Read Makhuwa-Shirima Ezera 10 Bible Online

Ezera 10 - Makhuwa-Shirima bible

Ezera 10

¹Ezera avekelaka ni alapaka akokhonreene iinlaka ohoolo wa Empa ya Muluku, atthu ancipale a aYixrayeli — asilopwana, asithiyana ni amiravo — yaathukumana emurukureenreene. Awosatho yaahiinlaxa.

²Vano Xekaneya, mwaana mulopwana a Yehiyeli, mmoha a ekhapira ya Elami, aamweerela Ezera: “Khanaaroromeleiye wa Mulukwaahu naathenlaahu asithiyana anamarwa a miloko soowaattamana. Mene orookhalaru hiiho, wookhalatho oweherera wa aYixrayeli.

³Vano niiraaneke ni Mulukwaahu niwoomolaka asithiyana ootheene ale ni anamwanaaya, nittharaka miruku sa pwiiyaaka ni sa yaale anoova malamulo a Mulukwaahu. Eyo epakiwe nittharihiwaka Nlamulo.

⁴Mvenye; mulattu ola ori mmatatanimwanyu. Hiyo nnimookhaviherani; vano mulipihe murima ni mpake yeeyo.”

⁵Vano Ezera aavenya, anaanyesereriha asaserdoti* asitokweene, aLeevi ni aYixrayeli ootheene weera elipele opaka yeeyo yaalakenlaaya. Vanonto awosa yaalipela.

⁶Vahoolowaya Ezera aavenya ohoolo wa Empa ya Muluku, anarowa mukwaartuni mwa Yohanani, mwaana mulopwana a Eliyaxibi. Owo ari mwemmo, khaaciiye hata khaawunre alalamikelaka ohiroromela wa anamatthukiwa yaahokolongwe.

⁷Vano mweelaponi ya oYuda ni oYerusaleemu waalaleiwa weera anamatthukiwa ootheene yaahokolongwe ethukumane oYerusaleemu.

⁸Ahooleli ni asitokweene akinaawo yaalakela weera yaawo yeera ehirwe mmahukuni mararu yaamuyeleela sooreelasaya sootheene ni yaamoomoliwa mmuthukumanoni mwa anamatthukiwa.

⁹Mmahukuni mararu, asilopwana ootheene a oYuda ni oBenyamini yaathukumana oYerusaleemu. Vano munihukuni nanaamiloko miili na mweeri wanaathannamixexe atthu ootheene yaakilaathi vanipuwani ohoolo wa Empa ya Muluku, oothananaxeene niwoko na mulattu ole ni na niphirimindo na epula.

¹⁰Vano musaserdoti* Ezera aavenya, anaweerela: “Moheetta moota woohiroromeleya; mohaathela anamarwa mwaandyeereraka nthowa na oYixrayeli.

¹¹Vano, mulape sootthekasanyu ohoolo wa Yave, Muluku a makholowaanyu ni mpake otthunawawe. Mmwalamwale ni miloko soowaattamana ni axaarinyu anamarwa.”

¹²Muthukumano wootheene waamwaakhula, okhuwelaka: “Ettiitthu, Ontthuneya opaka yeeyo munghimaanyu.

¹³Vaheera va, aakhala atthu ancipale ni ela eyiitta, tiwawo nihikhaleke vaate. Ohiya toko yeeyo, khoongwereya omaliha mulattu ola nihuku nimoha hoye hoye meeli niwoko atthenke hiiha aahaatta.

¹⁴Ahoolelaahu elakeleke muthukumano wootheene. Vanonto, khula mulopwana a mmittetthenimwahu omuthenle namarwa arweeke mweehuhuni yoothanliwa vamoha ni asitokweene ni aphuki a muttetthaawe mpaka sineeraaya sisusihiwe wa hiyo isara soowoopiha sa Mulukwaahu sitannyiwe ni soottheka iya.”

¹⁵Yahaakhulenle yaari Yonatani, mwaana mulopwana a Asaheli ni Yazeya, mwaana mulopwana a Tikeva, vamoha ni aMexulami ni muLeevi Xabetai paahi.

¹⁶Hiiho anamatthukiwa yaapaka ntoko yaalakenlaaya. Musaserdoti*, Ezera, aahaathanla mapwattapwattha, mmoha a khula emusi — ootheenaawo yiitthaneliwa masinaaya. Munihukuni noopacera na mweeri wanaamuloko yaakilaathi weera ewehawehe khula mulattu.

¹⁷Munihukuni noopacera na mweeri woopacera yaamalihera milattu sa othelana ni anamarwa.

¹⁸Eriyari ya ikhapira sa asaserdoti* yaathelanne ni anamarwa saari ti iya: mukhapirani mwa Yexuwa, mwaana mulopwana a Yozadaki, ni axunneiye: Mahaseiya, Eliyezeri, Yaribi ni Gedaliya.

¹⁹Ootheenaawo yaaroromeliha owoomola axaaraya ni khula mutthu a yaale amuruuha napunci a muhuwaawe ntoko yooveleelela yoottheka.

²⁰Mukhapirani ya Imeri: Hanani ni Zebadiya.

²¹Mukhapirani ya Harimi: Mahaseiya, Eliya, Xemaya, Yehiyeli ni Uziya.

²²Mukhapirani ya Paxuri: Elihunai, Mahaseiya, Iximayeli, Netaneli, Yozabadi ni Elasa.

²³Eriyari ya aLeevi: Yozabadi, Ximei, Kelaya (eyo tiiyo Kelita), Petaheya, Yuda ni Eliyezeri.

²⁴Eriyari ya anamwiipa: Eliyaxibi. Eriyari ya anamalipelela milako: Xalumi, Telemi ni Uri.

²⁵Ni eriyari ya aYixrayeli akinaawo: mukhapirani ya Paroxi: Ramiya, Iziya, Malekiya, Miyamini, Eleyazari, Malkiya ni Benaiya.

²⁶Mukhapirani ya Elami: Mataneya, Zakariya, Yehiyeli, Abedi, Yeremoti ni Eliya.

²⁷Mukhapirani ya Zatu: Elihunai, Eliyaxibi, Mataniya, Yeremoti, Zabadi ni Aziza.

²⁸Mukhapirani ya Bebai: Yehohanani, Hananiya, Zabai ni Atelai.

²⁹Mukhapirani ya Bani: Mexulami, Maluki, Adaya, Yaxubi, Xeyali ni Yeremoti.

³⁰Mukhapirani ya Pahati-Mowabe: Adena, Kelali, Benaiya, Mahaseiya, Mataniya, Bezaleli, Bavai ni Manaxe.

³¹Mukhapirani ya Harimi: Eliyezeri, Ixiya, Malekiya, Xemaya, Ximeyoni,

³²Benyamini, Maluki, Xemariya.

³³Mukhapirani ya Haxumi: Matenai, Matata, Zabadi, Elifeleti, Yeremai, Manaxe ni Ximei.

³⁴Mukhapirani ya Bani: Mahadai, Amerami ni Uweli,

³⁵Benaiya, Beneya, Keluhi,

³⁶Vaniya, Meremoti, Eliyaxibi,

³⁷Mateneya, Matenai ni Yahasu.

³⁸Mukhapirani ya Bavai: Ximei,

³⁹Xelemeya, Natani, Adaya,

⁴⁰Makenadebai, Xaixai, Xarai,

⁴¹Azareli, Xelemeya, Xemariya,

⁴²Xalumi, Amariya ni Yoseefe.

⁴³Mukhapirani ya Nebo: Yeyeli, Matiteya, Zabadi, Zebina, Yadai, Yoweli ni Benaiya.

⁴⁴Asilopwana ootheene ala yaahaathela anamarwa ni akina a yaale yaahaayarano anamwane.