Read Makhuwa-Shirima Ezera 2 Bible Online

Ezera 2 - Makhuwa-Shirima bible

Ezera 2

¹Anttharelana ti masina a atthu a ilapo, mwa yaawo Nebukadenezari, mwene a oBabiloniya, aakunxaawe ootthukiweene aaronghaka oBabiloniya. Awosa yaahokoleela oYerusaleemu ni oYuda, khula mutthu wa muttetthaawe.

²Yaahokolongwe ehooliwaka ni Zerubabeli, Yexuwa, Nehemiya, Seraya, Rehelaya, Mordekai, Bilexani, Misepari, Bigevai, Rehumi ni Bahana. Masina a aYixrayeli ale ti ala:

³Ekhapira ya Paroxi atthu 2 172,

⁴ya Xefatei atthu macira mararu ni miloko mithannamiili neeli,

⁵ya Ara atthu macira mathannameeli ni miloko mithannamiili ni athanu

⁶ya Pahati-Mowabe irukulu sa Yexuwa ni Yowabe atthu 2 812,

⁷ya Elami atthu 1 254,

⁸ya Zatu atthu macira mathannamaxexe ni miloko mixexe ni athanu,

⁹ya Zakai atthu macira mathannameeli ni miloko mithannamosa,

¹⁰ya Bani atthu macira mathannamosa ni miloko mixexe neeli,

¹¹ya Bebai atthu macira mathannamosa ni miloko miili ni araru,

¹²ya Azegade atthu 1 222,

¹³ya Adonikami atthu macira mathannamosa ni miloko mithannamosa ni athannamosa,

¹⁴ya Bigevai, atthu 2 056,

¹⁵ya Adini, atthu macira maxexe ni miloko mithanu ni axexe,

¹⁶ya Ateri irukulu sa Hizekiya atthu miloko mithannamixexe ni athannaararu,

¹⁷ya Bezai atthu macira mararu ni miloko miili ni araru,

¹⁸ya Yora atthu ncira ni muloko mmoha neeli,

¹⁹ya Haxumi atthu macira meeli ni miloko miili ni araru,

²⁰ya Gibari atthu miloko mithannamixexe ni athanu

²¹amaki a oBeteleheemu atthu ncira ni miloko miili ni araru,

²²a oNetofa atthu miloko mithanu ni athannamosa,

²³a wAnatoti atthu ncira ni miloko miili ni athannaararu,

²⁴a wAzemaveti atthu miloko mixexe neeli,

²⁵a oKireyati-Yeharimi, oKefira ni oBeheroti atthu macira mathannameeli ni miloko mixexe ni araru,

²⁶a oRama ni oGeba, atthu macira mathannamosa ni miloko miili ni mmoha,

²⁷a oMikemasi atthu ncira ni miloko miili neeli,

²⁸a oBeteli ni wAi atthu macira meeli ni miloko miili ni araru,

²⁹a oNebo atthu miloko mithanu neeli,

³⁰a oMagebixi atthu ncira ni miloko mithanu ni athannamosa,

³¹a wElami okina atthu 1 254

³²a oHarimi atthu macira mararu ni miloko miili,

³³a oLodi, oHadidi ni wOno atthu miloko mithannamiili ni miloko miili ni athanu,

³⁴a oYeriko atthu macira mararu ni miloko mixexe ni athanu,

³⁵a oSenaha atthu 3 630,

³⁶Asaserdoti*: ekhapira ya Yedaya murukuluni sa Yexuwa atthu macira mathannamaxexe ni miloko mithannamiili ni araru,

³⁷ya Imeri 1 052,

³⁸ya Paxehuri 1 247,

³⁹ya Harimi 1 017.

⁴⁰aLeevi: ekhapira ya Yexuwa ni Kademiyeli murukuluni sa Hodeva, atthu miloko mithannamiili ni axexe.

⁴¹Anamwiipa: ekhapira ya Asafi ncira ni miloko miili ni athannaararu.

⁴²Anamalipelela a Empa ya Muluku: ekhapira ya Xalumi, Ateri ni Talemoni, Akubi, Hatita ni Xobai ncira ni miloko miraru ni athannaaxexe.

⁴³Arumeiyi a Empa ya Muluku: ekhapira ya Ziha, Hasufa, Tabayoti,

⁴⁴Kerosi, Siya, Padoni,

⁴⁵Lebana, Hagaba, Akubi,

⁴⁶Hagabi, Xalema, Hanani,

⁴⁷Gideli, Gahari Rehaya,

⁴⁸Rezini, Nekoda, Gazami,

⁴⁹Uza, Paseiyakhi, Besai,

⁵⁰Asena, Mehunimi, Nefuximi,

⁵¹Bakebuki, Hakufa, Harehuri,

⁵²Bazeliti, Mehida, Harexa,

⁵³Barekosi, Sisera, Tema,

⁵⁴Neziha ni Hatifa.

⁵⁵Ekhapira ya arumeiyi a Salomoni: ekhapira ya Sotai, Hasofereti, Peruda,

⁵⁶Yahala, Darekoni, Gideli,

⁵⁷Xefateya, Hatili, Pokereti-Hazebayimi ni Ami.

⁵⁸Arumeiyi a Empa ya Muluku ni ekhapira ya arumeiyi a Salomoni waattawaya waari atthu macira mararu ni miloko mithannamixexe ni muloko neeli.

⁵⁹Yaawo yaarweenle mmittettheni sa oTeli-Mela, oTeli-Harexa, oKerubi, wAdoni ni wImeri, mene ehiweraka waakhulela weera imusisaya saaphattungwe mwa aYixrayeli yaari ti ala:

⁶⁰ekhapira ya Delaya, Tobiya ni Nekoda atthu macira mathannamosa ni miloko mithanu neeli.

⁶¹Variyari wa asaserdoti*: ekhapira ya Habaya, Hakozi ni Barezilai, mwa yoowo aamuthenle mwaana a Barezilai, muGiliyade, ni iitthaneliwa nsina na atatawe oowaathelela.

⁶²Atthu ale yaahaasaasa masinaaya mulivurini ya imusi, mene khayaaphwannye ni yaahooneliwa ntoko oohitteela mweesaserdootini.

⁶³Tivawo guvernadori aakhoottihenraawe oca itthu sootteeliheriwa ahikhanle musaserdoti* avarelaka muteko Urimi ni Tumimi* weera ekhaikhai esuwanyeye.

⁶⁴Ootheene yaale yaahokolongwe wootthukiwani yaari atthu 42 360,

⁶⁵waahiya arumeiyaaya asilopwana ni asithiyana 7 337. Yaakhala eriyaraaya anamwiipa asilopwana ni asithiyana macira meeli.

⁶⁶Yaakhalano ikavalu* macira mathannameeli ni miloko miraru niithannamosa, amula* macira meeli ni miloko mixexe ni athanu,

⁶⁷ikamelu* macira maxexe ni miloko miraru niithanu ni abuuru 6 720.

⁶⁸Ephiyakaru wa Empa ya Yave oYerusaleemu, mapwattapwattha makina a imusi iye yaavaha soovaha sa otthunawaya wa oraseliwa Empa ya Muluku vanipuroniwaya na khalayi.

⁶⁹Ettharihaka owerawaya, yaavaha wa mutekoweene yoowo idrakema* 20 000 sa eyuuma yoorikaxa ni imina* macira miloko mithanu sa eparatha* nitho soowara sa esaseredoti ncira.

⁷⁰Asaserdoti*, aLeevi, anamalipelela a milako, anamwiipa ni arumeiyi a Empa ya Muluku vamoha ni mpatta wa muloko ni aYixrayeli akinaawo yaahiitekiha mmittetthenimwaya yaayarelingwaaya.