho Yave ookwanihera yoororomelihaawe. Miyo ti namarandela a atithaka Davide, ni vano kookilaathela ehice ya emwene ya oYixrayeli, ntoko aaroromelinghaawe Yave, ni kooteka Empa ya Muluku kittittimiherelaka Nsina na Yave, Muluku a oYixrayeli.

¹¹Kohaahelamo Arka*, mwa mwemmo siraayamo itthaabwa sa wiiraana wa Yave — wiiraana Owo aapankaawe ni aYixrayeli.”

¹²Vahoolowaya, Salomoni aarowa ohoolo wa altaari* a Yave ni wa muthukumano wootheene wa aYixrayeli, anatheteya matata.

¹³Owo aalamulela opakiwa yoonyikalela ya ebronze* yaarino imeetru* piili ni vakhaani mweerakamelonimwaya nitho mweekhuveelonimwaya, ni emeetru* emoha ni vakhaani orakamelawaya osulu, eriyari ya nipuwa na omokoni. Mwene aaheemela wa yoonyikalela, ni vahoolowaya aakokhora ohoolo wa muthukumano wootheene wa aYixrayeli, anatheteela matata wiirimu,

¹⁴anavekela: “Ii! Yave, Muluku a oYixrayeli, khoowoworu muluku onlikana ni Nyuwo, okhuma wiirimu mpaka vathi! Nyuwo munthokorora wiiraanawanyu ni waasivela arumeiyaanyu, mwa yaawo aneetta ni murima wootheene ntoko Nyuwo muntthunaanyu.

¹⁵Mookwanihera mwaamuroromelinghaanyu murumeiyaanyu Davide, atithaka; mwaaroromelinghe ni eyanowaanyu, munakwanihera ni Ntatananyu ntoko onooneyaaya olelo.

¹⁶Vano Yave, Muluku a oYixrayeli, mukwaniheretho yoororomelihaanyu mwaampakenlaanyu murumeiyaanyu Davide, atithaka, mweeraka: ‘Nyuwo khamurwa muhiya okhalano namarandela aneera akilaathele ehice ya emwene ya oYixrayeli, anamwaniinyu asilopwana yiipasoopa weetta nnenesene, ettharihaka malamulowaaka, ntoko nyuwo mumpakaanyu.’

¹⁷Vano, ii! Yave, Muluku a oYixrayeli, ekwanihereye yeeyo mwaamuroromelinghaanyu murumeiyaanyu Davide.

¹⁸Weeraka onoowereya Muluku omaka mulaponi ni atthu? Irimu, aani irimu soorakamelaxa khasinookotihani Nyuwo. Wootepaxa Empa ya Muluku ela kitenkaaka!

¹⁹Orookhalaru hiiho, mwaakhule nivekelo na murumeiyaanyu ni ovekelelawawe ikharari, ii! Yave, Mulukwaaka. Mwiiwe okhuwela ni nivekelo ompakaawe olelo murumeiyaanyu vamaithoniwanyu.

²⁰Maithwaanyu ewehexexe othana ni ohiyu Empa ya Muluku ela, nipuro mwa nenno mweenraanyu weera mwaamuhelamo Nsinananyu, weera mwiiwe nivekelo aneeraawe apake murumeiyaanyu akokhorenleene nipuro nna.

²¹Mwiiwe wiidyoonttelela wa murumeiyaanyu ni wa aYixrayeli, mulokwaanyu, yaavekelaka yuuramenleene nipuro nna. Mureene woomakawanyu wiirimu, mwiiwe, ni mwiiwaleene, mwaalevelele.

²²Mutthu aamutthekelaka mukhwaawe, onatthuneya opaka yoororomeliha, anarwa olipela ohoolo wa altaaraanyu mpaanimwanyumu,

²³muri wiirimu, mwiiwe ni mpake ekhaikhai. Mwaathorihe arumeiyaanyu; muntthuvelele nanthowa mummoroxelaka mmurumwawe yeeyo emphwanela ni mweettelowaawe. Moonihere ohikhalano nthowa wa oohinthowa, mwaakhulelaka hiiho ohinthowawawe.

²⁴aYixrayeli mulokwaanyu, yawiniwa ni mwiittana mwaha wa wootthekelani, enookokhorelani yiitthanaka Nsinananyu, evekelaka ni yoodyoonttelelakani Mpaanimu mwa Muluku,

²⁵muri wiirimu, mwiiwe ni mulevelele yoottheka ya aYixrayeli, mulokwaanyu, ni mwaahokoloxere mulaponi mwaavanghaanyu yaawo ni makholowaaya.

²⁶Yaawaleyaka erimu, ehinarupa epula niwoko na wootthekelani mulokwaanyu, ni owo wakokhorela nipuro nna, oniitthana Nsinananyu, osusaka wa yootthekaaya, niwoko na ottaruxawanyu,

²⁷muri wiirimu, mwiiwe ni mulevelele yoottheka ya arumeiyaanyu aYixrayeli, mulokwaanyu. Mwaaxuttihase ephiro ya ekhaikhai ni murumihele epula mulaponimwaya mvanghaanyu mulokwaanyu ntoko yoohiyeriwa.

²⁸Yaavolaka etala, hoye hoye nihooxo mulaponi, soowaaliwa, suuma niwoko na oviha, naari aphiyaka nasoope hoye hoye axiitthu akina, hoye hoye amwiittana yaaricaka isidadesaya — nakhalaru nihooxo hoye hoye ikwerere —

²⁹mwiiwe naapakiwaka nivekelo hoye hoye wiidyoontteleliwa wa ikharari ni akina akina a mulokwaanyu hoye hoye aYixrayeli ootheene, khula mutthu simvoreyaka soothananihasawe ni soovoreya, ni atheteelaka matata Empa ya Muluku ela,

³⁰muri wiirimu, nipuro mmankaanyu mwiiwe. Mulevelele ni mumpakele khula mutthu yeeyo omphwanelaawe, mweenre musuwela murimaawe. Aani, ti Nyuwo paahi musuwenle murima wa mutthu.

³¹Hiiho, awosa anoowoovani ni animweettela otthunawanyu mweehuhuni yootheene eneeraaya ekhale mulaponi mwaavanghaanyu makholowaahu.

³²Vano, wa namarwa ohikhanle muYixrayeli, mulokwaanyu, mene okhumelenle mulaponi yoorakamela niwoko na Nsinananyu ntokotoko, Ntatananyu nooweraxa ni Moonowaanyu woolipaxa — owo aawaaka ovekela nno,

³³muri wiirimu, woomakawanyu, mwiiwe ni mwaakhule yooveka ya namarwa, weera miloko sootheene sa mulaponi sisuwele Nsinananyu ni siwooveeni ntoko ampakaaya aYixrayeli, mulokwaanyu, ni sisuwele weera Empa ya Muluku ela kitenkaaka, enttittimiha Nsinananyu.

³⁴Mulokwaanyu waarowaka okhottoni waawanano amwiittanaaya, wakhalaru muntthunaanyu waarumihelawo, woovekelakani Nyuwo okokhorelaka esidade muthanlalaanyu ni Empa ya Muluku kitenkaaka kittittimiherelaka Nsinananyu,

³⁵muri wiirimu, mwiiwe nivekelonaya ni mwaakhavihere, mwaakihaka mulattwaaya.

³⁶Awosa yootthekelakani, eenre ahikhalaru ohinttheka, munaanyoonyerasiwa ni munawinnyerera wa amwiittanaaya, ni awo yaarongha wootthukiwani elapo ekina yoorakamela hoye hoye yookhuveela,

³⁷ni awosa yattheka mulaponi ekina mwa yeeyo aronghiwaaya, ni yarukunxa murima, enavekela mulaponi aakuxiwaaya: ‘Noottheka, noopaka yoonanara, nnakhala attiyamaaru,

³⁸ni wu awosa yookokhorelani ni murimaaya wootheene ni okumaaya wootheene, mulaponi aronghiwaaya wootthukiwani, yavekela ekokhorelaka elapo mwaavanghaanyu makholowaaya, esidade muthanlalaanyu ni Empa ya Muluku kitenkaaka kittittimiherelaka Nsinananyu,

³⁹vano muri wiirimu nipuro mmankaanyu, mwiiwe mavekelowaaya ni wiidyoonttelelawaya ni mwaakihe mulattwaaya. Mulevelele mulokwaanyu wootthekenleni.

⁴⁰Hiiho Mulukwaaka, maithwaanyu yoone ni maaruwaanyu yiiwe mavekelo apakiwe nipuro nna.

⁴¹Vano mweemele ii! Yave, Muluku, ni murwe vanipuroniwanyu na wiitthuuwa, Nyuwo ni Arka* a owerawanyu. Ii! Yave Muluku, asaserdotaanyu ewarele sa ovuluxiwa, ootteelaanyu ehakalalele oreerawanyu murima.

⁴²Ii! Yave, Muluku, muhimukhootte oottikittheliwaanyu. Muupuwelele omusivelawanyu otokotoko murumeiyaanyu Davide.”