Read Makhuwa-Shirima Ezera 1 Bible Online

Ezera 1 - Makhuwa-Shirima bible

Ezera 1

¹Vayaakhani yoopacera moolamulani mwa Siru, mwene a oParesi — ekwanihereyaka masu a Yave uulummaawe mwa Yeremiya — Yave aatava murima wa Siru, mwene a oParesi, weera alaleiye ekano moomwenenimwawe wootheene, yaalempwale moota ola:

²“Siru, mwene a oParesi oneera ha: ‘Yave, Muluku a wiirimu, ookivaha omwene wootheene wa vathi ni ookithanla weera kamutekele Empa ya Yave oYerusaleemu, elapo ya oYuda.

³Akhalaru mutthu a mulokwaawe a eriyaraanyu (Mulukwaawe akhaleke ni yoowo), aroweke oYerusaleemu elapo ya oYuda, weera arasele Empa ya Yave, Muluku a aYixrayeli, mwa Yoowo onkhala oYerusaleemu.

⁴Ahalahanle ootheene nakhalaru nipuro ankhalaayawo yaakheleke wa aximwaattamanaaya eparatha* ni eyuuma yoorikaxa, sooreerela ni mihuwo ni sooveleela sa otthunawaya weera yavareleke muteko seiyo wa Empa ya Muluku oYerusaleemu.’”

⁵Vano ahooleli a imusi sa oYuda ni oBenyamini vamoha ni asaserdoti* ni aLeevi — ootheene yaawo Muluku otamvaawe mirimasaya — yaahiireherera weera erowe yarasele Empa ya Yave.

⁶Aximwaattamanaaya ootheene yaahaavaha ikaruma sa eparatha* ni eyuuma yoorikaxa, sooreerela ni mihuwo, ni soovaha soorikaxa ohiya sooveleela sa otthunawaya.

⁷Ohiya toko yeeyo, mwene Siru aalamulela oruuhiwa ikaruma saari sa Mpaani mwa Yave, mwa seiye Nebukadenezari aakunxaawe oYerusaleemu, iikaathiki mpaani mwa milukusawe.

⁸Siru, mwene a oParesi, aamulamulela Mitredati, namawehaweha musurukhu a mwene, weera amwinnyerere seiye Xexibazari, mwaana a mwene a oYuda.

⁹Waattawaya waari ha: isasaani miloko miraru sa eyuuma yoorikaxa, isasaani macira muloko sa eparatha*, nyaapu miloko miili ni mithannamixexe

¹⁰ibasiya sa eyuuma yoorikaxa miloko miraru, ibasiya sa eparatha* macira maxexe ni muloko mmoha ni ikaruma sikina macira muloko.

¹¹Vano waatta wa ikaruma sa eyuuma yoorikaxa ni sa eparatha* waari 5 400. Xexibazari aakuxa sootheene iye anamatthukiwa aYixrayeli yaahokolowaaya oBabiloniya erowaka oYerusaleemu.